चीनले महामारीसँगै पाँच प्राथमिकतालाई अघि बढाउने

कोरोना अपडेट

नेपाल लाइभ सोमबार, जेठ १२, २०७७ ०३:०१

बेइजिङ- चीनले कोभिड–१९ विरूद्धको निरन्तर सङ्घर्षसँगै यसका कारण विश्व अर्थतन्त्रमा परेको प्रभावलाई न्यूनीकरणका उपायलाई अघि सार्ने बताएको छ।

चीनले कोभिड–१९ विरूद्धको लडाईंसँगै यस वर्षका लागि विभिन्न पाँच कुटनीतिक प्राथमिकतालाई पनि जोड दिने चिनियाँ राज्य परिषद् सदस्य तथा विदेशमन्त्री वाङ यीले आइतबार नियमित पत्रकार सम्मेलनमा बताएका छन्।

वाङको यो भनाइ चिनियाँ संसदको वार्षिक राष्ट्रिय अधिवेशन चलिरहेको समयमा आएको बताइएको छ।

वाङले भने, ‘चीनले सन् २०२० का प्राथमिकताको कुटनीति घरेलु विकासलाई प्रोत्साहन, राष्ट्रिय चासोहरूको सुरक्षा, अन्य साझेदार मुलुकहरूसँगको मित्रतालाई थप प्रगाढ बनाउने, बहुपक्षीयतामा कडा अडान र अन्तर्राष्ट्रिय समन्वयलाई कोरोनाविरूद्धको लडाइँसँगै सक्रियतासाथ विस्तार गर्ने नीति लिनेछ।’

उनले भने, ‘महामारीको अवधिमा चीन–पाकिस्तान आर्थिक करिडोर ऊर्जा परियोजना, चीन-यूरोप रेललगायत ‘बेल्ट एण्ड रोड’ बिआरआईसम्बन्धी पूर्वाधार निर्माण परियोजना तथा जनताको जीवनसँग घनिष्ट सम्बन्ध भएका परियोजनाहरूले महामारी प्रतिरोधका महत्वपूर्ण भूमिकालाई अघि बढाइनेछ।’

महामारीपछि चीनले सम्बद्ध मुलुकसँगै स्वस्थ रेशम मार्गको निर्माणलाई अघि बढाउँदै उचित समयमा बिआरआई उच्चस्तरीय भिडियो कन्फरेन्सको आयोजना गर्ने पनि उनले बताए। साथै डिजिटल रेशमी मार्गलाई महत्व दिँदै विभिन्न मुलुकको आर्थिक विकासका लागि थप सहयोग गरिनुपर्नेमा पनि उनले जोड दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।