काठमाडौं- होटल संघ नेपाल (हान) को आइतबार बसेको बैठकले आगामी असोज मसान्तसम्म सम्पूर्ण होटल व्यवसाय बन्द राख्ने निर्णय गरेको छ।
हानका पदाधिकारी, पूर्व अध्यक्ष तथा सदस्य होटलहरुका प्रतिनिधिहरु बीच बसेको बैठकले केही शर्तसहित वैशाख १ गतेदेखि ६ महिना सम्पूर्ण होटल व्यवसाय नखोल्ने निर्णय गरेको हो।
यो अवधिमा कामदारलाई साढे १२ प्रतिशतमात्रै तलब सुविधा उपलब्ध गराइनेछ भने कामदारले त्यसमा असहमति जनाए कटौती प्रकृया सुरु गर्नेसमेत हानले जनाएको छ।
कोभिड-१९ को प्रकोपको असर तथा प्रभावले गर्दा सरकारले घोषणा गरको लकडाउनका कारण पर्यटन उद्योगमा दुरगामी नकारात्मक प्रभावहरु रहिरहने तथा कमसेकम आगामी एक वर्षसम्म पर्यटन उद्योग सुचारु गर्न नसकिने भन्दै हानले यस्तो निर्णय गरेको जनाएको छ।
‘६ महिनाका लागि होटेल बन्द गर्ने प्रस्ताव गरेका छौं। सरकारसँगको छलफलपछि यस विषयमा थप निर्णय हुनेछ। ६ महिनासम्म आधारभूत तलबको १२.५ प्रतिशत तलबमात्रै दिइनेछ। विगतमा मजदुरले पाउँदै आएका सेवा शुल्क भने महिनैपिच्छे दिँदै जानेछाैं।’ हानका वरिष्ठ उपाध्यक्ष विनायक शाहले बताए।
यस्ता छन् संघको बैठकका निर्णयः
१. आगामी असोज मसान्तसम्म होटल व्यवसाय बन्द राख्ने र यसबाट होटल उद्योगमा आश्रित कामदार कर्मचारीहरुलाई पर्न जाने असुविधालाई मध्यनजर गरी उनीहरु तथा आश्रित परिवारहरुको राहतको लागि व्यवस्था गर्ने।
२. होटल संघ नेपालले श्रमिकहरुको व्यवस्थापन गर्ने सम्बन्धमा जारी गरेको सूचना बमोजिम वैशाख १ गतेदेखि नै लागू हुने गरी ६ महिनासम्म प्रत्येक महिना आधारभुत तलबको १२ दशमलव ५ प्रतिशतको दरले हुन आउने रकम उपलब्ध गराउने। साथै सेवाशुल्क उपलब्ध गराउने होटलहरुले श्रमिकहरुले पाउने सेवा शुल्क मौजादबाट प्रत्येक महिना उपलब्ध गराउने।
३. कोरोना भाइरसले सृजना गरेको विषम परिस्थितिमा प्रतिष्ठान र श्रमिक दुवैको हित र भलाइका लागि संघका सदस्य होटेलले श्रमिक युनियन संग एकहप्ता भित्रमा सहमति जुटाउने।
४. १२ दशमलव ५ प्रतिशतका दरले पारिश्रमिक लिन सहमति नभएको अवस्थामा सो असहमत गरेको समयदेखि नै सबै सदस्य होटलले श्रम ऐन २०७४ को दफा १४५ बमोजिम कर्मचारी कटौतीका लागि प्रकिया चलाई आंशिक रुपमा वा पूर्ण रुपमा कर्मचारी कटौती गर्ने।
५. होटलले दिन सहमत गरेको आधारभूत तलबको १२ दशमलव ५ प्रतिशत रकममा नेपाल सरकारले थप गरी श्रमिकलाई तलब भत्ता भक्तानी गर्न जब रिटेन्सन फण्डको व्यवस्था गर्नका लागि होटल संघ नेपाल र टेड युनियनले संयुक्तरुपमा सरकारसँग पहल गर्ने।
६. औद्योगिक सम्बन्धलाई व्यवस्थित गर्ने सम्बन्धमा सरोकार निकाय तथा श्रमिक संगठनहरुको बीचमा आवश्यक छलफल तथा सहकार्यको लागि होटल संघ नेपालले निरन्तर पहल गर्ने।
७. आजको बैठकबाट पारित भएका निर्णयलाई सबै सदस्य होटलले पालन गर्नुपर्नेछ। यदि कुनै सदस्य होटलले संघले गरेको निर्णय पालन नगरी उल्लंघन गरेमा संघ वा सदस्यलाई पर्नजाने हानी नोक्सानी व्यहोर्नुपर्ने र नव्यहोरेमा हानले कानुनी कारबाही चलाउने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
