काठमाडौं- विश्व बैंकले नेपालका २ वटा सडक स्तरोन्नति परियोजनाका लागि ४५ करोड अमेरिकी डलर (५४ अर्ब रुपैयाँ) बराबरको सहयोग रकम स्वीकृत गरेको छ। नागढुंगा–नौबिसे–मुग्लिङ र कमला–ढल्केबर–पथलैया सडकखण्ड स्तरोन्नतिका लागि विश्व बैंकले अनुदानका रुपमा उक्त रकम स्वीकृत गरेको हो।
कोभिड १९ महामारीपछिको नेपालको अर्थतन्त्रलाई तंग्रन सहयोग पुगोस् भन्ने उद्देश्यले अन्तरदेशीय सडक संजाल, रोजगारी सिर्जना (खासगरी महिलाका लागि) र सडक सुरक्षाका लागि यो रकम स्वीकृत गरिएको विश्व बैंक कन्ट्री मेनेजर फारिस हदाद जेर्भोसले बताए। ‘कोभिड १९ पछिको अर्थतन्त्र पुनर्स्थापना र जनजीविकालाई उकास्न विश्व बैंकले यो कार्यक्रम ल्याएको हो। यसले सडक सुरक्षा सँगसँगै आन्तरिक तथा व्यापार सहजीकरण र वस्तुको बजारीकरणका लागि पनि सहयोग पुर्याउने छ’ जेर्भोसले भने।
रणनीतिक सडक संजाल तथा व्यापार सुधार साझेदार कार्यक्रमअन्तर्गतको नागढुंगा–नौबिसे–मुग्लिङ र कमला–ढल्केबर–पथलैया सडकखण्ड स्तरोन्नतिबाट नेपालको भारत तथा अन्य मुलुकसँगको वैदेशिक व्यापारमा सहजता आउने विश्व बैंकले जनाएको छ। यो परियोजना विश्व बैंकको ‘इस्टर्न करिडोर कनेक्टिभिटी प्रोग्राम’को हिस्सा हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
