बुटवल– बुटवल–बेलहिया व्यापारिक मार्ग विस्तार आयोजना अन्तर्गत बुटवलको राजमार्ग चौराहदेखि गोलपार्कसम्मको साढे ३ किलोमिटर सडक विस्तार कार्य सुरु भएको छ।
अहिले ४ लेन रहेको सडक ६ लेन बनाउनेगरी सडक किनारका संरचनामा डोजर चलाएर विस्तारको काम मंगलबारबाट अघि बढाइएको हो। सो क्षेत्रका घरधनीले घर नभत्काएपछि प्रहरीको सहयोगमा डोजरबाट संरचना भत्काउन थालिएको छ।
बुटवलको मुख्य बजार क्षेत्र राजमार्ग चौराहदेखि गोलपार्कसम्म ३.७ किलोमिटर सडकमा ३ सय ११ वटा घर भत्काउनुपर्ने अवस्थामा रहेको आयोजनाका इञ्जिनियर गोविन्द श्रेष्ठले जानकारी दिए। आफैं घर भत्काउन आयोजनाले पटक–पटक सूचना जारी गरे पनि घरधनीले अटेर गरेपछि डोजरको प्रयोग गरिएको उनले बताए।
आयोजनाले सडकका दायाँ–बायाँ रहेका रूखहरू हटाइसकेको छ। ४ वर्षअघि ४ लेनमा निर्माण भएको बुटवल बजार क्षेत्रको सडक ६ लेनको बनाउने दुई वर्षअघि अनुमति पाएको थियो।
यस क्षेत्रका ४२ जना घरधनीले ‘आफूहरूको घर भत्काउने कार्यमा रोक लगाउन’ भन्दै सर्वोच्च अदालत र उच्च अदालत बुटवलमा मुद्दा हालेका थिए। जसले गर्दा करिब १ वर्ष काम रोकिए पनि हालै सर्वोच्चले अन्तरिम आदेश दिनु नपर्ने फैसला सुनाएपछि आयोजनाले ठेकेदार कम्पनीलाई काम सुरू गर्न आग्रह गरेको हो।
सडक विस्तारको जिम्मा ‘द’ कञ्चनजंघा बिरूवा जेभी कन्ट्रक्सन प्रालि काठमाडौंले लिएको छ। गत वर्ष चैत ३० गते ३० महिनाभित्र चार लेनको सडकलाई ६ लेनमा विस्तार गर्नेगरी ४१ करोड २३ लाख रूपैयाँमा ठेक्का सम्झौता भएको हो। ठेकेदार कम्पनीले हालसम्म ४ करोड रूपैयाँ भुक्तानी लिइसकेको छ।
सडक विस्तार कार्य आउँदो २०७६ असोजसम्म सक्नुपर्ने सम्झौता छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779193203.png)
-1764146706.png)
