काठमाडौं- उद्योगी व्यवसायीहरूले लकडाउनको मोडालिटी परिवर्तन गरी स्वास्थ्य सुरक्षा अपनाई सबै क्षेत्रलाई खोल्नुपर्ने बताएका छन्। लामो समय लकडाउन हुँदा श्रमिक र उद्योगी व्यवसायी सबै समस्यामा परेकाले अब उद्योग व्यवसाय खोल्नुको विकल्प नरहेकोमा सबै क्षेत्रका उद्योगी व्यवसायीहरू एकमत देखिएका हुन्।
उनीहरूले सबैभन्दा पहिला साना तथा मझौला उद्योग र पसल व्यवसायलाई सञ्चालन गर्न सकिने, यातायातका साधनहरूलाई पनि पहिलो प्राथमिकतामा राखेर खोल्नुपर्ने, होटल व्यवसायलाई क्रमशः सञ्चालन गर्नुपर्ने गरी चरणबद्ध र योजनाबद्ध रुपमा सबै क्षेत्रलाई खोल्नुपर्ने बताएका छन्। उद्योगी व्यवसायीहरूले लामो समय लकडाउन भएका कारण हरेक वस्तु तथा सेवा अत्यावश्यक भइसकेकाले तत्काल खोलेर आर्थिक जनजीवनलाई सहज बनाउनुपर्नेमा जोड दिएका हुन्। उत्पादन मुलक उद्योगलाई खोल्ने तर यातायात र पसलहरूलाई नखोल्ने हो भने कुनै अर्थ नहुने भएकाले सबै क्षेत्रलाई प्राथमिकतामा राखेर न्यूनतम स्वास्थ्य सुरक्षाका विधिहरू अपनाई खोल्ने व्यवस्था गर्नुपर्ने उद्योगी व्यवसायीहरूले बताएका छन्।
नेपाल चेम्बर अफ कमर्सका अध्यक्ष राजेशकाजी श्रेष्ठले संक्रमित बढेको र नबढेको क्षेत्रलाई छुट्याएर आर्थिक क्रियाकलापलाई सुचारु गर्नुपर्ने बताए। उनले ७५/७६ दिन लकडाउनमा सबैजना बसिसकेको कारण अब कसरी अगाडि जानुपर्छ भन्ने विषयमा सबैजना जानकार रहेको बताए। उनले अब पनि अर्थतन्त्रलाई चलायमान गर्न नसके कोरोनाबाट नभई भोकमरीले ज्यान जानेको संख्या बढ्ने र अर्थतन्त्र ध्वस्त भएर जाने उल्लेख गरे।
उनले अत्यावश्यक सामान र पसलहरू सबै खोल्नुपर्ने बताएका छन। सरकारले उद्योग खोल्न भनेपनि उद्योगले उत्पादन गरेको वस्तु बिक्री गर्नको लागि बजार समेत खोल्नुपर्ने बताए। उनले पसलहरू बिहान ११ बजेदेखि साँझ साढे पाँच बजेसम्म खोल्ने व्यवस्था गरेमा सडकमा सवारी साधनको चाप कम हुने उल्लेख गरे। मानिसहरूको आवागमनका लागि सवारी साधन जोर बिजोर प्रणालीबाट खोल्नुपर्ने अध्यक्ष श्रेष्ठले बताए। उनले सबै उद्योग व्यवसायीको लगानी महत्वपूर्ण भएकाले सबै क्षेत्र खोल्नुपर्ने राय राखेका छन्।
उद्योग वाणिज्य महासंघका उपाध्यक्ष चन्द्रप्रसाद ढकालले सबैभन्दा पहिला साना तथा मझौला व्यवसायहरू सञ्चालनमा आउनुपर्ने बताएका छन्। उनले साना तथा मझौला किसिमका उद्योग व्यवसायमा सबैभन्दा बढी रोजगारी रहेकोले त्यस क्षेत्रलाई महत्व दिइ सञ्चालन गर्नुपर्ने सुझाव दिए। उनले यातायातको क्षेत्रलाई पनि पहिलो चरणमा नै सञ्चालन गर्नुपर्ने बताए। त्यस्तै सेवा क्षेत्रमा पनि बैंक तथा वित्तीय संस्था र बीमा कम्पनीलाई पूर्ण रुपमा चलाउने र होटल व्यवसायलाई पनि प्यारामिटर बनाएर सञ्चालन गर्नुपर्ने उल्लेख गरेका छन्।
होटल संघ नेपालकी अध्यक्ष सृजना राणाले होटल क्षेत्रमा ब्यांक्वेट बाहेकका सेवा सुचारु गर्न सकिने बताएकी छन्। उनले स्वास्थ्य सुरक्षाका उपायहरू अपनाएर होटल तथा रेस्टुरेन्टहरूलाई सञ्चालन गर्न सकिने जानकारी दिएकी हुन्। होटल तथा रेस्टरेन्टहरूलाई कसरी सेवा दिनुपर्छ भन्ने विषयमा होटल संघले गृहकार्य गरी मापदण्ड तयार पारिसकेको जानकारी दिइन्।
नाडा अटो मोबाइल्स एसोसिएसनका अध्यक्ष कृष्णप्रसाद दुलालले सबै क्षेत्रमा स्वास्थ्य सुरक्षाका आधारभुत विधिहरू अपनाई खोल्नुपर्ने बताए। उनले सरकारलाई आफूहरूले कसरी सावधानी अपनाउन सकिन्छ भन्ने विषयमा १६ वटा बुँदामा लिखित सुझाव दिइसकेको समेत उल्लेख गरे। उनले कार्यालय जाँदा खाजा तथा खाना बोकेर जाने, अनलाइनबाट मात्रै कारोबार गर्ने, कुनै पनि वस्तु पन्जा तथा मास्क लगाएर छुने, स्यानिटाइजरको प्रयोग अधिकतम गर्ने, अफिसमा एसी नचलाउने तथा गोदाममा तीन दिनसम्म सामग्री राखेर मात्रै बिक्री गर्ने व्यवस्था मिलाउने गरी सञ्चालन गर्न सकिने बताए।
यातायात व्यवसायी राष्ट्रिय महासंघका महासचिव सरोज सिटौलाले यातायात क्षेत्रमा काम गर्ने मजदुरलाई स्वास्थ्य सुरक्षासम्बन्धी सामग्री उपलब्ध गराएर यातायात क्षेत्रलाई पहिलो चरणमा खोल्नुपर्ने बताएका छन्। अर्थतन्त्रको रक्तसञ्चार नै यातायात क्षेत्र भएकाले अग्रपंक्तिमा राखेर यसलाई सुचारु गर्नुपर्ने उनले बताए। तर सरकारले यातायात क्षेत्रमा काम गर्ने श्रमिकहरूलाई स्वास्थ्य सामग्री उपलब्ध नगराए यातायात सञ्चालन गर्न अनुमति दिए पनि आफूहरूले सञ्चालन गर्न नसक्ने महासचिव सिटौलाले जानकारी दिए। उनले यातायात क्षेत्रका श्रमिकहरू सुरक्षित नभए संक्रमण तीव्र गतिमा भाइरस फैलन सक्ने भएकाले सरकारले यस विषयमा ध्यान दिनुपर्ने बताए। यातायात व्यवसायीहरूले अन्य कुनै माग नराखेको तर श्रमिकको सुरक्षामा ध्यान नदिई यातायात सञ्चालन गर्न नसकिने उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
