काठमाडौं- शनिबारै नेपाल भित्रिएको सलह किराको जोखिम न्यूनीकरण, प्रकोप नियन्त्रण तथा व्यवस्थापनका लागि कृषि तथा पशुपन्छि विकास मन्त्रालयले संयुक्त राष्ट्रसंघ खाद्य तथा कृषि संगठन (युएनएफएओ) एसिया क्षेत्रीय कार्यालय, बैंकक र पाकिस्तानका विज्ञहरुसँग छलफल गरेको छ।
मन्त्रालयका उपसचिव गंगादत्त आचार्यका अनुसार एफएओ र पाकिस्तानका वैज्ञानिकहरुसँग सलह किरासम्बन्धी विज्ञहरुसँग मन्त्रालयले छलफल गरेको हो। ‘एफएओका विज्ञ प्रतिनिधि र पाकिस्तानको सलह नियन्त्रण केन्द्रका विज्ञहरुसँग छलफल भयो। सलह किराको पहिचान, यसका गतिविधि र नियन्त्रणका लागि अवलम्बन गर्न सकिने उपायलगायत विषयमा उनीहरुसँग प्राविधिक सहयोग माग्ने निर्णय भएको छ,’ नेपाल लाइभसँगको सम्पर्कमा आचार्यले भने।
एफएओ र पाकिस्तानका वैज्ञानिकहरु सलह नियन्त्रणका लागि लामो सयमदेखि लागिरहेका कारण त्यहाँका विज्ञ र वैज्ञानिकहरुबाट यसबारे जानकारी लिइएको हो।
‘यो हाम्रा लागि नितान्त नयाँ विषय भएकाले विविध प्राविधिक विषयमा जानकारी लिनका लागि शनिबारको छलफलले सहयोग गर्यो,’ आचार्यले भने, ‘कुन विषादी प्रयोग गर्ने, कति मात्रामा प्रयोग गर्ने, विषादी कसरी छर्ने, सलह फैलावटको अवस्था कस्तो हुन्छ लगायत विषयमा उनीहरुको अनुभव नेपालका वैज्ञानिकलाई आदान प्रदान गरे।’
मन्त्रालयले सलह प्रभावित सबै प्रदेश र स्थानीय तहसँगसँगै केन्द्र सरकारसँग रहेको विषादीको परिमाण, छर्कने उपकरण लगायतको अवस्थाबारे तत्काल तथ्यांक लिने पनि निर्णय गरेको छ।
सबै प्रदेश र स्थानीय तहमा खटिएका प्राविधिकलाई सलहको फैलावट र त्यसको दिशाबारे सुक्ष्म निगरानी गर्न निर्देशन दिने निर्णय पनि मन्त्रालयले गरेको छ। तीनवटै तहको सरकारले समन्वयात्मक ढंगले नियन्त्रणको प्रयास गर्ने गरी संघीय मन्त्रालयले तत्कालै परिपत्र गर्न लागेको पनि आचार्यले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
