नवीनबाबु अधिकारी/रासस
सिन्धुली- सिन्धुलीमा वैदेशिक रोजगारीका लागि सुरक्षित आप्रवासन परियोजना सञ्चालनपछि विदेश पलायन हुने युवाको संख्यामा कमी आएको छ। वैदेशिक रोजगारीलाई सुरक्षित र उपलब्धिमूलक बनाउने उद्देश्यले युवालाई आवश्यक सूचना तथा परामर्श दिएपछि विदेश जाने घटेका हुन्।
सुरक्षित आप्रवासन सूचना तथा परामर्श केन्द्र सिन्धुलीले वैदेशिक रोजगारका लागि जाने युवालाई निःशुल्क सिप तालिम तथा कानुनी सेवा प्रदान गर्दै आएको सुरक्षित आप्रवासन सूचना तथा परामर्श केन्द्रका संयोजक उमा पौडेलले बताए।
सिन्धुलीमा आर्थिक वर्ष २०६८/६९ मा चार हजार ९१८ पुरुष र १७३ महिला तथा आव २०६९/७० मा ६ हजार ६९० पुरुष र ५७५ महिला, वैदेशिक रोजगारमा गएका थिए। आव २०७०/७१ मा हालसम्मकै सबैभन्दा बढी सात हजार ९७३ पुरुष र ६४० जना महिला विदेश पलायन भएका थिए। आव २०७१/७२ मा सात हजार ३२० पुरुष र ३८७ महिला तथा आव २०७२/७३ मा पाँच हजार ३७१ पुरुष र ३४४ महिला पलायन भए। तर, आव २०७३/७४ मा घटेर ६ हजार २६३ पुरुष र ५५३ महिला वैदेशिक रोजगारीमा जान जिल्ला छाडेको सामीको तथ्याङ्कले देखाउँछ।
सिन्धुलीबाट वैदेशिक रोजगारीमा जाने युवामध्ये सबैभन्दा बढी ४५ मलेसिया, २२ साउदी अरेबिया, १९ कतार, १० युएई, दुई कुवेत र अन्य मुलकमा दुई प्रतिशत युवा विदेश पलाएन भएको पनि तथ्याङ्कले देखाउँछ। केन्द्रले युवालाई आवश्यक परामर्श र सूचना प्रदान गर्दा अघिल्ला आर्थिक वर्षको तुलनामा सिन्धुली जिल्लाबाट विदेश पलायन हुने युवाको संख्यामा कमी आएको उनको भनाइ छ। यस परियोजनाले वैदेशिक रोजगारीका लागि प्रोत्साहन तथा निरुत्साहित दुवै नगरी वैदेशिक रोजगारीलाई सुरक्षित बनाउन मात्रै काम गर्दै आएको उनले बताए।
सिन्धुली जिल्लाका नौ वटा स्थानीय तहमै पुगेर परियोजनाले सूचना तथा परामर्श प्रदान गरेको उनी बताउँछन्। यसबाट कमलामाई नगरपालिकामा तीन हजार ९७६, दुधौली नगरपालिकामा तीन हजार ६८, तीनपाटन गाउँपालिकामा दुई हजार ३०१, हरिहरपुरगढी गाउँपालिकामा एक हजार ८०१, मरिण गाउँपालिकामा एक हजार ७२७, सुनकोशी गाउँपालिकामा एक हजार ३४१, घ्याङलेख गाउँपालिकामा एक हजार १६४, गोलन्जोर गाउँपालिकामा एक हजार १४५ र फिक्कल गाउँपालिकामा ८९२ जनाले चालू आवमा वैदेशिक रोजगारीमा जाँदा ध्यान दिनुपर्ने कुराबारे जानकारी पाएको उनले बताए।
अहिलेसम्म परियोजनाबाट २४ हजार ६०३ जना युवाले वैदेशिक रोजगारमा जाँदा ध्यान दिनुपर्ने र चाहिने आवश्यक कागजातलगायत अन्य आवश्यक ज्ञानका बारेमा जानकारी पाएको उनको भनाइ छ। सिन्धुली जिल्लाबाट रोजगारीका लागि विदेश जान चाहने युवाको आप्रवासनलाई सुरक्षित तथा उपलब्धिमूलक बनाउन सहयोग गर्नु परियोजनाको मुख्य उद्देश्य भएको जिल्ला समन्वय समिति सिन्धुलीका वरिष्ठ सामाजिक विकास अधिकृत तथा सुरक्षित आप्रवासन सूचना तथा परामर्श केन्द्रका फोकल पर्सन सागरकुमार ढकालले बताए।
परियोजनाबाट सूचना तथा परामर्श पाएपछि युवाले वैदेशिक रोजगारीका लागि तिरेको रकमको भर्पाइ लिने, जीवन बीमा गराउने, अभिमुखीकरणमा भाग लिने, श्रम स्वीकृति लिएर जाने, कागजात पढेर मात्र हस्ताक्षर गर्ने लगायतका कार्य गर्दै आएको उनले बताए।
उनका अनुसार सिप सिकेर विदेश जान चाहने १२८ जना युवालाई हालसम्म निःशुल्क सिपमूलक तालिम दिइएको छ।
वैदेशिक रोजगारीमा जान चाहने युवामा १५ प्रतिशत निरक्षर युवा हुने गरेका छन्। धेरै संख्यामा युवा वैदेशिक रोजगारीका लागि जानेमा सिन्धुली १३औँ स्थानमा पर्ने उनको भनाइ छ। सिन्धुलीमा परियोजना लागू भएदेखि अहिलेसम्म सूचना केन्द्रमा आएकामध्ये ७०५ जनालाई फोनमार्फत फलोअप गरिएको, फलोअप गरिएकामध्ये १८९ जना विदेश गएको र यसमध्ये १२५ जनाले घरमा कागजपत्रको प्रतिलिपि छाडेका भेटिएको थियो।
अहिलेसम्म १०३ जना वैदेशिक रोजगारीका क्रममा सिन्धुलीका नागरिकको ज्यान गएको तथ्याङ्क छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768538433.png)
-1764146706.png)
