काठमाडौं– कोरोना भाइरस (कोभिड–१९)को उत्पतिबारे चीनसँग विवाद गरिरहेका अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिनफिङसँग टेलिफोन कुराकानी गरेका छन्। राष्ट्रपति ट्रम्पले बिहीबार केही समयअघि आफूले राष्ट्रपति सीसँग कुराकानी गरेकाे बताएका हुन्। सीसँग राम्रो कुराकानी भएको र आफूहरुले मिलेर काम गरिरहेको ट्रम्पले उल्लेख गरेका छन्।
‘चीनका राष्ट्रपति सीसँग अघि धेरै राम्रो कुराकानी भयो,’ ट्रम्पले ट्विटरमा उल्लेख गरेका छन्, ‘पृथ्वीभर तहसनहस बनाउने कोरोना भाइरसबारे विस्तारमा कुराकानी भयो। चीनले धेरै राम्रो गरेको छ र भाइरसबारे बलियो बुझाई बिकसित पनि गरेको छ। हामी साथ मिलेरै काम गरिरहेका छौं। धेरै सम्मान छ।’
ट्रम्पले कोरोना भाइरसलाई ‘चिनियाँ भाइरस’ भन्ने गरेका छन्। संकटका बेला पनि यसले दुई देशबीच विवाद जन्माइरहेको छ।
चीनको वुहानबाट कोरोना भाइरसको संक्रमण फैलिएको भए पनि यसले अहिले विश्वव्यापी महामारीको रुप लिएको छ। पछिल्लो सयम कोरोना संक्रमणको केन्द्र अमेरिका बनेको छ।
पछिल्लो विवरणअनुसार कोरोना संक्रमित अमेरिकामा ८५ हजार ५ सय ९४ पुगेका छन् भने १ हजार ३ सयको मृत्यु भएको छ।
कोरोना संक्रमणको सुरुवाती केन्द्र चीनमा भने ८१ हजार ३ सय ४० जनालाई यसको संक्रमण भएको छ। अमेरिका र चीनपछि इटालीमा सबैभन्दा धेरै संक्रमति रहेका छन्, जहाँ संक्रमित हुनेको संख्या ८० हजार ५ सय ८९ रहेको छ। इटालीमा ८ हजार २ सय १५ को मृत्यु भएको छ।
कोरोना संक्रमण एसियाबाट फैलिएको भएपनि पछिल्लो समय युरोपेली मुलुक र अमेरिकामा तीव्रगतिमा संक्रमण फैलिएको छ। इटालीपछि युरोपेली देशहरु स्पेन, जर्मनी, फ्रान्स, स्वीट्जरल्याण्डमा धेरै संक्रमण फैलिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
