साहित्य डबली

अब तिमी जाग्नुपर्छ [कविता]

किशोरी महत शुक्रबार, जेठ ३०, २०७७ ०२:५१

नेपाललाई स्विट्जरल्यान्ड बनाउँछु भन्नेहरू
चुनाव जितेपछि कहाँ जान्छन्?
माहामारीमा कमिसनको खेती छ
प्रश्न सोध्नेलाई अश्रुग्यास, फोहोरा र लाठी छ
तिम्रो लाचारीले
क्वारेन्टाइनलाई चिहान बनाइरहेको छ सरकार!
अब त अत्ति भयो।

नारी कमजोर हुन्छन् भन्ने सोचहरूलाई
न्युजिल्यान्डले गतिलो झापड हानेका बेला
हाम्री महामहिम नारी
महामारीमा अनगिन्ती इच्छा जारी गर्छिन्
गलैंचा, जिमखाना, हेलिकोप्टरको सवारी खोज्छिन्
प्रश्न गर्न मन लाग्छ,
अब त अत्ति भएन र महामहिमज्यू?

हाम्रो खानामा जडिबुटी होला
त्यसप्रति देशको माटो र शैलीसँग मलाई गर्व छ
तर त्यति मात्र पुग्दैन महाशय! कोरोनासँग लड्न
जडिबुटीले खाएकैले नेपाली बलियो थियो भने
कोरोना किन लागेको?
नियन्त्रणका नाममा अर्बौं खर्च किन गरेको?
तिम्रा उखानटुक्काले सभा हल्लियो, ताली बज्यो
तर बुझ सरकार!
त्यो जनप्रतिनिधिको ताली होइन
कुत्सित इच्छापूर्ति गर्न
तिमीलाई चढाइएको जाहेरी हो।

क्वारेन्टाइनका नाममा किन
झन् जोखिमको घानमा जनता हाल्छौ?
डिप्रेसन लगाइदिने विष किन बाँढ्छौ?
ज्युँदो रहुन्जेल आरडिटी, मरेपछि पिसिआर
अब त यो पनि पचाइसक्यौँ हामीले
वार्षिक तिथिमा सार्वजनिक गर्दिए हुँदैन?

तिम्रा आश्वासन र भाषणमा
बहकिएर मैले दिएको मत फिर्ता देऊ
अब म सचेत भइसकेँ
मेरो मतको अपमान भइसकेछ
अझै नबोले कहिले बोल्ने?
जाग! नेपाली अब जाग्नुपर्छ
कि सरकार जाग्नुपर्छ,
कि तिमी आफै जाग्नुपर्छ
नत्र पुर्खाको प्रश्न तिमीमाथि पर्नेछ
यत्रो अन्याय सहेर किन बस्यौ?
धमिराले झैँ नेताले देश खाएका बेला।