नेकपा शीर्ष नेतृत्व जोड्न दोस्रो तहका नेता सक्रिय

राजनीति

डिबी खड्का मंगलबार, वैशाख १६, २०७७ १८:२९

काठमाडौं- नेपाल कम्युनिस्ट पार्टी (नेकपा)मा शक्ति सन्तुलनको तराजु बिग्रिएको छ। नेकपा अध्यक्ष तथा प्रधानमन्त्री केपी शर्मा ओली तराजुको एकापट्टी छन् भने अर्का अध्यक्ष पुष्पकमल दाहाल प्रचण्ड, वरिष्ठ नेता माधवकुमार नेपाल, बामदेव गौतमलगायत अर्कापट्टी छन्। प्रधानमन्त्री ओलीको योजना कार्यान्वयन हुन्थ्यो भने समाजवादी पार्टी यतिबेला फुटको संघारमा हुन्थ्यो। तर अरुलाई फुटाउन राखेको अध्यादेशरुपी हतियार आत्मघाती भएको छ। नेकपा आफैं संकटमा फसेको छ।

शीर्ष नेताहरुबीच नै आइरहेको दरारलाई झन् फैलाउँदै गइरहेका छन् नेकपाको दोस्रा तहका केही नेता। तर केही भने फेबिकोल बन्ने प्रयास गरिरहेका छन्। तीमध्ये अग्रपङ्तिमा छन्, प्रदेश ५ का मुख्यमन्त्री शंकर पोखरेल। गुटका हिसाबले ओली पक्षका उनी यतिबेला काठमाडौंमा छन् र नेताहरुबीचको तीतो बढ्न नदिन भरमग्दुर प्रयास गरिरहेका छन्।

उनी नेताहरूलाई भेटेर पदको लोभबाट मुक्त हुन आग्रह गरिरहेका छन्। पार्टीमा शक्ति सन्तुलन र भागबन्डा मिलाउनु परे आफू मुख्यमन्त्री पदबाट राजीनामा दिने घोषणा गरेका छन्। उनले भनेका छन्, 'पार्टी एकतालाई सफल बनाउन म मुख्यमन्त्री पदबाट राजीनामा दिन तयार छु।'

पार्टी एकता जोगाउन विश्वास र सहकार्यको वातावरण तयार पार्न सबं नेता तथा कार्यकर्तालाई उनले आह्वान गरेका छन्। 'आपसी कटाक्ष र टिप्पणी बन्द गरौं। मिले जितिन्छ, झै-झगडाले नासिन्छ, गम्भीर बनौं,' उनले भने। सबै भन्दासंयम हुनुपर्ने ओली पक्षकै नेता कार्यकर्ताले रहेको अवगत प्रधानमन्त्री ओली र उनी निकटस्थ नेताहरुलाई गराएका छन्। उनी सक्रिय भएदेखि टर्रो बोल्ने प्रधानमन्त्री ओली निकटस्थ नेताहरु चुप रहेका नेकपाका एक सांसद बताउँछन्।

पार्टी एकताको मूलमर्म सहमति र सहकार्य भएकाले लाखौं कार्यकर्ताको भविष्य जोडिएको पार्टी एकता जोगाउन नेतृत्व गम्भीर र जिम्मेवार हुने उनको अपेक्षा छ। उनको भावनाको नेकपाका नेताहरुले नै प्रशंसा गरिरहेका छन्। नेकपाकी सचेतक शान्ता चौधरी, सांसद महेश बस्नेतलगायतले उनको भनाइ आफ्नो फेसबुक मार्फत् आम नेता कार्यकर्ता माझ पुर्‍याइरहेका छन्। यसैगरी परराष्ट्र मन्त्री प्रदीप ज्ञवाली पनि नेताहरुलाई नजिक ल्याउन सक्रिय छन्। नमिलेका विषयमा आपसी छलफल गर्न र एकअर्काप्रति लचिलो भएर अगाडि बढ्न सुझाइरहेका छन्।

यसैगरी पूर्व माओवादी पक्षका नेताहरु पनि सकेसम्म शीर्ष नेताहरुको मनमुटाव टुंगियोस् भन्ने चाहन्छन् र आफूहरु एकताकै पक्षमा रहेको सन्देश दिइरहेका छन्। नेकपा स्थायी समिति सदस्य टोपबहादुर रायमाझी, मन्त्री लेखराज भट्ट, स्थायी समिति सदस्य देवेन्द्र पौडेल पनि मिल्नु नै अहिलेका लागि उत्तम रहेको बताइरहेका छन्। उनले भने, 'प्रधानमन्त्री कार्यशैली सुधार्न दबाब दिनुपर्ने भएपनि विभाजनको तहका कुरा गर्न नहुने सुझाव हामीले दिइरहेका छौं।'

यसैगरी नेकपा नेता दीननाथ शर्मा पार्टीका समस्या मन माझेर सल्टाउनुपर्ने पक्षमा छन्। कार्यकारी अध्यक्ष प्रचण्डनिकट रायमाझी पार्टी फुटको तयारीमा लाग्ने समय नरहेको बताउँछन्। प्रधानमन्त्री ओली विरुद्ध प्रचण्ड-नेपाल समूहले हस्ताक्षर अभियान चलाउने विषयको समेत उनी विरोधमा रहेको बुझिएको छ।

मन्त्री लेखराज भट्टले पनि पार्टी विभाजन गर्न नहुने मत जाहेर गर्दै शक्ति सन्तुलन र पद मिलाउनु परे आफू त्याग गर्न तयार रहेको जनाउ दिएका छन्। अध्यक्ष पुष्पकमल दाहाल प्रचण्डलाई उनले प्रधानमन्त्री ओलीको कार्यशैलीका विषयमा समीक्षा गरेपनि पार्टी एकतालाई कायम राख्न सुझाएको बुझिएको छ।

यसैगरी, नेकपाका केन्द्रीय सदस्य र अन्य कार्यकर्ता पनि शीर्ष नेताहरुबीच भइरहेको मतभिन्नतालाई आत्मसमीक्षाबाट टुंग्याउनुपर्ने पक्षमा सामाजिक सञ्जाल मार्फत् दबाब दिइरहेका छन्।

नेकपा संसदीय दलकी सचेतक शान्ता चौधरी आफूहरु भूइँमा बस्न तयार रहेको तर सरकार ढाल्ने र पार्टीमा विभाजन ल्याउने खेलमा नेताहरुलाई नलाग्न सुझाउँछिन्। 'हामीलाई पदको कुनै पर्वाह छैन, सरकार परिवर्तन गरौंला भनेर मत मागेको पनि होइन। भुइँमा बस्न तयार छौं। एकताबद्ध पार्टी निर्माणमा आफ्नो तर्फबाट जस्तोसुकै बलिदान गर्न तयार छौं,' उनले भने।