भैरहवा- रुपन्देही जिल्लामा वार्षिक औसत ४० देखि ५० वटा जबरजस्ती करणी तथा जबरजस्ती करणी उद्योग अपराधका घटना हुने गरेको छ। घटना लुकाउने गरेकाले यो संख्या अझै बढी हुन सक्ने प्रहरीको अनुमान छ।
जनचेतनाको अभावमा जबरजस्ती करणीका घटना बाहिर आउन नसक्दा तथा व्यक्तिगत, सामाजिक मान प्रतिष्ठासँग जोडिएको कारण पीडित पक्ष प्रहरीको सम्पर्कमा नआउँदा अपराधीको मनोबल बढ्ने गरेको प्रहरीको भनाइ छ।
जिल्ला प्रहरी कार्यालय रुपन्देहीले सार्वजनिक गरेको तथ्यांक अनुसार जबरजस्ती करणीको सिकार हुनेमा अधिकांश मजदुर वर्गका महिला तथा बालिका छन्।
रुपन्देहीमा चालु आर्थिक वर्षमा २९ वटा जबरजस्ती करणीको मुद्दा दर्ता भएको छ। त्यसमध्ये १३ जना मजदुरी पेसामा रहेको रुपन्देही प्रहरी प्रमुख एसपी श्यामलाल ज्ञवालीले बताए। मजदुरी पेसापछि कृषि पेसामा लागेका ७ जना, ५ जना विद्यार्थी, २ जना बेरोजगार तथा २ जना वैदेशिक रोजगारीका रहेका छन्।
१६ देखी २५ वर्ष उमेरका महिला तथा बालिका प्राय: जबरजस्ती करणी मुद्दामा पीडित देखिएका छन्। तथ्यांक केलाउँदा समग्र मुद्दामा आधारभन्दा बढी अर्थात् ५२ प्रतिशत १६ देखि २५ वर्ष उमेरका महिला तथा बालिका पीडित रहेका छन्।
२० प्रतिशत २६ देखि ३५ वर्ष सम्मका महिला पीडित रहेका छन् भने १६ वर्षमुनिका १४ प्रतिशत तथा ३७ देखि ४५ वर्षसम्मका पनि १४ प्रतिशत नै देखिएको छ।
कतिपय जबरजस्ती करणी नाताभित्र हुने भएकोले घटना बाहिर नआउने समस्या रहेको प्रहरीको भनाइ छ। यसका साथै कलिलै उमेरमा प्रेमविवाह गरी भाग्ने, खोजतलासको रुपमा उजुरी पर्ने तर फेला परेपछि बालिकाका पक्षबाट जबरजस्ती करणीमा जाहेरी नआउने गरेको प्रहरी प्रमुख ज्ञवालीले बताए।
प्रहरीमा रिसिबीको भरमा बनावटी मुद्दा लिएर आउने, सहमतिमा भएका कामहरु अन्य व्यक्तिले थाहा पाएको अवस्थामा जबरजस्तीको घटनामा जाहेरी आउने गरेको प्रहरीको भनाइ छ।
रुपन्देहीमा गत वर्ष भने जबरजस्ती करणी तथा जबरजस्ती करणी उद्योगका घटनामा कमी देखिएको थियो। आर्थिक वर्ष २०७२/२०७३ मा २६ वटा जबरजस्ती करणीका घटना दर्ता भएको रुपन्देही प्रहरी प्रमुख एसपी ज्ञवालीले बताए। सोही वर्ष १५ वटा जबरजस्ती करणी उद्योगका घटना दर्ता भएकोमा आर्थिक वर्ष २०७३/२०७४ मा यो संख्या बढेर ३० पुगेको थियो।
आर्थिक वर्ष २०७३/२०७४ मा जबरजस्ती करणीका ४३ वटा मुद्दा दर्ता भएको छ। चालु आवमा भने जबरजस्ती करणीका २९ वटा मुद्दा दर्ता भएकोमा २१ वटा फछर्यौट भइसकेको र ८ वटा अनुसन्धानमै छन्। साथै चालु आवमै जबरजस्ती करणी उद्योगका १३ वटा मुद्दा दर्ता भएकोमा ८ वटा फछर्यौट भई ५ वटा अनुसन्धानमा रहेको एसपी ज्ञवालीले जानकारी दिए।
प्रहरीले गरेको अनुसन्धानमा रुपन्देहीमा सबैभन्दा बढी साँझ ६ बजे देखि १२ बजे राति सबैभन्दा बढी महिला हिंसाका घटना हुने गरेका छन्। 'चालु आर्थिक वर्षमा ५० प्रतिशत बलात्कारका घटना सो समयभित्र भएको देखिन्छ,' एसपी ज्ञवालीले भने, 'जबरजस्ती करणीका अधिकांश घटना नजिकका नातेदार तथा साथीहरुबाटै भएको अनुसन्धानबाट देखिन्छ।'
प्रहरीले थाल्यो अभियान
देशभरि नै अहिले विभिन्न उमेर समूहका महिला तथा बालिका बलात्कृत भइरहेको समाचार आइरहँदा रुपन्देही प्रहरी यस्ता घटना न्युनीकरणका लागि विस्तृत कार्ययोजना बनाएर अगाडि बढिरहेको छ।
बढ्दो सहरीकरणसँगै रुपन्देहीमा पनि जबरजस्ती करणी तथा जबरजस्ती करणी उद्योग अपराध बढ्दै गएपछि रुपन्देही प्रहरीले नियन्त्रणको अभियान थालेको हो।
जिल्ला प्रहरी कार्यालय रुपन्देहीले सार्वजनिक गरेको कार्ययोजनामा जबरजस्ती करणी अपराध सम्बन्धमा विद्यालय तथा कलेजहरुमा कार्यक्रम गर्ने, जबरजस्ती करणी अपराध नियन्त्रण सम्बन्धमा विभिन्न पत्रपत्रिका, स्थानीय एफएम रेडियोबाट समेत नाटक प्रसारण गर्ने जस्ता कार्यक्रम समेटिएका छन्।
यसैगरी जबरजस्ती करणी अपराध न्युनीकरणको पहल गर्न स्थानीय तहका निर्वाचित प्रतिनिधिसँग छलफल तथा अन्तरक्रिया गर्ने कार्ययोजना रहेको प्रहरी प्रमुख एसपी ज्ञवालीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
