बेनी– ‘अचानोको पीडा खुकुरीलाई थाहा हुँदैन’ भन्ने नेपाली उखानै छ। दैनिक आवतजावत गर्ने सडकमा भोगेको दुःखलाई बुझ्दै म्याग्दीका एक चालकले आफूलाई अचानो सम्झिएर खुकुरीजस्तै जोखिमपूर्ण सडकलाई मर्मत तथा स्तरोन्नति गरी नमूनायोग्य बनाएका छन्।
दैनिक यात्रु लिएर गाउँसम्म पुग्ने सडकको मर्मत तथा स्तरोन्नतिको जिम्मा पाएपछि भकिम्लीका एक युवाले दुई महिनासम्म गाडी चलाउने पेशालाई छोडेर सडक स्तरोन्नति गरेका हुन्। बेनी नगरपालिका–३ भकिम्ली जोड्ने सडकमा नगरपालिकाबाट विनियोजित बजेटबाहेक पनि स्थानीयको जनश्रमदानबाट सडकका जोखिमपूर्ण ठाउँको मर्मत तथा स्तरोन्नति गरी नमूना बनाइएको छ।
सदरमुकाम बेनी नजिक भए पनि जिल्लाकै जोखिमपूर्ण घुम्ती, साँघुरो तथा भिरालो सडकका कारण अति आवश्यकबाहेक पैदलयात्रा गरी सदरमुकाम आउने भकिम्लीबासीको समस्यालाई समाधान गर्न सडक निर्माण उपभोक्ता समितिको जिम्मेवारी लिएर बस चालक समेत रहेका भानुभक्त थापाले जोखिमपूर्ण सडकमा सहजै आवतजावत गर्ने बनाएका हुन्।
‘बस चालक भएर यात्रुलाई सम्झिएर सडक मर्मतमा समय दिएको थिएँ। जहाँ यात्रु यात्रामा त्रसित हुन्छन् त्यहाँ मैले धेरै समय दिएर मर्मत गर्न लगाएँ।’, थापाले भने।
बेनी–बगरफाँट–दुधेखोला हुँदै भकिम्ली जोड्ने सडक मर्मत तथा स्तरोन्नतिमा नगरपालिकाले विनियोजन गरेको २४ लाख १२ हजार रुपैयाँ बजेट अपुग भएपछि जोखिमपूर्ण सडक मर्मतमा स्थानीयवासीले समेत ५ लाख रुपैयाँ बराबरको जनश्रमदान गरेको उनले बताए।
‘जोखिमपूर्ण सडक मर्मतमा स्थानीयले दैनिक सहयोग गर्नुभयो। सडकलाई जोखिममुक्त बनाउन प्राविधिक सहयोगलाई पनि ध्यान दिइयो।’, थापाले भने।
उनले विनियोजित बजेटबाट अति जोखिमपूर्ण मानिएको आपाँरुखमा ८४ मिटर ढलान, विभिन्न ६ ठाउँमा तारजाली, घुम्ती सुधार, ग्रेड मिलाउने, साँघुरो र भिरालो जमिनमा पक्की वालका साथै सडक फराकिलो बनाइएको जानकारी दिए।
दुधेखोला–भकिम्ली सडक निर्माण आयोजनाकी सचिव रुपा क्षेत्रीले सडक मर्मत गर्दा स्थानीयले आफ्नो घरायसी कामसमेत छोडेको बताइन्। उनका अनुसार इस्टिमेटभन्दा धेरै तारजाली तथा चालकको आत्मबल बढाउने गरी जोखिमपूर्ण ठाउँमा रडकोे प्रयोग गरी वाल लगाइएको छ।
भकिम्लीको जोखिमपूर्ण सडकको स्तरउन्नति गरी उपभोक्ता समितिले बजेटलाई सदुपयोग गरेको वडाध्यक्ष पदम पुनले बताए। ‘अनुगमनमा आएका जनप्रतिनिधि समेत सडकको अवस्था देखेर दंग परेका छन्। बजेटको पूर्णरुपमा सदुपयोग भएको छ।’, पुनले भने।
उनले सडकमा दैनिक आवतजावत गर्ने चालक नै अध्यक्ष भएपछि सडकले नयाँ रुप लिएको दावी गरे। करीब १४ किलोमिटरको सडकबाट भकिम्लीका ६ सय घरधुरी लाभान्वित हुनेछन्। सो सडकको २०६६ सालमा ट्र्याक खोलिएको थियो।
सडक निर्माणबाट स्थानीयलाई आवतजावतसँगै पर्यटकीयस्थल स्वर्गाआश्रम, बेलढुंगा र छिमेकी जिल्ला बागलुङको काठेखोला गाउँपालिकाको धम्जालगायत छिमेकी मंगला गाउँपालिकाको बरांग्जालगायतका क्षेत्रका बासिन्दाले समेत प्रयोग गर्ने गरेका छन्। (ध्रुवसागर शर्मा/रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768538433.png)
-1764146706.png)
