काठमाडौं- कोरोना भाइरस (कोभिड १९) का कारण रोकिएका फुटबल प्रतियोगिताहरु कहिले गर्ने भन्ने यकिन नहुँदा अन्तिमतिर पुगिसकेको फुटबल सिजन यत्तिकै सकिने खतरा बढिरहेको छ। सिजन यत्तिकै सकिए रेलिगेसनमा पर्ने टिम कसरी मिलाउने भन्नेमा अहिले बहस सुरु भएको छ।
यस्तोमा इंग्लिस प्रिमियर लिग क्लबहरुको बैठकमा भने रोकिएको सिजन जसरी हुन्छ सकाउने भन्ने विषयमा सहमति भएको छ। तर कोरोना भाइरसको माहामारीको अवस्था अझ कस्तो हुने हो भन्ने अनुमानसम्म पनि गर्न नसकिँदा रोकिएका खेलहरु खेलेरै सकाउन पनि मुस्किल देखिन्छ। यसैले प्रिमियर लिग क्लबहरुले बाँकी रहेका ९२ खेल खेल्ने सहमति गरे पनि कहिलेसम्म खेल्न सकिन्छ भन्ने यकिन छैन।
प्रिमियर लिगले बाँकी रहेका खेल सकाउने नै आफ्नो योजना रहेको बताए पनि यहि मितिसम्म गर्न सकिन्छ भन्नेमा दुविधा नै छ। कोरोना भाइरसका कारण १३ मार्चदेखि प्रिमियर लिग रोकिएको छ। जसले क्लबहरुमा आर्थिक संकटको जोखिम पनि बढिरहेको छ। यसले नै खेलाडीको तलब कम गर्नेदेखि कर्मचारी निकाल्नेसम्मका निर्णयहरु पनि भइरहेका छन्।
युरोपभर यकिन भएको एउटा विषय भने फुटबल मैदानमा जहिले फर्काउन सकिए पनि खेलहरु बन्द रंगशालामा नै हुनेछन्। कोरोना भाइरसविरुद्धको भ्याक्सिन नबन्दासम्म अरु खेल गतिविधि पनि पहिले जसरी नै सञ्चालन गर्न सम्भव देखिँदैन। युरोपियन फुटबलको प्रशासकीय निकाय (युइएफए)ले क्लबहरुलाई सहज हुने गरी केही नियम ल्याउने तयारी पनि गरिरहेकै छ।
युइएफएले अहिले कोरोना भाइरस (कोभिड १९) का कारण रोकिएको च्याम्पियन्स लिग फुटबल २९ अगस्टमा सकाउने गरी तयारी पनि सुरु गरेको छ।
अहिले च्याम्पियन्स लिगसँगै युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय भइसकेको अवस्था छ। खेलहरु स्थगित गर्ने निर्णय भएको लामो समय भइसक्दा कोरोना संकटले प्रतियोगिता अनिश्चित बनिरहेको थियो।
अहिले भने २९ अगस्टसम्म बन्द रंगशालामा भए पनि खेल गर्न सकिन्छ कि भन्नेमा युइएफए लागिरहेको छ। त्यसका लागि २३ अप्रिलमा अर्को बैठक हुँदैछ। जसमा इस्तानबुलमा २९ अगस्टमा फाइनल खेल गर्ने गरी अरु खेल अगाडि नै सकाउने योजना बनिरहेको हो।
युरोपभर जुनसम्मका राष्ट्रिय टिमका खेलहरु पनि स्थगित गर्ने निर्णय भएको छ। युइएफएमा आबद्ध ५५ देशका सदस्यहरुको बैठकले यस्तो निर्णय गरेको हो। इंग्लिस प्रिमियर लिगसहित युरोपका अरु ठूला लिग प्रतियोगिताहरु पनि स्थगित नै छन्।
युइएफएका अध्यक्ष अलेक्जेण्डर सेफेरिनले यसअघि नै जुनसम्म प्रतियोगिताहरु हुन सकेन भने सबै कुरा यत्तिकै सकिन सक्ने बताइसकेका थिए। यदि सिजन यत्तिकै सकाए शीर्षमा रहने टिमलाई भन्दा ठूलो असर रेलिगेसनमा रहेका टिमलाई पर्नेछ।
