काठमाडौं- बागमती प्रदेशले कक्षा १० को एसइई र कक्षा ११ को परीक्षा नलिए पनि हुने विकल्प अगाडि सारेको छ। प्रदेशका सामाजिक विकासमन्त्री युवराज दुलालले विद्यालय तहको अन्तिम परीक्षा १२ भएकाले अन्य परीक्षा राष्ट्रियस्तरमा गर्नु नपर्ने बताएका हुन्।
शिक्षा पत्रकार समूहले कोरोना प्रभाव र बागमती प्रदेशले शिक्षा व्यवस्थापनका लागि गरेको तयारीबारे सामाजिक विकासमन्त्री दुलालसँग बिहीबार गरेको भर्चुअल प्रेस मिटमा मन्त्री दुलालले परीक्षा नलिएपनि हुने बताएका हुन्।
कक्षा १२ को परीक्षा लकडाउन खुलेपछि विद्यालयलाई होम सेन्टर मानेर सञ्चालन गर्नुपर्ने पक्षमा प्रदेश रहेको भन्दै मन्त्री दुलालले यही सुझाव आफूले शिक्षा, विज्ञान तथा प्रविधिमन्त्रीलाई समेत दिएको बताए।
विद्यालय तहका सबै पाठ्यपुस्तक विद्यालयले नै व्यवस्थापन गरी विद्यार्थीको घरघरमा पुर्याउने तथा कक्षा ६ देखि १०सम्मका अङ्ग्रेजी, गणित र विज्ञान विषयका कक्षाहरु रुटिन मिलाएर स्थानीय एवं केन्द्रीय टेलिभिजनबाट सञ्चालन गर्नुपर्ने सुझाव शिक्षामन्त्री समक्ष राखेको उनले जानकारी दिए।
केही विषयका शिक्षण सिकाइ स्थानीय एफएम रेडियोमार्फत सञ्चालन गर्ने र स्थान र परिवेशअनुसार अनलाइन र अफलाइनमार्फत् सिकाइका अवसरहरु प्रदान गर्ने विकल्पबारे पनि प्रदेशले तयारी गरेको उनको भनाइ छ।
अनलाइनको पहुँच सबै स्थानमा नपुगेको र यसका लागि चाहिने उपकरणको व्यवस्थापन सजिलो नभएकाले पुरै अनलाइन शिक्षामा जान नसकिने भएकाले विभिन्न दूर शिक्षाका विधिहरु अपनाउनुपर्ने प्रदेशको दृष्टिकोण रहेको मन्त्री दुलालले स्पष्ट पारे।
लकडाउनपछि दूर्गम र विकट क्षेत्र‚ जहाँ बाहिरी व्यक्तिहरुको आगमन हुँदैन त्यस्ता स्थानहरू पहिचान गरेर जिल्ला विपद व्यवस्थापन समितिसँगको समन्वय र स्वास्थ्य कार्यालयको सिफारिसमा स्थानीय तहबाट विद्यालय खोली विद्यार्थी संख्याका आधारमा आलोपालो गरी अध्ययन अध्यापन गर्न सहजीकरण गर्न सकिने पनि मन्त्री दुलालको भनाइ छ।
‘विश्वबाटै कोरोना भाइरसको महामारी अन्त्य नभएसम्म वा औषधी पत्ता नलागेसम्म लकडाउन सकिएपनि तत्काल विद्यार्थी उपस्थित गराएर विद्यालय सञ्चालनको वातावरण बनिहाल्दैन‚’ मन्त्री दुलाले भने, ‘यसैकारण स्थायी समाधान नहुँदासम्म सरकारले वैकल्पिक बाटो अपनाएर जानुपर्छ।’
मन्त्री दुलालका अनुसार बागमती प्रदेशले विभिन्न पक्षहरुसँगको छलफल र सुझावका आधारमा प्रदेशभरीको शैक्षिक गतिविधिमा एकरुपता गर्न र सिकाइ क्रियाकलापलाई निरन्तरता दिन पत्रचार मार्फत स्थानीय तहहरुसँग समन्वय गरिहेको छ।
प्रदेश सरकारले निर्णय गरी वैकल्पिक माध्यमबाट नतिजा प्रकाशन र भर्ना सुरु गर्न, विद्यार्थीहरुलाई पाठ्यपुस्तक उपलब्ध गराउन स्थानीय तहहरुलाई पत्राचार गरिएको छ।
पाठ्यपुस्तक ढुवानी र वितरणलाई सहज बनाउने, नियमित कक्षा सञ्चालन नहुँदासम्म बालबालिकालाई घरमै बसेर सिक्ने अवसर सुनिश्चित गर्न राष्ट्रिय तथा स्थानीय सञ्चार माध्यमबाट प्रशारण भइरहेको दूर शिक्षा कार्यक्रम तथा अन्य वैकल्पिक अनलाइन, अफलाइन सिकाइका अवसरमा सहभागी गराउने व्यवस्था मिलाउन पत्रचार गरिएको जानकारी दिँदै मन्त्री दुलालले प्रदेशले केन्द्रबाट दूर शिक्षाका सामग्री ल्याएर विद्यार्थीसम्म पुर्याउन प्रयास गरिरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
