काठमाडौं- पाकिस्तानकी पूर्वकप्तान साना मिरले आफ्नो अन्तर्राष्ट्रिय क्रिकेट करिअरबाट सन्यास लिएको घोषणा गरेकी छिन्।
पाकिस्तानका सबैभन्दा उत्कृष्ट खेलाडीको परिचय दिएकी सानाले १५ वर्षे अन्तर्राष्ट्रिय क्रिकेट करिअरबाट विश्राम लिएकी हुन्। पाकिस्तान महिला क्रिकेट टिमबाट सानाले २००५ मा डेब्यु गरेकी थिइन्।
अलराउण्डरको भूमिकामा उदएकी उनले एक सय २० एकदिवसीय खेलमा एक सय ५१ विकेट लिएकी छिन्। उनको एभरेज २४.२७ छ। त्यस्तै एक सय ६ टि–२० अन्तर्राष्ट्रिय क्रिकेट खेलबाट ८९ विकेट लिँदा उनको एभरेज २३.४२ छ। त्यस्तै उनले ब्याटिङतर्फ एकदिवसीय खेलमा एक हजार ६ सय ३० रन बनाउँदा टि–२० मा ८ सय २ रन बनाएकी छिन्।
२०१९ को नोभेम्बरदेखि साना राष्ट्रिय महिला क्रिकेट टिममा थिइनन्। पकिस्तानी महिला टिम इंग्ल्यान्ड टुरमा जाँदा टिममा नपरेकी साना यही वर्ष अष्ट्रेलियामा भएको आइसिसी महिला टि-२० विश्वकपमा पनि उनी परेकी थिइनन्। खराब लयका कारण टिम बाहिर रहेकी उनले दर्शक बनेरै विश्वकप हेर्नु परेको थियो।
सन्यास लिँदै सानाले भनेकी छिन्, ‘मेरो परिवारलाई धेरै धन्यवाद दिन चाहन्छु। त्यस्तै जसले मलाई कठिन परिस्थितिमा पनि सहयोग गर्नु भएको छ। पाकिस्तानको नेतृत्व गर्दै विश्व स्टरमा पुग्ने मेरो सपनालाई साकार पार्न जसले सहयोग गर्नु भएको छ, उहाँहरुलाई धेरै धेरै धन्यवाद।’
दुई गोल्ड मेडलदेखि शीर्ष बरियतासम्म
एकदिवसीय क्रिकेटमा पाकिस्तानका लागि साना सर्वाधिक विकेट लिने खेलाडी हुन्। त्यस्तै टि-२० अन्तर्राष्ट्रिय क्रिकेटमा निदा दरपछि सर्वाधिक रन बनाउने दोस्रो खेलाडी हुन्। उनी सर्वाधिक सफल भएकी वर्ष २०१४ हो। यो वर्ष उनले ११ एकदिवसीय अन्तर्राष्ट्रिय क्रिकेटमा २१ विकेट लिएकी थिइन्।
साना त्यस्ता खेलाडी खेलाडी हुन्। जसले पाकिस्तानलाई दुई पटकसम्म गोल्ड मेडल दिलाएकी छिन्। सन् २०१० र २०१४ मा भएको एसियन गेम्समा पाकिस्तानलाई सानाले दुई वटा गोल्ड मेडल दिलाएकी छिन्। सन् २०१८ मा उनी एकदिवसीय क्रिकेटको विश्व बरियतामा शीर्ष स्थानमा भइरहिन्।
पाकिस्तानका लागि उनले एकदिवसीय क्रिकेटमा ७२ खेलमा कप्तानीको भूमिका निभाएकी छिन्। जसमा पाकिस्तानले २६ खेलमा जित हात पारेको छ भने ४५ खेलमा हार ब्यहोरेको छ। त्यस्तै, टि-२० क्रिकेटमा ६५ खेलमा कप्तानीको भूमिका निभाउँदा पाकिस्तानले २६ खेलमा जित र ३६ खेलमा हार ब्यहोरेको छ।
उनलाई टि–२० कप्तानबाट सन् २०१६ को आईसिसी महिला टि–२० विश्वकपपछि हटाइएको थियो। त्यस्तै एकदिवसीय कप्तानबाट पाकिस्तान क्रिकेट बोर्ड (पिसिबी) ले सन् २०१७ मा उनलाई हटाएको थियो।
सानाको सन्यासपछि पिसिबीका सिइओ वासिम खानले उनको संघर्ष र सफलता युवा खेलाडीको लागि प्रेरणाको स्रोत बन्ने बताएका छन्। सिइओ खानले भनेका छन्, ‘म साना मिरलाई सफल क्रिकेट करियर बनाएकोमा बधाई दिन चाहन्छु। लामो समय उनले पाकिस्तान महिला क्रिकेटको लागि योगदान दिइन्। उनको योगदान र सफलता हाम्रा युवा खेलाडीका लागि प्रेरणाको स्रोत बन्नेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786379871.png)
-1764146706.png)
-1786184812.png)
