काठमाडौं- संयुक्त राष्ट्र संघ (युएन) र विश्व स्वास्थ्य संगठन (डब्ल्यूएचओ)का नेपालस्थित प्रतिनिधिले उपप्रधान तथा रक्षामन्त्री ईश्वर पोखरेलसँग भेट गरी पछिल्लो अवस्थाबारे जानकारी लिएका छन्। भेटमा राष्ट्रसंघका आवासीय प्रतिनिधि भ्यालरी जुलियान्ड र डब्ल्युएचओका प्रनितिधि डा. जोस भ्यालेन्डरले कोरोना भाइरस नियन्त्रणका लागि नेपालले चालेका कदम र पछिल्लो अवस्थाका विषयमा जानकारी लिएका हुन्।
नेपालमा लकडाउनको अवस्था अब कस्तो हुन्छ? लकडाउन कम गर्दै जाँदा त्यसले पर्ने प्रभाव के हुन्छ? भन्ने विषयमा उनीहरुले जिज्ञासा राखेको रक्षा मन्त्रालयले जानकारी दिएको छ।
सरकारद्वारा गठित कोरोना नियन्त्रण तथा रोकथाम उच्चस्तरीय समन्वय समितिका संयोजकसमेत रहनुभएका उपप्रधानमन्त्री पोखरेलले नेपालको अवस्था र चाल्नुपर्ने आगामी कदमहरुको बारेमा जानकारी गराएका थिए। उपप्रधानमन्त्री पोखरेलले कोरोना नियन्त्रणका लागि नेपाल सरकारले उच्च सतर्कता अपनाएको र यसको उचित व्यवस्थापनका लागि आवश्यक सबै प्रबन्ध मिलाएको जानकारी गराएको रक्षा मन्त्रालयका उपसचिव मनोज कुमार आचार्यले बताए।
भेटमा राष्ट्र संघ र डब्ल्यूएचओका प्रतिनिधिले सीमित स्रोत साधनकाबीच कोरोना नियन्त्रणमा नेपालले गरेको प्रयास, क्वारेन्टाइनमा रहेकाहरुको अवस्था र लकडाउनका कारण अत्यावश्यक सामानको उपलब्धताको विषयमा पनि जानकारी लिएका थिए।
भेटमा उनीहरुले कोरोना नियन्त्रणका लागि नेपाललाई आवश्यक सहयोग गर्ने वचन पनि दिएका छन्।
राष्ट्र संघ र डब्ल्युएचओका प्रतिनिधिले क्वारेन्टाइनमा रहेका महिला र बालबालिकालाई व्यवस्थित तरिकाले राख्ने र सकेसम्म होम क्वारेन्टाइनमै राख्न सकिने अवस्थाका विषयमा पनि नेपाल सरकारलाई सुझाव दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
