काठमाडौं– सत्तारुढ नेपाल कम्युनिस्ट पार्टी (नेकपा)का नेता सुवास नेम्वाङले सरकारले सुरुमै कदम चालेका कारण कोरोना संक्रमण धेरै बढ्न नपाएको दावी गरेका छन्। शुक्रबारबाट सुरु भएको संसदको हिउँदे अधिवेशनको पहिलो बैठकलाई सम्बोधन गर्दै नेकपा संसदीय दलको उपनेतासमेत रहेका नेम्वाङले यस्तो दावी गरेका हुन्।
‘सिंगो विश्व कोरोनाविरुद्ध लडिरहेका बेलामा हामीले जुन उपलब्धि हासिल गरेका छौं, त्यो तुरुन्तै यसका विरुद्धमा उत्रिनुको परिणाम हो,’ नेम्वाङले दावी गरे, ‘सिंगो देश यसविरुद्ध एक ढिक्का भएर उभिनुको परिणाम हो।’ कोरोनाविरुद्धको लडाईंमा सिंगो देश एकजुट रहेको र यो सबैको साझा विषय भएको भन्दै उनले प्रतिपक्ष नेपाली कांग्रेसलाई समेत यसका लागि धन्यवाद दिएका थिए।
‘कोरोनाविरुद्धको लडाईंमा सिंगो देश एकजुट छ,’ उनले भने, ‘यो साझा विषय- कोरोनाविरुद्धको लडाईंमा सिंगो देश एक ढिक्का भएर लड्ने विषय हो। यसमा ऐक्यबद्धता जनाएकोमा म प्रमुख प्रतिपक्षीलगायतलाई हाम्रो तर्फबाट धन्यावाद दिन चाहान्छु।’ उनले अप्ठ्यारो अवस्थामा काम गरिरहेका स्वाथ्यकर्मी, सुरक्षाकर्मीलाई पनि धन्यावाद दिए।
कोरोनाविरुद्धको लडाईंलाई संसदको यो अधिवेशनले पनि सम्बोधन गर्नुपर्ने भन्दै त्यसको राम्रो आधार तयार गर्नुपर्ने उनको भनाइ थियो। त्यस्तै उनले कोरोनाको कहरकाबीच पनि संसदमा विचाराधिन रहेका विधेयकलाई अगाडि बढाउनुपर्ने बताए। ‘कोरोनाले धेरै नकारात्मक असर पारिसकेको छ,’ उनले भने, ‘धेरै क्षति पुर्याइसकेको छ। विगतका अधिवेशनमा विचराधिन रहेका कतिपय विधेयकलाई टुंग्याउन कोरोनाका बाबजुत पनि प्राथमिकतमा राख्नुपर्छ।’
श्रमिक र विद्यार्थीलाई पनि यसले असर गरेको भन्दै त्यसको पनि सम्बोधन गर्नुपर्ने उनको भनाइ थियो। ‘नेपाल बाहिर विभिन्न देशमा रहेका हाम्रा नेपालीहरु जो प्रभावित छन्, उनीहरुको समस्या समधान गर्ने कुरा उठेका छन्,’ नेम्वाङले भने, ‘मलाई लाग्छ त्यसमा सरकारको ध्यान गएको छ।’
उनले कुनै पनि सांसदको अपहरणको हुन नहुने कुरामा आफ्नो दल स्पस्ट रहेको भन्दै त्यसको यथार्थ पनि यसै अधिवेशनमा आउने दावी गरे। उनले भने, ‘भएको के हो? यथार्थ के हो? त्यसको यही अधिवेशनमा बाहिर आउला।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787796648.png)
-1787795595.png)
-1786602170.png)
-1786513116.png)
