काठमाडौं– असार ७ गते दिउँसो ३ बजे न्यूरोडको एक क्यामेरा पसलमा दुई युवा गए। ती क्यामेरा पसलेसँग १७ लाख रुपैयाँ भएको जानकारी पाइसकेका उनीहरुले धम्क्याएर १० लाख मागे।
क्यामेरा पसलेले १० लाख रुपैयाँ दिन बाध्य भए। पैसा पाएपछि निमेषभरमै ती दुई युवक हराए।
आफ्नो १० लाख रुपैयाँ लुटिएको भन्दै व्यवसायी विकास अग्रवाल नजिकै रहेको महानगरीय प्रहरी वृत्त जनसेवा पुगे। घटनाबारे मौखिक जानकारी गराए। यस घटनाको जानकारी मौखिक रुपमै महानगरीय प्रहरी अपराध महाशाखाका एसएसपी दीपक थापासम्म पुग्यो। ‘मैले तत्कालै जनसेवामा रहेका महाशाखाका प्रहरीलाई घटनाबारे अनुसन्धान गर्न लगाएँ’, नेपाल लाइभसँग उनले भने।
अनुसन्धानका क्रममा प्रहरी घटना भएको स्थान वरपरको सिसी टिभी फुटेज हेर्यो। व्यवसायीले दिएको हुलिया भएकै दुई व्यक्ति एक मोटरसाइकलमा चढेर फरार भएको सिसी टिभी फुटेजमा देखियो।
लुटेरा खोज्दै हिँडेको प्रहरी त्यसपछि भने तीन छक भए।
सिसी टिभी फुटेजमा देखिएको मोटरसाइकल प्रहरीकै कल्याण महाशाखाबाट किस्ताबन्दीमा लिएको पाइयो। उक्त मोटरसाइकल २ नम्बर गणमा कार्यरत सिपाही विक्रम कुमार चन्दले किस्तामा निकालेको पाइयो। त्यसपछि महाशाखाले बुधबार चन्द र उनकै बयानका आधारमा महानगरीय प्रहरी परिस काठमाडौंमा कार्यरत हवल्दार धिरेन बिष्टलाई पक्राउ गरेको थियो।
क्यामेरा व्यवसायी अग्रवालले एक फाइनान्सबाट बाबुको अपरेसनका लागि १७ लाख रुपैयाँ निकालेको र सो थाहा पाएपछि १० लाख रुपैयाँ उनीहरुले लुटेर लगेको बताएको एसएसपी थापाले बताए।
यद्यपी अग्रवाल हुण्डी कारोबारी समेत भएको उक्त रकम हुण्डी गर्न लागिएको हुनसक्ने प्रहरी स्रोतका अनुसारले जनाएको छ। हुण्डी गर्न लागिएकोमध्ये १० लाख नदिए पक्राउ गर्ने धम्की दिएपछि अग्रवालले पैसा दिइएको स्रोतको भनाइ छ।
पक्राउ परेका दुई जनालाई महाशाखाले फाइलसहित महानगरीय प्रहरी परिसर काठमाडौंमा पठाएपछि कारबाही प्रक्रिया अघि बढ्ने परिसरका प्रवक्ता राजकुमार केसीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