इंग्लिस क्लब ब्राइटनका मालिक टोनी ब्लुमले प्रिमियर लिग यत्तिकै सकिए रेलिगेसनमा पर्ने टिमको निक्यौल कसरी गरिन्छ भन्ने यकिन नरहेको बताएका छन्। ९ चरणका खेल बाँकी छँदै अहिले अन्तिममा रहेका क्लबमा रेलिगेसनमा पारिदिनु पनि न्यायसंगत हुँदैन। ‘यस्तो अवस्थामा कुनै क्लबलाई रेलिगेसनमा पार्न सजिलो छैन, त्यसका साथै अहिलेको अवस्थाले क्लबको बजारमा पर्ने असर त अझ ठूलो छ’ उनले भनेका छन्।
प्रिमियर लिग
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्। हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ। लिग अहिले अनिश्चितसम्मका लागि स्थगित छ।
ला लिगा
स्पेनिस ला लिगामा बार्सिलोना र रियल मड्रिडबीच यो सिजन उपाधि भिडन्त रोचक हुने देखिएको थियो। तर कोरोनाका कारण खेल स्थगित भएसँगै त्यो रोमाञ्चकता पनि सकिएको छ। २७ खेल सकिँदा ५८ अंकसहित बार्सिलोना शीर्ष स्थानमा थियो। दोस्रोमा रहेको रियल मड्रिडको ५६ अंक छ। अहिले स्थगित रहेको खेल कहिले हुने भन्ने यकिन छैन। २८ मे बाट खेलहरु गर्न सकिने बारे छलफल भए पनि अहिले नै केही भन्न सकिने स्थिति छैन।
सिरी ए
युरोपमा कोराना भाइरसको सबैभन्दा ज्यादा त्रासदी इटालीमा नै देखिन्छ। जहाँ इटालियन सिरी ए मा पनि यो सिजन उपाधि होड प्रतिस्पर्धात्मक देखिन्छ। शीर्षमा रहेको युभेन्टस र दोस्रोमा रहेको लाजियोबीच एक अंकको मात्र फरक छ। युभेन्टसको २६ खेलमा ६३ अंक छ भने लाजियोको २६ खेलमा नै ६२ अंक रहेको छ। एक खेल कम खेलेको इन्टर मिलान पनि २५ खेलमा ५४ अंकसहित नजिक नै देखिन्छ। सिरी ए का खेलाडीहरुको मे लागेपछि स्वास्थ्य परीक्षण गरिने र त्यसैका आधारमा खेलहरु कहिले सञ्चालन गर्न सकिन्छ भन्ने यकिन हुने बताइएको छ।
बुन्डेस लिगा
जर्मन बुन्डेस लिगामा बायर्न म्युनिख लगातार आठौँ उपाधिका लागि बढिरहेको छ। शीर्षमा रहेको बायर्न म्युनिखको २५ खेलमा ५५ अंक छ। दोस्रोमा रहेको बोरुसिया डर्टमुन्डको २५ खेलमा ५१ अंक छ। २८औँ चरणको खेलमा बोरुसिया डर्टमुन्ड र बायर्न म्युनिखबीच भेट हुँदा उपाधिमाथिको दाबेदारी अझ प्रस्ट हुनेछ। खेलहरु अप्रिल ३० सम्म स्थगित गरिने सूचना आए पनि कोरोना संक्रमणको अवस्था बढ्दो रुपमा रहेकाले त्यो कठिन देखिन्छ। अहिले बुन्डेस लिगाका केही क्लबहरुले अभ्यास भने सुरु गरेका छन्।
लिग वान
फ्रेन्च लिग वानमा पेरिस सेन्ट जर्मेन (पिएसजी) लाई अरु क्लबले उछिन्ने छाँटकाँट देखिँदैन। पिएसजीको २७ खेलमा ६८ अंक भइसकेको छ। दोस्रोमा रहेको मार्सेलीको २८ खेलमा ५६ अंक रहेको छ। स्टार खेलाडीले भरिएको पिएसजीलाई उपाधि जित्न भने कहिलेसम्म पर्खनुपर्ने हो यकिन छैन। लिग वान जुन ३ या जुन १७ मा सुरु गर्ने गरी तयारी भने भइरहेको छ। दुईमध्ये जुन १७ मा बन्द रंगशालामा खेल गर्ने तयारीमा काम भइरहेको भए पनि यसमा पनि कोरोनाको आउने अवस्थाले फरक पार्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
