काठमाडौं- सरकारले अन्तर प्रदेश उडानमा वायुसेवा कम्पनीहरुलाई छुट दिने भएको छ। एक प्रदेशको राजधानीबाट अर्को प्रदेशको राजधानीबाट उडान गर्ने वायुसेवा कम्पनीको हकमा छुट तथा राहत दिने तयारी भएको छ।
संस्कृति, पर्यटन तथा नागरिक उड्डयन मन्त्रालयले आगामी आर्थिक वर्ष २०७७/०७८ को नीति तथा कार्यक्रम र बजेट मार्फत अन्तर प्रदेश उडानमा छुट दिने तयारी गरेको हो। मन्त्रालयले नेपाल नागरिक उड्डयन प्राधिकरणको आग्रहका अन्तर प्रदेश उडानमा छुट दिने तयारी गरेको हो।
मन्त्रालयले अन्तर प्रदेश उडानका लागि वायुसेवा कम्पनीहरुलाई दिने सक्ने छुटको विषयमा अध्ययन गरी अर्थमन्त्रालयमा पठाइसकेको छ।
‘अन्तर प्रदेश उडानमा छुटको तयारी भएको छ,’ संस्कृति, पर्यटन तथा नागरिक उड्डयनमन्त्री योगेश कुमार भट्टराईले भने, ‘अर्थमन्त्रालयबाट स्वीकृति भएको अवस्थामा लकडाउनपछि सुरु हुने आन्तरिक उडानमा लागू हुन्छ।’
अहिले अधिकांश एयरलाइन्स कम्पनीले काठमाडौंलाई नै आधार बनाएर उडान गरिरहेका छन्। बुद्ध एयरले मात्रै पोखरालाई आधार बनाएर चितवन र भैरहवाका उडान गरिरहेको छ। तर, त्यो पनि अन्तर प्रदेश उडान नै हो भने भन्न सकिने अवस्था छैन।
मन्त्रालयले प्रदेशको विराटनगर तथा भद्रपुरबाट सबै प्रदेशको राजाधानी र सबै प्रदेशको राजधानीबाट सबै ठाउमा उडान गर्ने तयारी गरेको छ। यसका आन्तरिक उडानमा रहेको वायुसेवा कम्पनीहरुलाई प्रोत्साहन गर्न काठमाडौं बाहेक प्रदेश राजधानीबाट अर्को प्रदेश राजधानीका विमानस्थलमा उडान गर्दा उडान सुरू गरेको मितिले एक वर्षका लागि ल्यान्डिङ, पार्किङ र नेभिगेसन शूल्कमा छुट दिने तयारी गरेको छ। अन्तर प्रदेश उडानबाट त्रिभुवन अन्तर्राष्ट्रिय विमानस्थलमा रहेको एयर ट्राफिक चाप पनि कम हुने नेपाल नागरिक उड्डयन प्राधिकरणको भनाइ छ।
अन्तर प्रदेश उडानका लागि कतिपय विमानस्थलमा आवश्यक पूर्वाधार निर्माण भइसकेको छ भने कतिपयमा काम भइरहेको प्राधिकरण महानिर्देशक राजन पोखरेल बताउँछन्।
धनगढी, सुर्खेत, नेपालगञ्ज, भैरहवा, पोखरा, विराटनगर, जनकपुर र भद्रपुरबाट अहिलकै अवस्थामा पनि अन्तर प्रदेश उडान हुनेसक्ने अवस्था छ। तत्कालीन संस्कृति, पर्यटन तथा नागरिक उड्डयनमन्त्री स्वर्गीय रविन्द्र अधिकारले पनि उक्त विषय आफू मन्त्री भएदेखि उच्चारण गर्दै आएका थिए।
तर, मन्त्री अधिकारीको ताप्लेजुङामा भएको हेलिकोप्टर दुर्घटनामा परी निधन भएपछि उक्त विषय सुनसानजस्तै भएको थियो। फेरि संस्कृति, पर्यटन तथा नागरिक उड्डयनमन्त्री योगेश भट्टराईले आन्तरिक हवाई क्षेत्रको विकाससँगै पर्यटन प्रवर्द्धनका लागि उक्त विषय नीति तथा कार्यक्रम र बजेटमा राख्ने तयारी गरेका हुन्।
नेपालमा हाल ६ दर्जनको हाराहारीमा विमानस्थल छन्। जसमा ३ दर्जन विमानस्थल कालोपत्र भएको छ। कतिपय विमानस्थलत सञ्चालनमा पनि आउन सकेका छैनन्। सञ्चालनमा रहेका विमानस्थलहरूमध्ये पनि ७ वटा मात्रै विमानस्थल व्यवसायी रुपमा नाफामा छन्।
अहिले नेपालमा ९ वटा फिक्स विङ र ९ वटै हेलिकोप्टर कम्पनीले आन्तरिक उडान गरिरहेका छन्। आन्तरिकमा पनि टंक रुटमा उडान गर्ने ३४ वटा टर्वोपप र जेट जहाज छन् भने स्टोल रुटमा उडान गर्ने १९ वटा जहाज छन्। यसैगरी ३३ वटा हेलिकोप्टर समेत रहेको छ।
साथै मन्त्रालयले आगामी आर्थिक वर्षको नीति तथा कार्यक्रम र बजेट मार्फत टंक रुटमा उडान गर्ने स्टोल रुटमा पनि उडान गर्नुपर्ने अनिवार्य नियम लागू गर्ने भएको छ। अहिले कतिपय एयरलाइन्स कम्पनीले टंक रुटमा मात्रै उडान गरिरहेका छन्। स्टोल रुटमा भने सिता, तार र समिटले मात्रै उडान गरिरहका छन्।
बुद्ध एयरले भने थप ३ वटा नयाँ स्टोल रुटमा उडान गर्ने जहाज ल्याउँदै उडान गर्ने तयारी गरेको थियो। तर, कोराना भाइरसको कारण उक्त योजना केही ढिला गर्ने तयारीमा बुद्ध एयर रहेको छ। सन् २०१९ मा मात्रै आन्तरिक हवाई यात्रा गर्ने यात्रुको संख्या ३१ लाख ८८ हजार ४ सय ८९ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
