काठमाडौं- कोरोनाका कारण विदेशमा समस्यामा परेका नेपालीहरूलाई स्वदेश फर्काउन थालिएको छ। तर सरकारले स्वदेश फर्कँदा लाग्ने हवाई शुल्कलगायत सबै खर्च व्यक्ति स्वयंले बेहोर्नुपर्ने व्यवस्था गरेको छ।
विभिन्न ३० वटा मुलुकबाट स्वदेश फर्कनका लागि लाग्ने जहाज शुल्क समेत सरकारले निर्धारण गरिदिएको छ। नेपाली श्रमिकहरूको प्रमुख गन्तव्य मुलुक मलेसियाबाट स्वदेश फर्कन सरकारले ५२० अमेरिकी डलर अर्थात् नेपाली रुपैयाँ ६२ हजारभन्दा बढी जहाज शुल्क तोकिदिएको छ।
महिनौंअघि रोजगारी गुमाएर अलपत्र परेका, बिरामी, भिसा अवधि सकिएका तथा खान बस्न समेत समस्या भएका नेपालीहरूले सरकारले तोकिदिएको भाडा शुल्क कसरी बेहोर्ने भनेर चिन्ता व्यक्त गर्न थालेका छन्।
खल्ति रित्तो हुँदा खान बस्न समेत समस्या परेका उनीहरूले स्वदेश फर्कन सामान्य अवस्थाको भन्दा ३ गुणा बढी भाडा तिर्नुपर्ने भएपछि त्यत्रो रकम कहाँबाट ल्याउने भनेर सामाजिक सञ्जालमार्फत आक्रोश पोख्न थालेका छन्।
गोजीमा सुक्को छैन कहाँबाट ल्याउने ६२ हजार ?
पञ्चराम बिसी, मलेसिया
रोजगारी गुमाएर बसेकाहरूलाई एक छाक खान धौधौ छ। गोजीमा सुक्को छैन। कसरी तिर्ने ६२ हजार? यो उद्धार गर्न खोजेको हो कि लुट्न खोजेको? ३ महिनादेखि अलपत्र श्रमिकलाई २ हजार २२० रिंगेटको टिकट किनेर, आफैँ कोरोना परीक्षण गराएको प्रमाणपत्र बोकेर आउ भन्नु कत्तिको सही छ? ६/७ सय रिंगेट पर्ने टिकटलाई २ हजार २ सय २० रिंगेट पर्छ। हामी कसरी आफ्नो देश जानु? के हामी रहरले जान लागेको हो र? नेपाल फर्काउने भनेर सरकारले हामीलाई लुट्न खोजेको? हामीमाथि व्यापार गर्न लागेको हो?
हामीले सित्तैमा लैजाउ भनेको छैन, भाडा पहिलेको जति नै हुनुपर्यो
बलदेव थापा, मलेसिया
बेसिक १२ सय रिंगेटमा दैनिक ८ घण्टा काम गर्दा मासिक ७ सय रिंगेट बचाउने हम्मेहम्मे पर्थ्यो। अनि खान, बस्न, बिजुलि सबै आफैँ तिर्नुपर्थ्यो। अहिले त काम पनि छैन यस्तो अवस्थामा कहाँबाट ६२ हजारको टिकट काट्नु? ३६० रिंगेट तिरेर कोरोना परीक्षण गर्न पैसा कसले दिने? यो सबै तिर्न अब हामीले ४ महिना काम गर्नुपर्छ। यो उद्धारको ब्रह्मलुट कत्तिको जायज हो? यो त उद्धार होेइन व्यापार हो। ७०० रिंगेटको ठाउँमा २ हजार २ सय २० लिनु भनेको चानचुने कुरा होइन।
गोजीमा सुक्को छैन, कहाँबाट ल्याउने ६२ हजार? : राज तामाङ, मलेसिया
टिकट किन यति धेरै महंगो? यसरी नै सरकारको सहयोग कहीँ देखिँदैन। झन समस्या परेको बेला यत्रो टिकटको मूल्य? गोजीमा सुक्को छैन ६२,०००?
यो त लुट हो : दिनेश राई, मलेसिया
यो संकटको घडीमा पनि टिकट शुल्क २ हजार २ सय २० रिंगेट। अनि पिसिआर आफैँले परीक्षण गराउनुपर्ने। त्यसको शुल्क ३ सय ५०, यो त उद्धार होइन सिधै लुट हो।
६२ हजार तिर्न सकिन्न : महेश मगर, मलेसिया
काम नभएको ३ महिना भइसक्यो। बेलुका के खाने भन्ने चिन्ता छ। कहाँबाट तिर्न सकिन्छ टिकट शुल्क ६२ हजार? मलेसियाका लागि नेपाली राजदूत उदयराज पाण्डेले शुक्रबार गैह्रआवासीय नेपाली संघ (एनआरएनए) सँग कुरा गर्दै भाडा महंगो भएको गुनासोको सम्बन्धमा सरकारलाई आफूले जानकारी गराइसकेको बताए।
‘भाडा महंगो भएकाले कम गर्न सकिन्छ कि भन्ने कुरा उठेको छ। तर आधिकारिक जानकारी दूतावाससम्म आइपुगेको छैन,’ राजदूत पाण्डेले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762343742.png)
-1762343022.png)
-1762342797.png)
