काठमाडौँ- प्रधानमन्त्री निवास बालुवाटारमै राखिएको सत्तारुढ दल नेपाल कम्युनिस्ट पार्टी (नेकपा)को स्थायी कमिटी बैठकमा पार्टी अध्यक्ष एवम् प्रधानमन्त्री केपी ओली नै अनुपस्थित भए। बुधबार दुई अध्यक्षले आफ्ना कुरा राख्ने र शुक्रबार सदस्यहरूले धारणा राख्ने भनिएपनि बुधबार आफ्ना कुरा राखेर बाहिरिएका प्रधानमन्त्री ओली बिहीबार भने आफ्नै निवास परिसरमा भएको बैठकमा नगएका हुन्। बैठकमा निक्कै बेरसम्म अध्यक्ष ओली नआएपछि महासचिव विष्णु पौडेलले केहीबेरमा आउने आश्वासन दिएका थिए। बिहान ११ बजेर २० मिनेटदेखि सुरु भएको बैठक साढे ४ बजेसम्म ओली बैठकमा पुग्नै भ्याएनन्।
‘हामीले पार्टी अध्यक्ष एवम् प्रधानमन्त्रीज्यू नदेखेपछि किन आउन भएन भनेर सोध्यौँ। महासचिव विष्णु पौडेल कमरेडले उठेर 'कार्यव्यस्तताले आउन भ्याउनु भएन। केही बेरमा आउँछु भन्नुभएको छ' भन्नुभयो त्यसपछि बैठक अघि बढ्यो,’ नेकपा स्थायी कमिटी सदस्य पेशल खतिवडाले भने, ‘तर, बैठक सकिँदासम्म पार्टी अध्यक्ष एवम् प्रधानमन्त्री आउँन भ्याउनु भएन। भोलि बस्ने गरी बैठक सकियो।’
बैठकमा आलोचना सुन्नुपर्छ भनेर पार्टी अध्यक्ष एवम प्रधानमन्त्री उपस्थित नभएको हुनसक्ने नेताहरुले लख काटेका छन्। तर प्रधानमन्त्रीका प्रेस सल्लाहकार सूर्य थापाले प्रधानमन्त्रीको कार्यव्यस्तताका कारण बैठकमा उपस्थित नहुने र बैठक सञ्चालन गर्न भन्नु भएको दाबी गरे। बैठकमा उपस्थित नहुनु अन्य कुनै कारण नभएको थापाको दाबी छ।
शुक्रबारको बैठकमा सरकारको कामबारे समीक्षा गर्ने तय भएको थियो। तर प्रधानमन्त्री तथा अध्यक्ष ओली नै अनुपस्थित भएपछि सो विषयलाई थाती राखेर सीमाबारे बहस सुरु भएको छ। कोरोना भाइरसको संक्रमण न्यूनीकरणमा सरकारले प्रभावकारी काम नगरेको र मेडिकल सामग्री खरिदमा भएको भ्रष्टाचारबारे सरकारको आलोचना हुने भएपछि सरकारको समीक्षा नगरी सीमाबारे बहस गरिएको स्थायी कमिटीका एक जना सदस्यको बुझाइ छ।
'पार्टीकै नेताहरुले सरकारका कदमबारे आलोचना गरिरहेका छन्। यस्तो बेला बैठकमा पनि सरकारको आलोचना हुने नै भयो। बैठकको सुरुवाती चरणमा नै सरकारको आलोचना गर्दा राम्रो सन्देश नजाने भएकाले सरकारको प्रशंशा हुने विषय सीमा रोजिएको हो,' उनले भने, 'बैठकका सुरुवाती चरणमा सरकारको समीक्षा नगरेर यसलाई जानीबुझीकन नै पछि सारिएको हो।' सरकारको आलोचना हुने भएका कारण नै प्रधानमन्त्री ओली बैठकमा अनुपस्थित भएको ती नेताको ठम्याइ छ। प्रधानमन्त्री ओलीले पार्टी बैठक बालुवाटारमै राखेर शुक्रबार उपस्थित नभएको विषयमा पार्टीमा पुनः आलोचना सुरु भएको छ।
