समाचार

सुदूरपश्चिम प्रदेशका कोरोना संक्रमितलाई आयुर्वेदिक औषधि र योगाभ्यास

सेती प्रादेशिक अस्पतालका मेडिल सुपरिटेन्डेन्ट डा हेमराज पाण्डेलाई आयुर्वेदिक औषधि हस्तान्तरण गर्दै आयुर्वेद तथा वैकल्पिक चिकित्सा विभागका प्रमुख डा चेतराज जोशी।

धनगढी- सुदूरपश्चिम प्रदेशमा कोरोना संक्रमितहरूलाई निःशुल्क रुपमा आयुर्वेदिक औषधि वितरण गर्न थालिएको छ।

सुदूरपश्चिम प्रदेशको सामाजिक विकास मन्त्रालय अन्तर्गतको आयुर्वेद तथा वैकल्पिक चिकित्सा विभागले प्रदेशको सेती आयुर्वेदिक औषधालय, महाकाली आयुर्वेदिक औषधालय तथा अन्य सात वटै आयुर्वेदिक औषधालय केन्द्रमार्फत औषधि वितरण गर्न निर्देशन दिएको छ।

त्यस्तै, विभागले आइतबार सेती प्रादेशिक अस्पताल र महाकाली अस्पतालमा आयुर्वेदिक औषधि वितरण गरेको छ। विभागले कोरोना संक्रमितका लागि च्यवनप्रास, अश्वगन्धा पाउडर, तुलसी चिया, गुर्जोको चिया लगायतका सामग्री वितरण गरेको जनाएको छ।

सामाजिक विकास मन्त्रालयको आयुर्वेद तथा वैकल्पिक चिकित्सा विभागका प्रमुख डाक्टर चेतराज जोशीले सेती प्रादेशिक अस्पतालमा ५०, महाकाली २० वटा आयुर्वेदिक औषधी वितरण गरिए र टीकापुर अस्पतालमा १५ वटा औषधी वितरण गर्ने तयारी गरिएको बताए। डाक्टर जोशीले औषधि आपूर्ति व्यवस्था कार्यालयमा थप सामग्री मौज्दात गरिएको बताए।

विभागका प्रमुख डाक्टर जोशीले आयुर्वेद र वैकल्पिक चिकित्सा पद्धतिबाट व्यक्तिको रोग विरुद्ध लड्ने क्षमता विकास गर्दै प्रवर्द्धनात्मक, प्रतिकारात्मक तथा उपचारात्मक विधिमार्फत कोरोना भाइरस संक्रमण रोकथाम तथा नियन्त्रणका सामग्री वितरण गरिएको बताए।

उनले भारतमा आयुस मन्त्रालयले यसलाई प्रयोग गरिरहेको बताए। उनले भारतमा एलोपेथिक चिकित्सहरूले पनि आयुर्वेदिक औषधि सिफारिस गरिरहेको दाबी गरे। उनले भने, ‘प्रदेशका सबै अस्पतालमा आयुर्वेदिक औषधिको प्रयोग र क्वारेन्टाइनमा योगाभ्यासको कार्यअघि बढाइएको छ।‘