काठमाडौं- यसलाई लकडाउनको रूपान्तरण भनौं वा लकडाउन निम्त्याएकाे काेराेना भाइरस (कोभिड- १९)ले सिर्जना गरेकाे परिस्थित। पिस्टन र बेरिङ बनाउने कम्पनीहरू लकडाउनकाे समयमा पनि अहिले धमाधम फाइबर ग्लास प्रोटेक्टिभ मास्क बनाइ रहेका छन्। अर्कोतर्फ हर्सपावर र क्युविक क्यापासिटी (सिसी)को बारेमा मन्थन गर्ने कम्पनीहरू जीवन-मरणको दोसाँधमा पुगेका मानिसलाई कृतिम स्वास दिन चाहिने भेन्टिलेटर बनाउन पुगेका छन्।
चीनबाट सन् २०१९ को अन्त्यमा उत्पत्ति भएको कोरोना भाइरसले १ लाखभन्दा बढीको ज्यानमात्र लिएन संसारकै दैनिकी बदलिदियो। कोरोनाको औषधि पत्ता लागि सकेको छैन। त्यसैले यसको नियन्त्रणका लागि मानिसहरू घरमै बस्नुको बिकल्प छैन।
खाद्यान्न, औषधिलगायत केही अत्यावश्यक वस्तुबाहेक अन्य कुराको उत्पादन तथा खपत दुवै ठप्प छ। यस्तो अवस्थामा कार उत्पादक कम्पनीहरूसमेत बन्द थिए। तर, कोरोनाका बिरामी बढ्दै गएसँगै संसारका अधिकांश देशले आफ्नो देशका कार उत्पादकलाई सहयोग गर्न अपिल गरे।
कार उत्पादक कम्पनीहरूलाई मास्क, भेन्टिलेटरलगायतका स्वास्थ्य सामग्री बनाउन भनियो र उनीहरूले अहिले उत्पादन गरिरहेका छन्। नियमित रूपमा भेन्टिलेटर बनाउने कम्पनीले बनाउन नभ्याउने भएर कार उत्पादकलाई बनाउन भनिएको हो। कार उत्पादकहरूलाई सम्बन्धित देशको स्वास्थ्य निकायबाट गुणस्तर प्रमाणित गराइ भेन्टिलेटर बनाउन गलाइएको छ।
अमेरिका, बेलायत, फ्रान्स, इटाली, भारतलगायत मुलुकले कार उत्पादकलाई भेन्टिलेटर बनाउन भनेका हुन्। भारतमा रहेको फोर्डले आफ्नो फ्याक्ट्री खोलेर ग्लास भाइजर बनाइ रहेको छ भने महिन्द्रा र एमजीले भेन्टिलेटर बनाइ रहेका छन्। दुईपाङ्ग्रे सवारी उत्पादक टिभिएसले मास्क उत्पादन गरिरहेको छ।
यसैगरी मोटोनले मेडिकल सामग्रीहरूको उत्पादनमा आवश्यकपर्ने वस्तु बनाइ रहेको छ।
भारतमा रहेका सवारी उत्पादकहरुले अहिले कोरोना भाइरसका बिरामीको उपचारमा आवश्यपर्ने सामानहरू बनाइरहेका छन्। कोरोना संक्रमणको दर बढ्दै गएकाले यस्ता सामग्रीको माग अत्यधिक हुन्छ। चेन्नईमा रहेका सवारी उत्पादकसँग त्यहाँको स्वास्थ्य संस्थाले समन्वय गरिरहेको छ।
ती कार उत्पादकलाई तामिलनाडू सरकारले मे-जुनमा २ हजार भेन्टिलेटर बनाइदिन भनेको छ। मे महिनाभरिमा कम्तिमा १ हजार भेन्टिलेटर बनाउन भनिएको छ। कोरोना भाइरसविरूद्ध लड्न आवश्यक सामग्री बनाउन राज्य सरकारले कार उत्पादकलाई आव्हान गरेको हो।
भारतभर रहेका सवारी उत्पादकहरू कच्चा पदार्थ, इन्जिनियर सहितका कामदारलाई उपस्थित गराएर भेन्टिलेटर तथा स्वास्थ्य सामग्री उत्पादनमा जुटेका छन्। टिभलएस मोटरले आफ्नो सामाजिक काम गर्ने संस्था श्रीनिभासन सर्भिस ट्रस्टमार्फत् १० लाख मास्क बनाइ रहेको छ। यो तामिलनाडूका लागि मात्र हो भने अन्यत्र पनि यसैगरी उत्पादन गरिरहेको छ।
त्यस्तै महिन्द्रा, टाटा मोटर्स, मारूती सुजुकी पनि भेन्टिलेटर उत्पादनमा केन्द्रित भएका छन्। महिन्द्राले सस्तो मूल्यमा आइसियू भेन्टिलेटर बनाइ रहेको छ। सामान्तया ५ देखि १० लाख भारतीय रुपैयाँसम्म पर्ने त्यस्ता भेन्टिलेटर महिन्द्राले ७ हजार ५ सयभन्दा बढी सस्तोमा उत्पादन गर्दैछ।
भारतको सबैभन्दा ठूलो कार उत्पादक मारूती सुजुकीले मासिक १० हजार भेन्टिलेटर उत्पादन गर्ने यसअघि नै बताएको थियो। भारत सरकारको आग्रहमा कम्पनीले उक्त संख्यामा भेन्टिलेटर बनाउन लागेको हो।
मारूती सुजुकीले भेन्टिलेटरसँगै मास्क तथा अन्य प्रोटेक्टिभ इक्युपमेन्टसमेत उत्पादन गर्ने छ। हाल मारूती सुजुकीलगायत सबैजसो सवारी उत्पादक कम्पनीले कोरोनाका कारण सवारी उत्पादन स्थगित गरेका छन्।
मारूती सुजुकीले भेन्टिलेटर उत्पादनका लागि एजभा हेल्थलेयरसँग समन्वय गरेको छ। एजभाले नियमित रूपमा भेन्टिलेटर उत्पादन गर्दै आएको छ। मारूती र एजभा हेल्थकेयरले संयुक्त रुपमा काम गरे छोटो समयमा ठूलो संख्यामा भेन्टिलेटर उत्पादन हुनेछ।
साथै बेलायती प्रधानमन्त्री बोरिस जोन्सन र अमेरिकी राष्ट्रपति डोनाल्ड ट्रम्पले पनि कार उत्पादकहरूलाई तत्काल भेन्टिलेटर बनाउन गत महिना नै निर्देशक दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786622145.jpg)
-1786602170.png)
-1786513116.png)