सीमा समस्या र समाधानबारे छलफल
शुक्रबारको बैठकमा नेकपा स्थायी कमिटी बैठकको एजेन्डा नेपालको सीमा समस्या र समाधानमा केन्द्रित भई १८ जना स्थायी कमिटी सदस्यले आफ्नो धारणा राखेको प्रवक्ता नारायणकाजी श्रेष्ठले बताए। बैठकको सुरुमा परराष्ट्रमन्त्री प्रदीप ज्ञवालीले हालसम्मका घटनाक्रम विकासबारेमा जानकारी गराएको श्रेष्ठले बताए।
‘बैठकको सुरुमै परराष्ट्र मन्त्रीले सीमाका विषयमा भई रहेका पहलका विषयमा जानकारी गराउनुभयो। कूटनीतिक संवादद्वारा नेपालको अतिक्रमित भूमि फिर्ता गर्ने सवालमा भारतसंग पहल गरिरहेको छ,’ परराष्ट्रमन्त्री प्रदीप ज्ञवालीलाई उद्धृत गर्दै प्रवक्ता श्रेष्ठले भने, ‘तर अहिलेसम्म भारतले वार्ताका निम्ति सरकारात्मक तत्परता देखाइसकेको छैन।’
भारतसँगको सीमा विवादमा कूटनीतिक माध्यमबाटै समाधान खोजिने ज्ञवालीले बताएका थिए। बैठकमा बोल्ने अधिकांश नेताले नेपालका झापादेखि र्दाचुलासम्मको सीमा समस्या समाधान गनै सरकारले पहल गर्नु पर्ने धारणा राखेको स्थायी कमिटी सदस्य मुकुन्द न्यौपानेले बताए। ‘नेपालको झापाको कचनकवलदेखि दार्चुलाको लिम्पियाधुरालगायतका क्षेत्रसम्म सीमा विवाद छ,’ न्यौपानेले भने, ‘भारतले अतिक्रमित भूगमा सबै फिर्ता लिएर सीमा विवाद सदाका लागि समाधान हुनेगरी पहल गर्न अधिकांश सदस्यले आग्रह गर्नुभयो।’
कालापानी, लिपुलेक र लिम्पियाधुरासहितको नक्सा जारी गरेर सरकारले ऐतिहासिक काम गरेको नेताहरुले प्रशंसा गरेका थिए। भारतले अतिक्रमण गरेको भूभागका विषयमा अहिले उठेकाले स्थिर सरकार भएकै बेला भूमि फिर्ता ल्याउने गरी लाग्नुपर्ने विषयमा नेताहरूले धारणा राखेको न्यौपानेले भने।
शनिबारको बैठकमा समेत सीमा समस्या र समाधानकै विषयमा नेताहरुले धारणा राखेका थिए। शुक्रबारको बैठकमा ज्ञवाली सहित प्रवक्ता नारायणकाजी श्रेष्ठ, लीलामणि पोखरेल, मातृका यादव, देव गुरूङ, गोकर्ण विष्ट, शंकर पोखरेल, पम्फा भुसाल, छविलाल विश्वकर्मा, बेदुराम भुसाल, रघुवीर महासेठ, अमृतकुमार बोहरा, भीम रावल, अष्टलक्ष्मी शाक्य, भीम आचार्य, केशव बडाल, गणेश साह, मुकुन्द न्यौपानेले धारणा राखेका थिए। बैठकमा एक जना नेतालाई १० मिनेटको समय दिएको थियो।
चीनले सीमा मिचेको छैन भन्दै ज्ञवाली र भुसालको प्रतिवाद
चीनले सीमा मिचेको विषयमा परराष्ट्रमन्त्री प्रदीप ज्ञवाली र कृषि मन्त्री घनश्याम भुसालले कडा प्रतिवाद गरेका थिए। चीनले नेपालको सीमा मिचिएको विषयमा सञ्चार माध्यमले उठाएपछि बैठकमा नेताहरुले ज्ञवाली र भुसाललाई प्रतिप्रश्न गरेका थिए। परराष्ट्र मन्त्री ज्ञवालीले सञ्चार माध्यमले चीनले नेपालको सीमा मिच्यो भनेर गरिएको प्रचारलाई सर्वथा झुटो, भ्रामक नियोजित प्रचार भएको जवाफ दिएका थिए। नेपाल र चीनबीच सीमा विवाद हुँदै नभएको विषय उचालेर भारतसँगको सीमा विवाद गिजोल्न षड्यन्त्र भएको ज्ञवालीले जवाफ दिएका थिए।
