ऐना बोलिरहेछ, रहस्य खोलिरहेछ
साधा छविमा लुकेको, रंगिन जीवन
छर्लंग पारिरहेछ।
बाल्यकालका खित्का, जवानीको जोश
सम्झेरै रोमाञ्चित भइँदो रहेछ
जीवनको यस अध्यायमा
स्मरण गराउने त खाली ऐना रहेछ।
ऐना बोलिरहेछ, रहस्य खोलिरहेछ
सेता कपालले बोकोका जिम्मेवारी,
चाउरीका रेखामा लुकेका भावनाका बारी
छर्लंग पारिरहेछ।
नराम्रै देखिएता पनि,
टुलुटुलु आँखा जुधाइरहेछ
जीवनको यस अध्यायमा
सुन्दरता नहेर्ने त खाली ऐना रहेछ।
ऐना बोलिरहेछ, रहस्य खोलिरहेछ
धमिला आँखाका अधुरा सपना,
काम्ने हातले खोजीका सहारा
छर्लंग पारिरहेछ।
लाचार देखिएता पनि,
सम्मानपूर्वक हेरिरहेछ
जीवनको यस अध्यायमा
नहेप्ने त खाली ऐना रहेछ।
ऐना बोलिरहेछ, रहस्य खोलिरहछ
धसिएका जुत्ताले थाकेका पाइला,
कुँचिएका लुगाले गुम्सिएका आकांक्षा
छर्लंग पारिरहेछ।
रहस्यहरू जस्ता भएपनि,
एक्लोपनामा साथ दिँदो रहेछ
जीवनको यस अध्यायमा
साँचो बोल्ने त खाली ऐना रहेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
