काठमाडौं- लकडाउनसँगै बन्द भएको आन्तरिक उडान असार १७ गतेबाट खुलाउने तयारी भएको छ। कोरोना रोकथाम तथा नियन्त्रण उच्च स्तरीय समितिले समेत आन्तरिक उडान खुलाउने विषयमा तयारी गरेसँगै नेपाल नागरिक उड्डयन प्राधिकरणले पनि आन्तरिक उडान खुलाउने तयारी थालेका हो।
साथै आगामी आइतबारबाटै टिकट बुकिङ समेत खुलाउने तयारी भएको छ। तर, कोरोनाको हटस्पट क्षेत्रमा रहेका विमानस्थलको हकमा भने तत्काल कुनै निर्णय नभएको प्राधिकरण स्रोत बताउँछ।
बैठकमा सहभागी एक सदस्यले भने, ‘पहिलो चरणमा कम जोखिम भएको विमानस्थलको हकमा केही दिन टिकट बुकिङको समय दिने र असार १७ गतेबाट आन्तरिक उडान खुला गर्ने सहमति भएको छ।’
तर, पूर्णरुपमा आन्तरिक उडान खुला गर्ने विषयमा भने तयारी गर्दै जाने सहमति भएको ती सदस्यले जानकारी दिए। तर, प्राधिकरण महानिर्देशक राजन पोखरेलले भने व्यवसायीसँगको छलफलमा यही मितिबाट उडान खाल्ने कुरामा निर्णय नभएपनि कसरी सुरक्षितसाथ उडान सुरु गर्ने भन्ने विषयमा छलफल भएको स्वीकार गरेका छन्।
‘सरकारले हवाई उडान खुल्ला गर्ने निर्णय गरेपछि मात्रै मिति तय हुन्छ,’ पोखरेलले भने, ‘वायुसेवा कम्पनीहरू भने १७ असारदेखि सेवा सुरु गर्न सहमत भएका छन्।’
तर, सबै वायुसेवा कम्पनी, यात्रु तथा विमानस्थल कार्यालयमा खटिने कर्मचारीले सुरक्षा निर्देशिका पालना गर्दै सामाजिक दूरी समेत कायम गराउने गरी उडान गर्ने तयारी भएको हो।
आन्तरिक उडानका लागि आवश्यक सबै सुरक्षा व्यवस्थित गरेर उडान सुचारु गर्ने विषयमा नेपाल नागरिक उड्डयन प्राधिकरणले निजी हवाई सेवा प्रदायकहरुसँग छलफल गरेको छ। प्राधिकरण महानिर्देशक राजन पोखरेलले बुद्ध एयरका मालिक विरेन्द्र बहादुर बस्नेत, श्री एयरका मालिक सुधिर मित्तल र यती एयरका सिइओ उमेश राईसँग आन्तरिक उडान खुला गर्ने विषयमा छलफल गरेका हुन्।
केही दिनअघि मात्रै नेपाल नागरिक उड्डयन प्राधिकरणले प्राधिकरणले आन्तरिक र बाह्य उडान दुवैलाई लक्षित गर्दै कोभिड विशेष सुरक्षा निर्देशिका कार्यान्वयनमा ल्याएको थियो। सुरक्षा निर्देशिकमा प्राधिकरणले हवाई यात्राका क्रममा टिकट र बोर्डिङ पासमात्र लिएर गर्नुपर्ने, यात्रुले कोभिड १९ को स्वघोषणा पत्र भर्नुपर्ने उल्लेख गरेको थियो।
यसैगरी यात्रुले कोभिड चेकचाँज गरे/नगरेको, स्वास्थ्य समस्या भए/नभएको उल्लेख गरेर फर्म भर्नुपर्ने निर्देशिका उल्लेख छ। यसैगरी घोषणापत्रमा झूटा विवरण राखेर हवाई यात्रा गरे कानुनी कारबाही भोग्नुपर्ने गरी सुरक्षा निर्देशिका प्राधिकरणले जारी गरेको थियो।
अन्तर्राष्ट्रिय हवाई यात्रुले भने आफ्नो ट्राभल हिस्ट्रीसमेत खोल्ने निर्देशिकामा उल्लेख छ। यसैगरी जहाज चढ्ने बेला रुघाखोकी, १००.४ वा सोभन्दा माथि फरेनहाइट ज्वरो, सास फेर्न कठिन हुने र स्वाद र बास्ना थाहा नपाउनेजस्ता कोभिड १९ सँग मिल्दोजुल्दो स्वास्थ्य समस्या देखिएमा यात्रुलाई जहाजमा नपठाउने निर्देशिकमा उल्लेख छ।
७० वर्षभन्दा माथि, गर्भवती र गम्भीर स्वास्थ्य समस्याबाट गुज्रिरहेका व्यक्तिलाई समेत सम्भव भएसम्म हवाई यात्रा नगर्न प्राधिकरणले निर्देशिका मार्फत सुझाइएको छ। यसैगरी यात्रा अवधिमा मास्क अनिवार्य लगाउनुपर्ने प्राधिकरणको निर्देशिकमा उल्लेख छ।
साथै आन्तरिक उडानतर्फ इनफ्लाइट क्याटरिङ बन्द गर्ने, सम्भव भएसम्म ट्रली प्रयोग नगर्ने र अतिरिक्त सहायता आवश्यक पर्ने यात्रुले मात्र यसको प्रयोग गर्नुपर्ने प्राधिकरणको सुरक्षा निर्देशिकामा समावेश गरिएको छ। चैत ११ गतेबाट लकडाउन सुरु भएसँगै आन्तरिक उडान बन्द गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767770856.png)
-1764146706.png)
