काठमाडौं- कोरोना संक्रमणको रोकथाममा सरकार निष्प्रभावी भएको भन्दै युवाहरु शुक्रबार पनि विरोध प्रदर्शनमा उत्रिएका छन्।
लकडाउनको अवधिमा सरकारको काम प्रभावकारी नदेखिएको विरोध प्रर्दशनमार्फत युवाहरुले जनाएका छन्। सामाजिक सञ्जालको सहयोगमा एकत्रित भएका युवाहरुको प्रर्दशन फैलँदै धेरै जिल्लामा पुगिसेकेको छ।
स्वतस्फूर्त रुपमा सडकमा निस्केका युवाहरुले कोरोना परीक्षणका लागि पिसिआर परीक्षणको माग गरेका छन्। अविश्वासी आरडीटी परीक्षण रोक्न उनीहरुको माग छ।
सरकारलाई मेडिकल सामग्री खरिद गर्दा भएको ‘अनियमितता’ समेत युवाहरुले प्रश्न उठाएका छन्। कोरोनाका लागि १० अर्ब खर्च भएको तथ्यांक निकालेको सरकारको आँकडा पारदर्शी नभएको युवाहरुको बुझाइ छ। कोरोनामा खर्च भएको रकम देखाएको सरकारलाई उपलब्धि देखाउन सुझाव दिएका छन्। शान्तिपूर्ण आन्दोलनमा उत्रेका युवाहरुले पारदर्शीता र दूरर्शीतता सरकारमा नदेखिएको प्लेकार्ड बोकेर प्रदर्शन गरिरहेका छन्।
सरकार कोरोना संक्रमण नियन्त्रणमा लाचारी भएको युवाहरुको बुझाइ छ। संकटलाई पार लगाउन सरकारले नसक्ने जनाएका प्रदर्शनकारी युवाले सरकारलाई नै ‘स्यानिटाइज’ गर्न माग गरेका छन्। देशभरका क्वारेन्टाइन आवश्यक मापदण्ड विपरीत रहेको भन्दै युवाहरुले क्वारेन्टाइनलाई ‘कालघर’को संज्ञा दिएका छन्।
‘इनफ इज इनफ’ फेसबुक ग्रुपमार्फत सरकारको विरोधमा उत्रेका युवाले राजनीतिक नारा भने प्रयोग गरेका छैनन्। केही कलाकारले समेत साथ दिएको विरोध प्रदर्शनमा दलका कार्यकर्ताको सहभागिता हालसम्म देखिएको छैन।
युवाहरु आफ्नै खर्चमा प्लेकार्ड बनाई सडकमा उत्रेका छन्। शुक्रबार विरोधमा उत्रेका युवाहरुले सामाजिक दूरी कायम गरी प्रर्दशन गरेका छन्। शान्तिपूर्ण रुपमा जुलुसमा नेपालको झण्डा सहित सहभागी भएका युवाले राष्ट्रिय गीत बजाएर विरोध प्रर्दशन गरेका छन्।
फेसबुकमा बनेको ‘इनफ इज इनफ’ समूहले असार ३ गतेसम्मको विरोध स्थल तय गरिसकेको छ। शुक्रबार उपत्यकका सहित देशका विभिन्न २५ स्थानमा सरकार विरोधी प्रर्दशन हुने भएको छ।
कीर्तिपुरको पाँगा दोबाटो, बसन्तपुर, थानकोट, पेप्सिकोला, पुल्चोक, सल्लाघारी लगायतका स्थानमा युवाहरुले विरोध प्रदर्शन गरेका छन्। काभ्रेको धुलिखेल र पनौतीमा समेत प्रर्दशन भएको छ। बुटबलको चौराहा र गोर्खा सदरमुकाममा समेत विरोधमा युवा उत्रिएका छन्।
शनिबार माइतीघरमा वृहत प्रदर्शन गरिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
