भैरहवा– रुपन्देहीको नेपाल–भारत सीमानाका बेलहियामा नेपालको चिनारीसहित बुद्धत्व झल्कने आकर्षक प्रवेशद्वार बनाइने भएको छ। सिद्धार्थनगर नगरपालिकाले १ करोड ५० लाख लगानीमा प्रवेशद्वार बनाउन लागेको हो।
सिद्धार्थनगरको बेलहिया नाका स्थलमार्ग हुँदै सबैभन्दा बढी पर्यटक भित्रिने नाका हो। यहाँ नेपालको दोस्रो ठूलो भन्सार कार्यालय पनि छ। यो नाका हुँदै भारत लगायत तेस्रो मुलुकका हजारौं पर्यटक लुम्बिनी भ्रमणमा आउँछन्। लुम्बिनी आउने अधिकांश पर्यटकले बुद्ध जन्मस्थल प्रवश गर्यौं भन्ने पत्तो समेत पाउँदैनन्। भारतीय गाइडले लिएर आउने भएकाले पनि पर्यटक लुम्बिनी क्षेत्र प्रवेश गरेको पत्तो नपाएका हुन्। पर्यटकलाई नेपाल प्रवेश गरेसँगै बुद्ध जन्मस्थल पुगेको आभास दिलाउन सिद्धार्थनगरले बुद्ध जिवनीमा आधारित रहेर आकर्षक द्वार बनाउने भएको हो।
नगरप्रमुख हरिप्रसाद अधिकारीले भारत लगायत तेस्रो मुलुकबाट आउने पर्यटकलाई अब बेलहियामा आउने बित्तिकै बुद्ध नगरी सिद्धार्थनगर र बुद्ध जन्मस्थल लुम्बिनी प्रवेश गर्दैछौं भन्ने सन्देश दिने आकर्षक द्वार बनाउन लागिएको बताए।
‘हाम्रो उद्देश्य बुद्ध जन्मस्थलसँगै नगरपालिकाको पनि प्रचार–प्रसार गर्नु हो,’ उनले भने, ‘यहाँ आउने हजारौं बौद्धमार्गीले नेपाल प्रवेश गर्ने बित्तिकै बुद्धको सामिप्यतामा आएको महसुस गर्नेछन् र यो सन्देश विश्वभरि फौलाउनेछन्।’ उनले द्वार निर्माणपछि यस क्षेत्रको होटल व्यवसाय समेत फस्टाउने बताए।
‘सिद्धार्थनगरलाई पर्यटकीय हबका रुपमा विकसित गर्नु पनि हाम्रो लक्ष्य हो,’ उनले भने, ‘पर्यटकलाई भारतीय गाइडले नेपाल प्रवेश गरेको थाहौ नदिई लुम्बिनी घुमाएर एकै दिनमा पुनः भारत फर्काउने गरेका छन्। तर, अब द्वारमै बुद्धजन्मस्थल प्रवेश गरेको थाहा पाएपछि धेरै पर्यटकले यहाँ रात बिताउनेछन् र यसले पर्यटन क्षेत्र चलायमान हुनेछ।’
बेलहियामा अहिले पुरानो प्रवेशद्वार छ। उक्त प्रवेशद्वार साँगुरो छ। सडक विस्तारसँगै उक्त प्रवेशद्वार हटाएर सडक विभागले सामान्य गेट बनाउने तयारी थालेको थियो। तर, नगरपालिकाले आफ्नै लगानीमा सन्देशमूलक बुद्धत्व झल्कने गेट बनाउने भएको हो। ‘बुद्ध जिवनीसँग आधारित रहेर द्वार बनाउँदा यसले विश्वका बौद्धमार्गीमा पनि राम्रो सन्देश फैलाउँछ,’ नगरपालिकाकी उपप्रमुख उमा काफ्लेले भनिन्। उनले द्वार नेपालकै नमूना हुने बताउँदै निर्माण भएपछि राष्ट्रिय तथा अन्तर्राष्ट्रियस्तरमा नयाँ आयाम थपिने विश्वास समेत व्यक्त गरिन्।
प्रवेशद्वार ५० मिटर लम्बाई, २३ मिटर ८० सेन्टिमिटर चौडाइ तथा सडकदेखि २९ मिटर अग्लो हुनेछ। द्वारलाई नेपालको चिनारी झल्कने कलात्मक बस्तु, स्वयम्भूको आँखासहितको बुद्ध चिनारी, अशोका, स्तूपा, विभिन्न १२ वटा बुद्ध मूर्ति, हर्निका, आर्च, स्पायर गजूर, हरियाली जोन, नेपाल«को राष्ट्रिय झन्डा, बुद्ध झन्डाले सिँगारिनेछ। यस्तै प्रवेशद्वारमा बौद्ध ध्वनी गुन्ज्यायमान हुनेछ।
‘लामो समयको अध्ययन, सबै क्षेत्रको सल्लाह सुझावमा प्रवेशद्वारको अन्तिम डिजाइन तयार पारिएको हो’, नगरपालिकाका वरिष्ठ इन्जिनियर यमलाल पाण्डेले भने, ‘यसले नेपालको चिनारी र बुद्धको महत्वलाई झन् बढवा दिनेछ।’
द्वारको डिजाइन तयार पार्न नगरपालिकाले नेस्ट डिजाइन आर्किटेक्ट कन्सल्टेन्सी जेभी काठमाडौंलाई छनौट गरेरको थियो। उक्त कन्सल्टेन्सीले नगरपालिकालाई गेटको नमूना तयार पारी हस्तान्तरण गरिसकेको छ। अब टेन्डर आह्वान गरी ढेड महिनाभित्र निर्माण थालिने पाण्डेले बताए। उक्त द्वार २०७५ भित्र सम्पन्न गर्ने लक्ष्य राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766663453.png)
-1764146706.png)
-1766648928.png)
-1763721444.png)
