विराटनगर– मोरङको विराटनगर–३ की निरादेवी उराव परिवारको गुजाराका लागि अरुको घरमा काम गर्छिन्। बनिबुतो र मेलापातबाटै उनको परिवार चलेको छ।
बढ्दो प्रतिस्पर्धालाई ध्यानमा राख्दै अभाव र संकटकै बीच पनि आफ्नी छोरीको शिक्षा उच्चकोटीकै होस् भन्ने उनको सुरुदेखिकै चाहना थियो। त्यसैले, छोरीलाई उनले बोर्डिङ स्कुल भर्ना गरिन्। सामुदायिक विद्यालयको भन्दा केही महँगो भए पनि छोरीको भविष्यका लागि उनले बोर्डिङ नै रोजिन्।
तर बीचैमा छोरीलाई बोर्डिङ स्कुलवाट निकालेर उनले पोखरिया स्कुलमा भर्ना गराइन्। धेरैको मनमा लाग्यो, आर्थिक संकटका कारण निराले छोरीलाई बोर्डिङ पढाउन सकिनन्। निरा भने पैसाभन्दा छोरीको भविष्य हेरेरै बोर्डिङबाट छोरीलाई सामुदायिक विद्यालयमा सारेको बताउँछिन्।
‘केहि महँगो भए पनि सामुदायिक विद्यालयको तुलनामा पढाइ र नतिजा निजी विद्यालयमा राम्रो हुने सोचेकी थिएँ,’ उनले भनिन्, ‘तर, निजी विद्यालयभन्दा राम्रो नतिजा दिन सक्ने सामुदायिक विद्यालय नै पाएपछि अनाहकमा पैसा फाल्न मन लागेन।’
नेपालीसँगै अंग्रेजी माध्यममा पनि पठनपाठन हुन थालेपछि यतिबेला पोखरिया उच्च माविमा छोराछोरी भर्ना गराउने अभिभावकको संख्या बढेको छ। पोखरियामा कक्षा १ देखि १० सम्म अंग्रेजी र नेपाली दुवै माध्यममा पढाइ हुन्छ।
यस वर्ष २ सय ११ जनाको लागि लिइएको प्रवेश परीक्षामा ४ सय ४५ विद्यार्थी सहभागी भएको विद्यालयका प्रधानाध्यापक खेमराज भट्टराईले जानकारी दिए। उनीहरुमध्ये अधिकांश निजी विद्यालयका विद्यार्थी रहेको प्रधानाध्यापक भट्टराई बताउँछन्। कक्षा ६ को ३५ सिटका लागि ५०, ७ को ४६ सिटका लागि १ सय, कक्षा ८ को ६० सिटका लागि १ सय ४६ र कक्षा ९ को ७० सिटका लागि १ सय ४९ जनाले प्रवेश परीक्षा दिएको विद्यालयले जनाएको छ।
अभिभावको आग्रह र सहयोगका कारण विद्यालयमा अंग्रेजी माध्यमको पढाइ सम्भव भएको शिक्षक-कर्मचारीहरु बताउँछन्। ‘अतिरिक्त शिक्षा र भौतिक संरचनाको लागि हामीले अभिभावकसँगै सहयोग लिएका छौं,' प्रअ भट्टराईले भने, 'अंग्रेजी माध्यमको कक्षा ६ देखि ८ सम्मका विद्यार्थीले वार्षिक १० हजार र ९ देखि १२ सम्मका विद्यार्थीले वार्षिक १२ हजार रुपैयाँ शुल्क बुझाउँछन्।’
नगरभित्र पोखरियासँगै राधाकृष्ण, सत्यनारायण, आदर्श मावि, सरस्वती मावि र गोग्राहा माविले समेत अंग्रेजी माध्यममा अध्यापन सुरु गरेका छन्। जसका कारण विराटनगरमा नाम चलेका र महँगो भनेर चिनिएका निजी विद्यालयवाट समेत विद्यार्थी धमाधम सामुदायिक विद्यालयमा भर्ना हुन थालेका छन्।
सामुदायिक विद्यालयले गुणस्तरमा सुधार गरी निजी विद्यालयकै अवस्थामा पुगेको र निजी विद्यालयको व्यवस्थापन र पठनपाठन समेत खस्किँदै गएपछि सामुदायिक विद्यालय नै रोज्नु परेको अभिभावकहरुको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350564.jpg)
-1764146706.png)
