एजेन्सी- कोरोना भाइरसको संक्रमणबाट गम्भीर बिरामी भएर उपचारका लागि आइसियूमा भर्ना भएको बेलामा चिकित्सकहरूले आफ्नो मृत्युको घोषणाको तयारीसमेत गरेको बेलायती प्रधानमन्त्री बोरिस जोन्सनले खुलाएका छन्। उपचारपछि निको भएर हाल नियमित काममा फर्किएका उनले 'द सन'सँगको विशेष अन्तर्वार्तामा उपचारका क्रममा आइसियूमा रहँदाको आफ्नो स्वास्थ्य अवस्थाको डरलाग्दो क्षणबारे खुलाएका हुन्।
उनले आफूलाई जीवित राख्न चिकित्सकहरूले लिटरका लिटर अक्सिजन दिएकोसमेत बताएका छन्। उनले आफ्नो लागि चिकित्सकहरुले आकस्मिक रणनीतिसमेत बनाएको खुलाएका छन्। चिकित्सकहरुले अवस्था निक्कै खराव भएमा के गर्ने भनेर सबै तयारी गरेको उनको भनाइ छ।
'यो निक्कै कठिन अनुभव हो,' उनले भनेका छन्, 'म यो अस्वीकार गर्दिनँ कि उनीहरु (चिकित्सक)ले मेरो मृत्यु भएमा के गर्ने भन्ने रणनीतिसमेत बनाइसकेका थिए।'
उपचारका क्रममा आफ्नो शरीरको संकेत खराब दिशातिर गएको र कोरोना भाइरसको उपचार सम्भव नभएको अनुभव गरेको उनले बताए।
जुन समयमा उनी अस्पतालको बेडमा जीवन र मृत्युको दोसाधमा थिए त्यो बेलामा यो संकटबाट कसरी पार पाउने भन्ने मात्र सोचाइ आएको अन्तरवार्तामा उनले खुलाए।
'केही दिनमै मेरो स्वास्थ यसरी सीमा नै नाघेर खराब भयो भन्नेमा विश्वास गर्नै गाह्रो थियो,' उनले भने, 'म फ्रस्टेड भइसकेको थिएँ। म किन निको भइरहेको छैन भन्ने बुझ्नै सकेको थिइनँ।'
स्वास्थ्य निक्कै जटिल भएपछि चिकित्सकहरूले उनको स्वासनलीमा ट्युब हालेका थिए। त्यसपछि उनको जोखिम ५०-५० भएको थियो। चिकित्सकहरुको मेहनतका कारण आफ्नो स्वास्थ्य अवस्थामा सुधार आएको र अहिलेको अवस्थामा आएको भन्दै उनले आफ्नो दोस्रो जीवनका लागि चिकित्सक र स्वास्थ्यकर्मीलाई धन्यवाद दिए।
'यो कसरी सम्भव भयो मलाई नै थाहा छैन,' लामो सास लिँदै उनले भने, 'अहिले हेर्दा यो निक्कै रोमाञ्चक लागिरहेको छ।'
बेलायतमा कोरोना भाइरस संक्रमण फैलने गति उच्च भइरहेकै बेला मार्चको अन्त्यतिर ५५ वर्षका जोन्सन आफै संक्रमित भएका थिए। संक्रमण भएको खुलेपछि उनी सेल्फ आइसोलेसनमा बसेका थिए। आइसोलेसनमा बस्दा उनको स्वास्थ्य अवस्था ठिकै थियो। उनी डिजिटल मिटिङमार्फत सरकारी गतिविधिमा सक्रिय नै थिए। एकाएक स्वास्थ्य खराव भएपछि उनलाई अस्पताल लगिएको थियो।
'म अस्पताल जान चाहन्नथेँ तर उनीहरुले कर गरेपछि म सेन्ट थोमस अस्पताल जान राजी भएँ,' उनले भने' त्यो बेलामा मलाई त्यति ठिक लागेको थिएन। तर उनीहरुले अस्पताल जान मलाई कर गर्नु ठिक रहेछ।'
अस्पताल लगेपछि उनलाई नाकबाट अक्सिजन दिन शुरु गरिएको थियो। तर त्यतिले मात्र उनको श्वासप्रश्वासमा सुधार नआएपछि ठुलो फेसमास्कसहित अक्सिजनको मात्रा बढाइयो। यतिले मात्र उनको अवस्थामा सुधार नआएपछि उनलाई आइसियूमा भर्ना गरिएको थियो।
'उनीहरुले मलाई आइसियूमा लगेपछि मेरो अवस्था गम्भीर भएको महसुस गरेँ,' उनले भनेका छन्, 'मैले मेरो नाडी भाँचेको छु, नाक भाँचेको छु। औंला भाँचेको छु। तर मैले यत्तिको गम्भीर कहिल्यै अनुभव गरेको थिइनँ।'
तीन रात अस्पतालको आइसियूमा राखेपछि स्वास्थ्यमा सुधार भएर उनी जनरल वार्डमा फर्किए। भेन्टिलेटर बिना जनरल वार्डमा बस्दा आफूलाई निक्कै भाग्यमानी अनुभव गरेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1786602170.png)
