सुदूरपश्चिममा ८६ सय बढीको कोरोना परीक्षण, ८० जनाको रिपोर्ट आउन बाँकी

कोरोना अपडेट

ललित बोहरा सोमबार, वैशाख ८, २०७७ २०:०५

डडेल्धुरा- सुदूरपश्चिम प्रदेशमा ७० दिनको अवधीमा ८ हजार ६ सय बढीको कोरोना परीक्षण गरिएको छ। फागुन १ गतेदेखि कोरोना परीक्षण सुरु भएकोमा अहिलेसम्म ८ हजार ६ सय ९४ जनाको कोरोना परीक्षण भएको समाजिक विकास मन्त्रालयले नियमित गर्ने पत्रकार सम्मेलनमा बताएको छ। सुदूरपश्चिम प्रदेशमा ८ दिनयता कोरोना संंक्रमितको संख्या भने स्थिर रहको छ।

पछिल्लो पटक कैलालीको लम्कीचुहा नगरपालिका-१ कि ६५ वर्षीया महिलामा कोरोना संक्रमण देखिएकोमा त्यसयता कसैमा पनि कोरोना पुष्टि भएको छैन। सुदूरपश्चिमबाट संकलन गरिएका ८ हजार ७ सय ७४ जनाको थ्रोट स्वाब र रगतको नमूनामध्ये अहिलेसम्म पिसिआर विधीबाट दुई हजार ५ सय १७ र र्‍यापिड टेस्ट विधीमार्फत ६ हजार एक सय ७७ जनाको परीक्षण गरिएको छ। ८० जनाको रिपोर्ट भने आउन बाँकी मन्त्रालयले जनाएको छ।

प्रदेश स्वास्थ्य आपतकालीन केन्द्रंका अनुसार सोमबारसम्म पिसिआर प्रविधिबाट परीक्षण गरिएकोमध्ये ५ जना बाहेक दुई हजार ५ सय १२ जनाको रिपोर्ट नेगेटिभ आएको छ। यस्तै र्‍यापिड टेस्टमा ६ हजार एक सय ७५ को रिपोर्ट नेगेटिभ र दुई जनाको पोजेटिभ आएको छ। एक जनाको पिसिआरबाट नेगेटिभ आएको छ।

पोजेटिभ आएकाहरुमध्ये एक जनाको पिसिआर प्रविधिबाट पुष्टि हुन भने बाँकी छ। अहिलेसम्म सबैभन्दा बढी कैलालीमा तीन हजार एक सय १४ जनाको र्‍यापिड टेस्ट गरिएको छ।

यस्तै कञ्चनपुरमा ५ सय १४, बैतडीमा दुई सय १६, दार्चुलामा चार सय ३९, डडेल्धुरामा १५, डोटीमा ७ सय ५८, बझाङमा चार सय ८६, अछाममा तीन सय ४० र बाजुरामा दुई सय ९५ जनाको र्‍यापिड टेस्ट गरिएकोमा एक जना बाहेक सबैको रिपोर्ट नेगेटिभ आएको स्वास्थ्य आपतकालीन केन्द्रले जनाएको छ।

यस्तै अहिलेसम्म विभिन्न अस्पतालको आइसोलेसनमा राखिएका ९८ जनालाई डिस्चार्ज गरिएको छ। उनीहरुको कोरोना परीक्षण रिपोर्ट नेगेटिभ आएपछि डिस्चार्ज गरिएको हो। जसमा चार जना कोरोना संक्रमित छन् भने बाँकी एक् जनालाई कोरोनाको आशंकामा अस्पतालमा राखिएको छ। उनीहरुको परीक्षण रिपोर्ट आउन बाँकी रहेको छ। यस्तै प्रदेशमा सबै जिल्लामा स्थापना गरिएका विभिन्न क्वारेन्टाइनमा एक हजार चार सय ९० जनालाई राखिएको छ।

अहिले प्रदेशका विभिन्न अस्पतालमा ६ जनालाई आइसोलेसनमा राखिएको छ भने ९८ जना सामान्य उपचारपछि घर फर्केको बताइएको छ।