काठमाडौं- झापाको कमल गाउँपालिकाका स्वास्थ्यकर्मीहरुले आकस्मिक बाहेकका सबै स्वास्थ्य सेवा ठप्प पारेका छन्। स्थानीयहरुले दुर्व्यवहार गरेको भन्दै उनीहरुले शुक्रबारदेखि सबै स्वास्थ्य सेवा ठप्प पारेका हुन्। वडा नं ३ कार्यालय अन्तर्गत स्वास्थ्य शाखामा रहेको कोभिड १९ रोकथाम तथा नियन्त्रण र क्वारेन्टाइन व्यवस्थापनमा खटिएका स्वास्थ्य कर्मचारीहरुलाई स्थानीयहरुले दुर्व्यवहार गरेका थिए।
त्यहाँका स्थानीहरुले बिना अनुमति क्वारेन्टाइन बनाएको, स्वास्थ्यकर्मीहरु वडा कार्यालयमा किन बसेको भन्दै दुर्व्यवहार गरेको स्वास्थ्यकर्मीहरुले बताएका छन्। स्थानीयहरुले मनोबल गिराउने काम गरेको भन्दै गाउँपालिका भित्रका तोपगाछी स्वास्थ्य चौकी, लनखपुर स्वास्थ्य चौकी, केर्खा आधारभूत स्वास्थ्य केन्द्र तथा सिम्ले सामुदायिक स्वास्थ्यचौकीका स्वास्थ्यकर्मीहरुले शुक्रबारदेखि आकस्मिक बाहेकका सबै स्वास्थ्य सेवा ठप्प पारेका हुन्। सुरक्षाको ग्यारेण्टी नभएसम्म काममा नफर्कने उनीहरुले बताएका छन्।
स्थानीयहरुले गाली गलौज गरेको, कुटपिट गर्ने धम्की समेत दिएको स्वास्थ्यकर्मीले जारी गरेको प्रेस विज्ञप्तिमा उल्लेख छ। गाउँपालिकाले भने आन्दोलित स्वास्थ्यकर्मीहरुलाई काममा फर्कन आग्रह गरेको छ। छलफलबाट समस्याको समाधान खोजिने भन्दै गाउँपालिकाले सबै कर्मचारीहरुलाई काममा फर्कन गरेको हो।
स्वास्थ्यकर्मी माथि भएको दुर्व्यवहार गाउँपालिकाले आपत्ति समेत जनाएको छ। स्वास्थ्यकर्मीको मनोबल उच्च राख्न र सुरक्षाको लागि सधै साथमा रहेको गाउँपालिकाले जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।