काठमाडौं- स्याङ्जास्थित वालिङ नगरपालिकाले बाँदर भगाउने मेसिनको विकास गरेको छ।
किसानले कृषि उत्पादन भित्र्याउन नपाएपछि नगरपालिकाले तीन वर्षअघिदेखि बाँदर भगाउने यन्त्रको विकास गर्ने तयारी गरेको थियो। गत सातादेखि मेसिनलाई औपचारिक रुपमा सञ्चालनमा ल्याइएको वालिङ नगरपालिकाका मेयर दिलिपप्रताप खाँणले जानकारी दिए।
नगरपालिका भित्रको दुई सय गाउँलाई प्रतिगाउँ एक यन्त्र वितरण गरिने भएको छ। डेढ सय थान मेसिन तयार भएको र केही मेसिन वितरण गरिएको नगरपालिकाले जानकारी गराएको छ।
नि:शुल्क रुपमा मेसिन वितरण गरिएको छ। प्रयोग गर्ने विधि सहित प्रत्येक गाउँलाई मेसिन वितरण गरिने भएको छ। ‘बाँदर आएको बेला पड्काएपछि त्यसपछि २/४ महिना नै बाँदर फर्केर आउँदैन,’ मेयर खाँणले भने, ‘मेसिन प्रयोग गर्दा कार्बोहाइड प्रयोग गरी आवाजले बाँदर भगाइन्छ।’
बाँदर धपाउनका लागि कत्रो आवाज निकाल्ने समेत मेसिनमा निर्धारण गरिएको हुन्छ। मेसिनलाई सतप्रतिशत प्लास्टिक प्रयोग गरी निर्माण गरिएको छ। मेटल प्रयोग गर्न नपाइने हुनाले प्लास्टिक पाइपबाटै मेसिन बनाइएको खाँणले जानकारी दिए।
मेसिन दीर्घकालीन रुपमा प्रयोग गर्न सकिने उनले बताए। छिट्टै मेसिन बिग्रने सम्भावना अत्यन्तै न्यून रहेको खाँणले जानकारी गराए। स्थानीय भवि कोइरालाले मेसिनको विकास गरेका हुन्।
मेसिन किन्नेहरुका लागि ४ हजार रुपैयाँ पर्ने बताइएको छ। अन्य नगरपालिकाले समेत मेसिनप्रति इच्छा जाहेर गरेको उनले बताए। उनले भने, ‘व्यक्तिलाई मेसिन बेचिँदैन। स्थानीय तहबीच सहमति भएपछि मात्रै स्थानीय तहलाई हस्तान्तरण गरिनेछ।’
प्रयोग गर्दा सावधानी अपनाउनु विधि सिकाई दोहोरो सहमति गरी उपलब्ध गराउने नगरपालिकाले जनाएको छ।
गत वर्ष तयार भएको अल्ट्रासाउण्ड प्रविधिको मेसिनले चराचुरुङ्गी समेत भाग्ने भएपछि नयाँ प्रविधि ‘गन प्रविधि’ विकास गरिएको छ। उक्त प्रविधिमा अन्यले आवाज नसुने पनि बाँदरले सुन्ने गरी बनाइएको बताइए पनि चराचुरुङ्गीलाई असर गरेपछि रोकिएको थियो।
बाँदरलाई काममा लगाउने गरी भविष्यमा ‘मंकी ट्रेनिङ कक्षा’ सञ्चालन गर्ने तयारी समेत गरिएको नगरपालिकाले जनाएको छ। थाइल्याण्डबाट दुई प्रशिक्षक झिकाउने मेयर खाँणले जानकारी गराए। बाँदरलाई प्रशिक्षण दिएर फोहोर संकलनमा समेत लगाउन सकिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766294823.png)
-1764146706.png)
-1763721444.png)
