काठमाडौं– संघीय संसद सचिवालयका महासचिव भरतराज गौतमले महासचिव पदको सपथ लिएका छन्। सभामुख अग्निप्रसाद सापकोटाले गौतमलाई संघीय संसदको महासचिवको रुपमा पद तथा गोपनियताको सपथ खुवाएका हुन्।
कार्यक्रममा राष्ट्रियसभाका अध्यक्ष, उपाध्यक्ष, संसदीय दलका नेता, सचेतक र समितिका सभापतिहरुको समेत उपस्थिति रहेको थियो।
मनोहरप्रसाद भट्टराईले पाँच वर्षे कार्यकाल समाप्त गरेर अवकाश पाएपछि उक्त पद रिक्त थियो। उक्त पदमा राष्ट्रियसभामा अध्यक्ष गणेश तिमल्सिना र प्रतिनिधिसभाका सभामुख अग्निप्रसाद सापकोटाले संयूक्त सिफारिस गरेका थिए। उक्त सिफारिसपछि राष्ट्रपति विद्यादेवी भण्डारीले गाैतमलाई नियुक्त गरेकी थिइन्।
हाल सचिवालयको वरिष्ठ सचिव रहेका गाैतम २०२३ साल भदौ २३ गते साविक लामाचौर गाविस– ५ कास्कीमा जन्मेका हुन्। गौतमले संसद सचिवालयमा २५ वर्षदेखि सेवा गर्दै आएका थिए।
२०५१ सालमा महान्यायाधीवक्ता कार्यालयमा नायव सुब्बाबाट सरकारी सेवा प्रवेश गरेका गौतमले सोही वर्ष संसद सचिवालयमा शाखा अधिकृत भएका थिए। गौतम २०५९ सालमा उपसचिव, २०६३ सालमा सहसचिव र २०७५ साल असारमा सचिवमा बढुवा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
