काठमाडौ- सरकारले लकडाउनको मोडालिटी परिवर्तन गर्न छलफल सुरु गरेको छ। आर्थिक गतिविधिसँगै जनजीवन सामान्य बनाउँन लकडाउनको स्वरूप परिमार्जनका विषयमा छलफल सुरु गरेको हो।
कोरोना भाइरस रोकथाम तथा नियन्त्रण उच्च स्तरीय समन्वय समितिले मंगलबार आर्थिक क्षेत्रसँगै नागरिक समाजका प्रतिनिधिसँग लकडाउनको मोडालिटीका बारेमा छलफल गरेको हो। प्रधानमन्त्री तथा मन्त्रिपरिषद कार्यालयमा भएको छलफलमा लकडाउन मोडालिटीका बारेमा मिश्रित धारणा आएको समितिका संयोजक ईश्वर पोखरेलले बताए।
‘कोरोना भाइरसको संक्रमण बढ्दो छ। मुलुक लकडाउन भएको लामो समय भइसक्यो। आर्थिकलगायत हरेक क्षेत्र प्रभावित छन्।’ पोखरेलले भने, ‘अब जनजीवन सामान्य बनाउन लकडाउनको स्वरूप कस्तो अपनाउने? लकडाउनलाई कसरी परिमार्जन गरेमा आर्थिकलगायत अरु क्षेत्रलाई सहज बनाउन सकिन्छ भन्ने विषयमा छलफल भयो।’ लकडाउनको स्वरूप कस्तो अपनाउने भन्ने विषयमा फाइनल भइनसकेको पोखरेलले बताए। विदेशमा अभ्यास भएका लकडाउन मोडालिटीका विषयमा अध्ययन गरी सरकारले लकडाउन परिमार्जन गर्ने तयारी गरेको छ।
लकडाउनका विभिन्न मोडलमा छलफल चल्दै
सरकारले लकडाउन परिमार्जनका विषयमा विभिन्न मोडलका विषयमा छलफल चलाएको छ। संक्रमितको संख्यालाई आधार बनाएर हरियो, पहेलो‚ रातो निर्धारण गरेर खुला गर्ने कि भन्ने विषयमा छलफल चलेको छ। यस्तै प्रदेश र जिल्लाको संक्रमित संख्यालाई हेरेर लकडाउन खुकुलो बनाउने बारेमा छलफल चलेको छ। आर्थिक, दैनिक उपभोग्य सामग्रीको उत्पादन र वितरणको अवस्थालाई समेत सरोकारवाला निकायसँग छलफल गरी निष्कर्षमा पुग्ने तयारी गरिएको छ।
‘हामीले लकडाउन मोडालिटीका बारेमा विभिन्न क्षेत्रका व्यक्तिसँग छलफल गर्छौं। छलफलबाट एक खालको स्वरूप तयार गर्छौं।’ पोखरेलले भने, ‘लकडाउनको स्वरूपको प्रस्ताव तयार गरी मन्त्रिपरिषदबाट निर्णय गराई कार्यन्वयनमा जान्छौं।’ यस्तै विदेशबाट समेत नेपाली स्वदेश फर्काउने प्रक्रिया सुरु भइसकेकाले थप समस्या आउन सक्ने भन्दै सरकार उत्तिकै त्रसित समेत भएको छ।
प्रधानमन्त्री ओली लकडाउनका विषयमा विज्ञसँग छलफल गर्दै
प्रधानमन्त्री केपी शर्मा ओलीले बुधबार दिउँसो ४ बजे लकडाउनको मोडिलिटीका विषयमा विभिन्न क्षेत्रका विषय विज्ञहरूसँग छलफल गर्ने भएका छन्। प्रधानमन्त्री ओलीले आफ्नै निवास बालुवाटारमा उच्च स्तरीय समितिका संयोजकसहित सदस्यहरूलाई समेत बोलाएर विभिन्न २५ क्षेत्रका विषय विज्ञसँग छलफल गर्न लागेका हुन्।
‘प्रधानमन्त्रीज्यूले आर्थिक, नागरिक समाज‚ चिकित्सक, जनस्वास्थ्यलगायत विभिन्न २५ क्षेत्रका विज्ञसँग लकडाउनको मोडालिटीका विषयमा छलफल गर्नु हुनेछ।’ प्रधानमन्त्रीका सल्लाहकार सूर्य थापाले भने, ‘सबै क्षेत्रका विषयमा विज्ञको सुझावका आधारमा लकडाउनको स्वरूप तयार हुन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
