काठमाडाैं- जिल्ला अदालत काठमाडाैंले बयान र म्याद थपका लागि पुगेका मध्ये केही अभियुक्तलाई बिहीबार फर्काइ दिएकाे छ। स्वास्थ्य जाँच नगरेको भन्दै काठमाडौं जिल्ला अदालतका तीन न्यायाधीशले अदालत ल्याएका अभियुक्तहरुलाई फर्काइदिएका हुन्।
प्रधानन्यायाधीशसहितको फुलकोर्टले गरेको निर्णयलाई समेत चुनौती दिँदै उनीहरुले म्याद थप वा बयान नै नगराई फिर्ता पठाएका हुन्। न्यायाधीशहरु कमलप्रसाद पोखरेल, कृपाशुर कार्की र श्रीकृष्ण भट्टराईको इजलाशले अभियुक्तहरुलाई फर्काइदिएको हो।
कोरोनाको जोखिमका बारेमा कुनै जानकारी नभएको र अदालतमा त्यसको चेकजाँच नहुने कारण देखाउँदै उनीहरुले फिर्ता पठाउने आदेश नै गरेका हुन्। काठमाडौ जिल्ला अदालतका अन्य न्यायाधीशहरु ब्रजेश प्याकुरेल, ऋषिराम निरौला, भुवन सिंह थापा, प्रकश ढुंगाना र प्रकाशचन्द्र अधिकारीले भने इजलाशमा बसेर सुनुवाई गरेका थिए।
भोलिबाट सबै इजलाशले अभियुक्तहरुको स्वास्थ्य परीक्षण रिपाेर्टसँगै अभियुक्तलाई पेश नगरे सुनुवाई नर्गने बताएका छन्। न्यायाधीश श्रीकृष्ण भट्टराईको इजलाशले चार बुँदे निर्देशन जारी गरेको छ। भट्टराईको इजलाशले कोरोना भाइरसको महामारीको अवस्थामा अदालतमा उपस्थित हुने सेवाग्राही, प्रतिवादीहरु, सुरक्षाकर्मीहरु, सरकारी वकिल एवं अन्य कानुन व्यवसायीहरु र अदालतका कर्मचारीहरुको हकमा पनि अदालत प्रवेश गर्नु पूर्व वा प्रवेशस्थलमा स्वास्थ्यसम्बन्धी अत्यावश्यक परीक्षण गरी/गराइ प्रवेश गराउन भनिएको छ।
सामाजिक दूरीलगायत अन्यको परिपालनासहित सुरक्षित वातावरणमा प्रवेश वा अत्यावश्यक सेवा प्रवाहको व्यवस्था मिलाउनेतर्फ अदालत प्रशासनको ध्यानाकर्षण पनि इजलाशले गराएको छ।
इजलाश समक्ष बयानको लागि उपस्थित गराइएका प्रतिवादीहरु २७ र २८ दिन हिरासतमा भएको देखिएको र थुनामा रहेको समयावधि पनि कोरोना संक्रलमणको उच्च जोखिमको अवधिभित्र परेको देखियो भन्दै परीक्षण गरेर पेश गर्न निर्देशन दिएको छ।
‘हिरासतमा रहँदा प्रतिवादीहरुको हकमा सामाजिक दूरीको नियम पालना भए/नभएको पनि खुल्न आएन’ इजलाशको आदेशमा भनिएको छ, ‘यसरी महामारीको अवस्थामा प्रतिवादीहरु हिरासतमा रहँदा पनि सङ्क्रमण भए/नभएको वा फैलिए/नफैलिएको पत्ता लगाउन परीक्षण भएको तत्कालको रिपोर्ट आएपछि सो रिपोर्ट साथै राखी प्रतिवादीहरुलाई बयानको लागि इजलाश समक्ष पेस गर्नू।’
महामारीको अवस्थामा प्रतिवादीहरु हिरासतमा रहँदा उनीहरुमा पनि सङ्क्रमण भए/नभएको पत्ता लगाउन अन्य उपयुक्त प्रविधिबाट परीक्षण भएको तत्कालको रिपोर्ट आएपछि सो रिपोर्ट साथै राखी प्रतिवादीहरुलाई बयानको लागि इजलाश समक्ष पेस गर्नू भनि उनीहरुको इजलाशले आदेश गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