यस्तै भुसालले कृषि मन्त्रालयमा नापी शाखा हवाला दिदै चीन र नेपाल सीमा विवादमा कुनै सत्यता नभएको स्पष्टीकरण दिए। ‘सीमा विवाद कृषि मन्त्रालयसंग कुनै नाता सम्बन्ध र साईनो छैन,’ कृषिमन्त्री समेत रहेका भुसालले भने, ‘तर, कृषि मन्त्रालयमा हुँदै नभएको नापी शाखाको हवाला दिएर नेपाल र चीनबीच सीमा विवाद भनेर मिडियामा आयो।’ ज्ञवाली र भुसालले आफ्नो मन्त्रालयबाटै नेपाल चीनबीच सीमा विवादका विषयमा यस अघि नै विज्ञप्ति प्रकाशित गरेर स्पष्ट पारेका थिए।
नेकपा नेतालाई कसले लगाइदियो कोरोना जन्तर?
शुक्रबारदेखि सुरु भएको स्थायी कमिटी बैठकमा नेकपा नेताहरुले कोरोना जन्तर लगाए। वरिष्ठ नेता माधवकुमार नेपालले जापानबाट ल्याएको कोरोना रोगबाट बच्न कोरोना जन्तर वितरण गरेको र स्थायी कमिटी नेताहरुले सो जन्तर लगाएको नेता मुकुन्द न्यौपानेले बताए। ‘सबै नेताहरुले लगाउनु भएको छैन। केही नेताहरुले यो माला लगाउनु भएको छ। यो लगाएपछि कोरोना लाग्दैन भन्ने सुनेको हो,’ न्यौपानेले भने, ‘केटाकेटी हुँदा धामीले जन्तर लगाईदिन्थे। यो लगायो भने भुत बोक्सी लाग्दैन भन्थे। मैले यसलाई कोरोना जन्तर भन्ने गर्या छु।’ कोरोना जन्तर घाममा देखाए काम नगर्ने भएर छोपेर लगाउने गरेको न्यौपाने बताए।
कोरोना जन्तरका साथमा नेकपा स्थायी कमिटी सदस्य मुकुन्द न्यौपाने। तस्बिर : नेपाल लाइभ
पार्टीको बैठक सरकारी निवासमा राख्नु खुलेआम भ्रष्टाचार : कमल थापा
प्रधानमन्त्रीको सरकारी निवासमा नै पार्टीको बैठक राख्नु खुलेआम भ्रष्टाचार भएको भन्दै राष्ट्रिय प्रजातन्त्र पार्टी (राप्रपा) अध्यक्ष कमल थापाले आपत्ति जनाएका छन्। बालुवाटारमै राखिएको नेकपा स्थायी कमिटी साधन स्रोतको दुरुपयोग भएको उनको भनाइ छ। थापाले शुक्रबार समाजिक सञ्जाल ट्विटरमा लेखेर प्रधानमन्त्री ओलीको विरोध गरेका हुन्। ‘प्रधानमन्त्रीको सरकारी निवास,कार्यालय र त्यहाकक रहेका सरकारी साधन श्रोतको दुरुपयोग गरी पार्टीको बैठक र कार्यक्रम गर्नु खुलेआम भ्रष्टाचार हो,’ अध्यक्ष थापाले ट्विट गरेका छन्, ‘अख्तियारको दुरुपयोग हो। राज्यलाई पार्टीको सम्पति ठान्ने अनैतिक/अलोकतान्त्रिक कार्य अन्त गरियोस्। राज्यको सम्पति रक्षा गर्नु प्रधानमन्त्रीको कर्तव्य हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
