काठमाडौं- निजगढ अन्तर्राष्ट्रिय विमानस्थल निर्माणस्थल वरिपरिको पहुँचमार्ग निर्माणका लागि ४ हजार २ सय ३२ वटा रुख काटिने भएको छ। उक्त कामको लागि वन तथा वातावरण मन्त्रालय अन्तर्गतको सेक्टर वन कार्यालयले स्वीकृत दिने र उक्त प्रस्ताव वन मन्त्रालयलबाट मन्त्रिपरिषदमा तत्काल अगाडि बढाइने भएको छ।
निजगढ अन्तर्राष्ट्रिय विमानस्थल आयोजना निर्माणका लागि अन्तर निकाय समन्वय, सहजीकरण एवं आइपरेका समस्या समाधान गर्न निरन्तर क्रियाशील रहने गरी गठित उच्चस्तरीय सहजीकरण समितिको पाँचौं बैठकले यो निर्णय गरेको हो।
'वन तथा वातावरण मन्त्रालय अन्तर्गतको सेक्टर वन कार्यालय, निजगढद्वारा पहुँच मार्ग निर्माणका निम्ति गणना गरिएका ४ हजार २ सय ३२ वटा रुखहरुको कटान स्वीकृतीका लागि बन तथा वातावरण मन्त्रालयले यथाशीघ्र नेपाल सरकार(मन्त्रिपरिषद्) समक्ष प्रस्ताव पेस गर्ने। साथै विमानस्थल निर्माण क्षेत्रभित्रका रुख तथा पोलहरुको लगत नम्बरिङ कार्य तत्काल अघि बढाउने,' बैठकको निर्णयमा भनिएको छ।
समितिका संयोजक संस्कृति, पर्यटन तथा नागरिक उड्डयन मन्त्री योगेश भट्टराईज्यूको अध्यक्षतामा बसेको सो बैठकले गरेको अन्य ४ निर्णयका साथमा रुख कटानी गरिने निर्णय समेत गरेको हो। समितिको बैठक आइतबार संस्कृति, पर्यटन तथा नागरिक उड्डयन मन्त्रालयमा बसेको थियो।
यस्तो छ पाँच निर्णय
१. निजगढ अन्तर्राष्ट्रिय विमानस्थल आयोजनास्थलमा अवस्थित बस्ती स्थानान्तरणका लागि यस समितिको मिति २०७६ माघ २ गतेको निर्णयानुसार भूमि व्यवस्था, सहकारी तथा गरिबी निवारण मन्त्रालयका सह–सचिवको संयोजकत्वमा संस्कृति, पर्यटन तथा नागरिक उड्डयन मन्त्रालय र नेपाल नागरिक उड्यन प्राधिकरण अन्तर्गत राष्ट्रिय गौरवको आयोजना हेर्ने निदेशक समेतको प्रतिनिधित्व हुने गरी गठन गरिएको कार्यदलले आफ्नो कार्य जिम्मेवारी बमोजिमका कार्यहरु यथाशिघ्र अगाडि बढाइ सोको प्रगति प्रतिवेदन १० दिन भित्र यस समितिसमक्ष पेश गर्ने ।
२. २०७४ भाद्र १९ गते निजगढ अन्तर्रा्ष्ट्रिय विमानस्थल निर्माण क्षेत्रको चार किल्ला वरिपरि सड़क निर्माण, पहुँच मार्ग निर्माण गर्न र सो क्षेत्रमा पर्ने वन क्षेत्रको रुख कटानी गर्ने सम्बन्धमा नेपाली सेना र नेपाल नागरिक उड्डयन प्राधिकरणविच भएको समझदारी पत्रमा उल्लेखित म्याद थप गरी सम्झौतामा उल्लेखित कार्यहरु अगाडि बढाउने।
३. वन तथा वातावरण मन्त्रालय अन्तर्गतको सेक्टर वन कार्यालय, निजगढद्वारा पहुँच मार्ग निर्माणका निम्ति गणना गरिएका ४ हजार २ सय ३२ वटा रुखहरुको कटान स्वीकृतीका लागि बन तथा वातावरण मन्त्रालयले यथाशीघ्र नेपाल सरकार(मन्त्रिपरिषद्) समक्ष प्रस्ताव पेश गर्ने । साथै, विमानस्थल निर्माण क्षेत्रभित्रका रुख तथा पोलहरुको लगत नम्बरीङ कार्य तत्काल अघि बढाउने।
४. विमानस्थल निर्माणको लागि लगानी बोर्डले निश्चित सयम सीमा तोकी जुरिच इन्टरनेशनलसंग सार्वजनिक निजी साझेदारी (पीपीपी) मोडेलको प्रस्ताव माग गर्ने र सम्झौता प्रकृया पूरा गर्ने ।
५. नेपाल नागरिक उड्डयन प्राधिकरणले निजगढ अन्तर्राष्ट्रिय बिमानस्थलको गुरुयोजना निर्माणको खरिद सम्झौता प्रकृया शीघ्र सम्पन्न गर्ने ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
