कोरोना अपडेट

झापाको कचनकवल अनि बन्यो कोरोनाको 'हटस्पट'

काठमाडौं- झापाको कचनकवलमा हालसम्म ३३ जनामा कोरोना संक्रमण भएको पुष्टि भइसकेको छ। प्रदेश १ को ३८ प्रतिशत कोरोना संक्रमित कचनकवल गाउँपालिकामा मात्र छन्। सुरुमा प्रदेश १ उदयपुरको भुल्केमा बढी संक्रमित देखिएका थिए। त्यहाँ स्थिति नियन्त्रण उन्मुख देखिन्छ। भुल्केमा पनि ३३ जना संक्रमित भेटिएका थिए।

भारतसँग सीमा जोडिएको झापाको कचनकवल गाउँपालिकामा ४२ हजार जनसंख्या छ। यो गाउँपालिकामा अधिकांश युवा वैदेशिक रोजगारीका लागि भारतमा छन्। भारतमा मजदुरी गर्न गएका उनीहरु फर्कने क्रम शुरु भएसँगै गाउमा पनि कोरोनाको संक्रमण देखिन थालेको गाउँपालिकाकी उपप्रमुख निमसरी राजवंशीले बताइन् ।

गाउँपालिकाका करिब ४ हजार युवा कामको शिलशिलामा भारतमा रहेकोले उनीहरू फर्कन सुरु गरेसँगै जोखिम देखिन थालेको हो। उनका अनुसार अझ पनि भारतबाट युवा फर्कने क्रम जारी रहेकाले संक्रमितको संख्या वृद्धि हुन सक्नेछ। सीमामा कडाइ भएपनि उनीहरु लुकछिपी रातको समयमा गाउँ आउने गरेका छन्।

यसरी गाउँमा आएका युवालाई सकेसम्म क्वारेन्टाइनमा राख्ने गरिए पनि लुकीछिपी नेपाल प्रवेश गर्ने गरेकाले त्यो रोक्न गाउँपालिकालाई असहज भएको उनको भनाइ छ।

कचनकवल गाउँपालिकमा अहिले २ सय ४४ जना क्वारेन्टाइनमा छन्। ‘भारतबाट अझै फर्केने भएकाले थप केही स्थानमा क्वारेनटाइन बनाइरहेका छौँ,' राजवंशीले भनिन्, ‘उनीहरुको परीक्षण र १४ दिनसम्म राख्ने व्यवस्था गर्ने र संक्रमण देखिएमा अस्पताल पठाइने छ।’

कचनकवलले निर्माण गरेको क्वारेन्टाइन।

अहिले सबैभन्दा धेरै कोरोना संक्रमित प्रदेश ५ मा छन्। प्रदेश ५ पछि प्रदेश २ मा बढी संक्रमित भेटिएका छन्। संक्रमित संख्याका आधारमा तेस्रो नम्बरमा प्रदेश १ छ। प्रदेश १ मा ८६ जना कोरोना संक्रमित रहेका छन्। यसमध्ये २६ जना कोरोना जितेर फर्केका छन् भने ६० जना अहिले पनि आइसोलेनमा उपचाररत रहेका छन्।

गाउँपालिकाले शनिबार मात्रै १ सय ३० जनालाई राख्न सकिने क्वारेनटाइन वडा नम्बर ६ को लक्ष्मी माविको दुईतले भवनमा निर्माण गरेको उनले बताइन्। हालसम्म भारतबाट फर्केका १ सय १० जनाको पिसिआर परीक्षण गरिएको छ। यसरी परिक्षण गरेकामध्ये ३३ जनाको रिपोर्ट पोजेटिभ आएको हो। क्वारेन्टाइनमा रहेकामध्ये १ सय २६ जनाको परीक्षणका लागि स्वाब संकलन भइसकेको उपप्रमुख राजवंशीले जानकारी दिइन्।

झापा जिल्लामा हालसम्म ३६ जनामा कोरोना संक्रमण पुष्टि भएको छ।

परीक्षणमा समस्या
उपमेयर राजवंशीले भारतबाट भित्रनेलाई क्वारेनटाइनमा त राखियो तर उनीहरुको परीक्षणका लागि किट अभाव भएको बताइन्। ‘क्वारेनटाइनमा संक्रमित र संक्रमण नभएका सबैलाई सँगै राख्न परेको छ,’ उनले भनिन्, ‘परीक्षण किट नपाउँदा झन् संक्रमण फैलने हो कि भन्ने जोखिम आइपरेको छ।’

केही किट आएकाले आइतबार क्वारेनटाइनमा रहेकोहरुको परीक्षण भएको र उनीहरूको रिर्पोट तीन दिनपछि मात्र आउने भएकाले जोखिम उच्च रहेको उनले बताइन्।

गाउँपालिका कार्यालय।

‘आज पनि भारतबाट केही मानिस आउँदै गरेको जानकारी गाउँपालिकालाई आएकाले उनीहरुलाई अलग्गै राख्ने तयारी गाउँपालिकाले गरेको छ,’ उनले भनिन्, ‘परीक्षण रिपोर्टमा पोजेटिभ आउनेलाई कोशी अञ्चल अस्पताल पठाउने गरेका छौँ। नभएकाहरुलाई १४ दिन राखेर घर पठाउइने छ।’

एक हजार किट माग गरेको तर नपठाइएकाले क्वारेनटाइनमा रहेकाहरुबाट पालैपालो परीक्षण गरिरहेको उनले बताइन्। गाउँपालिकाले पनि केही परीक्षण किट खरिद गरेर परीक्षणको दायरा वृद्धि गर्न लागी परेको उनको भनाइ छ।

अहिले सबैभन्दा धेरै कोरोना संक्रमित प्रदेश ५ मा छन्। प्रदेश ५ पछि प्रदेश २ मा बढी संक्रमित भेटिएका छन्। संक्रमित संख्याका आधारमा तेस्रो नम्बरमा प्रदेश १ छ। प्रदेश १ मा ८६ जना कोरोना संक्रमित रहेका छन्। यसमध्ये २६ जना कोरोना जितेर फर्केका छन् भने ६० जना आइसोलेनमा उपचाररत रहेका छन्।