काठमाडौं– थाइ नेपाली संघ, दुःख निवारण विभागको अग्रसरतामा थाइल्याण्डका विभिन्न सहरहरूमा कोरोना भाइरसका कारण आपत्ति परेका नेपाली र गोर्खाली एवं जनजाति समुदायमा राहत वितरण गरिएको छ।
थाइ नेपाली संघका विभिन्न शाखाहरुले सक्रियताका साथ राहत संकलन साथै वितरण कार्य गरेको थाइ नेपाल संघका अध्यक्ष कुमार कार्कीले बताए। कोरोना भाइरसका कारण नियमित काम नभएपछि आर्थिक रुपले अप्ठ्यारोमा परेका समुदायलाई प्राथमिकतामा राखेर राहत वितरण गरिएको उनले बताए।
राहत सामग्रीहरुमा चामल, तेल, चाउचाउ, माछाका डब्बा, पिठो, नुन, मसला जस्ता दैनिक उपभोग्य सामग्रीहरु रहेको छ। आवश्यकता अनुसार केही व्यक्तिहरुलाई आर्थिक सहयोग पनि गरिएको थियो। शाखाहरू नभएका ठाउँबाट पनि राहत सामाग्री माग भएको अवस्थामा थाइ नेपाली संघका प्रतिनिधिहरू गएर राहत वितरण गरेको उनले बताए।
गत मे महिनामा थाइ नेपाली संघबाट भएको राहत वितरणबाट २ हजार ५ सय ८ परिवारका ८ हजार ६ सय ८५ व्यक्तिहरुले सेवा पाएका छन्।
थाइ नेपाली संघका शाखा तथा उपशाखाहरूमा अवश्यकता अनुसार बिहान बेलुका खानाहरू बनाइ दैनिक रूपमा ४ सयभन्दा धेरै मानिसहरूलाई वितरण गरिएको छ। यस कार्यमा विभिन्न संघ संस्थाहरूले पनि थाइ नेपाली संघसँग मिलेर सहयोग गरेका छन्।
संघले महामारी समयमा रक्तदान कार्य पनि गरेको छ। विविध रोग उपचारका कारण अस्पतालमा भर्ना हुन भएका साथै भर्ना हुन अप्ठ्यारो भएका र उपचार पश्चात आर्थिक अभावका कारणले अप्ठ्यारोमा परेका परिवारहरुलाई पनि दुःख निवारणले सहयोग गरेको छ।
यसैगरी कोरोनाको महामारीले समस्यामा परेका नेपालबाट अध्ययनका लागि आएका ५६ नेपाली विद्यार्थीहरुलाई पनि अन्य संस्था तथा नेपाली राजदूतावाससँग मिलेर राहतको कार्यमा सहयोग गरिएको संघले जनाएको छ।
थाइल्याण्डबाट विदेश फर्कन चाहनेहरूलाई पनि सरकारी निकायहरूबाट कागजपत्र लगायत आवश्यकता अनुसार यातायात सुविधा मिलाउने कार्यमा संघले सहयोग गर्दै आएको उनले बताए।
संघले कोरोनाको महामारीले ग्रस्त भएको बेला पनि संघको दुःख निवारण विभागको सक्रियता भने थाइल्याण्ड देशभर सुचारु रहेको संघले जनाएको छ। आफूले सुरक्षाका विधि अपनाएर संघको दुःख निवारण विभागका प्रमुख, सदस्यहरु र सिंगो थाइ नेपाली संघको टीम राहतका कार्यहरुमा सरिक भएको थियो।
महामारीको कारण अप्ठ्यारोमा परेको खण्डमा सूचना दिन संघले सामाजिक सञ्जाल मार्फत सूचना जारी गरेको थियो। यस कार्यका लागि संघका महासचिव विनोद लामिछाने र दुःख निवारण विभागका प्रमुख रामकुमार ढुंगानालाई तोकेको छ।
विभागका प्रमुख ढुंगानाले संघका विभिन्न शाखाका पदाधिकारी तथा विभिन्न व्यक्तिहरुको सहयोगले गर्दा राहतका कामहरु गर्न सकिएको बताए। राहत र सामाजिक कार्यमा विभिन्न शाखाहरुबाट सहयोगको लागि उनले आभार व्यक्त गरे।
संघका महासचिव विनोद लामिछानेले पनि थाइल्याण्डका विभिन्न सहरमा आपतमा पर्नुभएका व्यक्तिहरुले संघमा सम्पर्क राख्नुभएको र संघका शाखाहरुबाट संघबाट सक्दो प्रयास भएको बताए। राहतका लागि विभिन्न व्यक्ति, संघ संस्थाबाट प्राप्त सहयोगका लागि थाइ नेपाली संघ धन्यवाद प्रकट गर्दै संघका अध्यक्ष कार्कीले विपत्तिको समय एक भएको भावना विकास भएको बताए। राहत वितरणको कार्यमा संघले अझै पनि काम गरिरहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
