कैलाली-कैलालीमा एक शिक्षक मृत फेला परेका छन्। जिल्लाको गौरीगंगा नगरपालिका ९ मसुरियामा रहेको बिहानी क्षितिज बोर्डिङ स्कुलका प्रिन्सिपल कृष्ण भुसाल मृत फेला परेका हुन्।
गौरीगंगा नगरपालिका ९ बस्ने ४० बर्षीय भुसाल पूर्व-पश्चिम राजमार्गको पहलमानपुर बजारबाट एक किलोमिटर पश्चिम मृत फेला परेका हुन्। जिल्ला प्रहरी कार्यालय कैलालीका प्रहरी नायब उपरीक्षक दक्षकुमार बस्नेतले बिहीबार राति साढे १० बजे उनको शव पूर्व-पश्चिम राजमार्गको किनारमा फेला परेको बताए।
उनले घटनाबारे जानकारी आएपछि प्रहरी टोली घटनास्थल पुगेको बताए । मृतकको आँखा, मुख र घुँडामा चोटपटक देखिएको बताउँदै प्रहरी नायब उपरीक्षक बस्नेतले घटनास्थलमा ईलाका प्रहरी कार्यालय मालाखेतीका प्रहरी नायब उपरिक्षक ज्ञानवहादुर विष्टको टोली पुगेर अनुसन्धान थालेको बताए
बिहीबार साँझ एक साथीले बोलाएपछि उनी मसुरियाबाट ८ किलोमीटर पूर्वतर्फ रहेको पहलमानपुर बजारतर्फ गएका थिए। पहलमानपुरको एक होटेलमा साथीसँगै मदिरा सेवन गरेपछि भुसाल राति ८:३० बजेतिर जङ्गलको बाटो हुँदै साइकलमा घर फर्कदै गर्दा उक्त घटना भएको प्रहरीले जानकारी दिएको छ।
अनुसन्धानका लागि भन्दै प्रहरीले साथीसहित होटल संचालकलाई समेत नियन्त्रणमा लिएको छ । भुसाल एनप्याब्सनका केन्द्रीय उपाध्यक्षसमेत रहिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
