काठमाडौं– काेराेना भाइरस (कोभिड–१९)का कारण चैत ११ गतेदेखि बन्द अन्तर्राष्ट्रिय हवाई उडान आगामी जुनसम्म चालु गर्न सम्भव नहुने देखिएको छ। सरकारले चैत ११ गतेदेखि लागू गरेको लकडाउनसँगै बन्द भएको अन्तर्राष्ट्रिय उडान सन् २०२० को जुनसम्म चालु हुने अवस्थामा नरहेको सुझाव नेपालको पर्यटन तथा नागरिक उड्डयन क्षेत्रमा परेको असर र यस क्षेत्रको पुनरुत्थानका लागि सुझाव दिन गठित समितिले सरकारलाई दिएको हो।
संस्कृति, पर्यटन तथा नागरिक उड्डयन मन्त्रालयले तत्कालीन सहसचिव घनश्याम उपाध्यायको संयोजकत्वमा गठन गरेको अध्ययन समितिले यस्तो सुझाव दिएको हो। समितिमा नेपाल नागरिक उड्डयन प्राधिकरणका महानिर्देशक राजन पोखरेल र नेपाल पर्यटन बोर्डका प्रमुख कार्यकारी अधिकृत डा धनञ्जय रेग्मी सदस्य थिए।
समितिले अध्ययन गरी प्रतिवेदन संस्कृति, पर्यटन तथा नागरिक उड्डयनमन्त्री योगेश भट्टराई र सचिव केदारबहादुर अधिकारीसमक्ष बुझाएको थियो। मन्त्रालयले पनि उक्त प्रतिवेदनका आधारमा आर्थिक वर्ष २०७७/७८ को नीति तथा कार्यक्रम र बजेटमा समावेश गराउने भन्दै अर्थ मन्त्रालयमा सिफारिस गरेको छ।
समितिले दिएको प्रतिवेदनमा भनिएको छ, ‘कोरोनाको प्रभावका कारण २२ मार्च २०२० पछि अन्तर्राष्ट्रिय हवाई उडानमा उडान प्रतिबन्ध लगाइएको छ। तत्पश्चात विदेशी पर्यटक आगमनको संख्या शून्यमा झरेको छ। सन् २०२० को अप्रिल ३० सम्म आन्तरिक तथा बाह्य उडानमा प्रतिबन्ध लागेको अवस्था कायमै छ। तर, अन्तर्राष्ट्रियस्तरमा पनि जुन २०२० अघि बाह्य उडान चालु हुने अवस्था देखिएको छैन।’
आन्तरिक तथा बाह्य उडानमा लागेको प्रतिबन्धका कारण नेपाल वायुसेवा कम्पनीहरुको १ खर्ब लगानीसमेत जोखिमा छ। त्यस्तै आन्तरिक उडान गर्ने एयरलाइन्सले महिनामा ४ अर्ब गुमाइरहेको उल्लेख गरिएको छ।
हाल नेपालमा ९ फिक्स्ड विङ तर्फका एयरलाइन्स छन् भने ९ वटा हेलिकाेप्टर कम्पनी छन्। ९ एयरलाइन्ससँग ५३ जहाज छन्। त्यस्तै ९ हेलिकाेप्टर कम्पनीसँग ३२ हेलिकाेप्टर छन्। त्यस्तै नेपाल एयरलाइन्स र हिमालय एयरलाइन्ससँग अन्तर्राष्ट्रिय उडान गर्ने वाइडबडी जहाज २ र ६ न्यारोबडी जहाज छन्। यसबाहेक नेपालमा विदेशी २७ वटा एयरलाइन्स कम्पनीले उडान गर्दै आएका थिए। अहिले सबै उडान बन्द छ।
यसैगरी सुझाव प्रतिवेदनमा हवाई तथा पर्यटन क्षेत्र पुनरुत्थानका लागि २० अर्बको कोष स्थापना गर्नुपर्ने भनिएको छ। उक्त कोषबाट निश्चित सर्तभित्र रही सहुलियत दरमा पुनरुत्थान ऋण दिने र जसमा १० अर्ब एयरलाइन्सलाई दिनुपर्ने उल्लेख छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।