सिड्नी-कोरोना संक्रमणका कारण आंशिक लकडाउनलाई निरन्तरता दिएको अस्ट्रेलियाले प्रत्येक हप्ता झण्डै २ अर्ब ५० करोड अमेरिकी डलर नोक्सानी व्यहोर्नु परेको जनाएको छ। यस संकटका कारण लाखौं मानिस बेरोजगार पनि भएका छन्।
अस्ट्रेलियाले कोभिड–१९ को प्रसारलाई नियन्त्रणमा ल्याउन निकै सफलता प्राप्त गरेको छ। हाल अस्ट्रेलियाका अधिकांश क्षेत्रमा कोरोना भाइरस संक्रमितको संख्या नगण्य बराबरमात्र छ।
तर क्यानबेरामा आयोजित एक कार्यक्रममा सम्बोधन गर्दै अर्थमन्त्री जस फ्राइडेनबर्गले कोरोना भाइरसको संक्रमण रोक्न सरकारले घोषणा गरेको लकडाउनले मुलुकको अर्थतन्त्रमा ठूलो नोक्सानी भएको बताएका छन्।
हाल जारी प्रतिबन्धहरुले हरेक साता करीब अढाई अर्ब अमेरिकी डलर बराबर नोक्सानी भइरहेको बताउँदै अर्थमन्त्री फ्राइडेनबर्गले आर्थिक क्रियाकलापमा कमि आएको, उत्पादकत्व र उपभोगमा पनि कमि आएको जानकारी दिए।
अस्ट्रेलियाको तथ्यांक ब्यूरोले यसै साता सार्वजनिक गरेको प्रतिवेदनमा पनि रोजगारीमा ७.५ प्रतिशत कटौती हुने उल्लेख छ। करीब एक करोड ३० लाख सक्रिय रोजगारीमध्ये झण्डै १० लाख व्यक्ति बेरोजगार हुनु परेको ब्यूरोको भनाइ छ।
सबैभन्दा बढी प्रभावित होटल तथा पर्यटन क्षेत्रमा झण्डै एक तिहाई व्यक्तिले रोजगारी गुमाएका छन्। कला र मनोरञ्जन क्षेत्रमा २७ प्रतिशत बेरोजगार भएका छन्।
अर्थ मन्त्रालयले यसअघि कोरोना भाइरसका कारण वर्षको मध्यमा बेरोजगारी दर १० प्रतिशत हुने अनुमान गरेको थियो। तथ्यांक ब्यूरोले पनि देशभर करीब ३१ प्रतिशत घरपरिवारको आर्थिक स्थिति कमजोर हुने आँकलन प्रस्तुत गरेको थियो।
अस्ट्रेलियामा कोभिड–१९ बाट संक्रमितको संख्या ६ हजार ८ सयभन्दा बढी रहेको छ र ९६ जनाको मात्र ज्यान गएको छ। अस्ट्रेलियाका सिड्नी र मेलबर्नमा सबैभन्दा बढी कोरोना संक्रमित भेटिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
