मुम्बइ- चीनबाट सुरु भएको कोभिड-१९ (कोरोना भाइरस) संक्रमण विश्वभर फैलिरहेको छ। यसको असर बलिउडमा पनि देखिएको छ। कोरोनाका कारण ठूला लगानीमा बनाइएका सिनेमा पनि थन्किएका छन्। कोरोनाका कारण दिल्ली‚ मुम्बई‚ कर्नाटक‚ केरल र जम्मु काश्मीरका केही सहरमा सिनेमा हल बन्द भइसकेका छन्। यसबाट रिलिज हुँदै गरेका सिनेमालाई असर पर्छ नै।
केही सिनेमाको सुटिङ नै रोकिएको छ। कतिपय फिल्मको रिलिज मिति स्थगित छ। कोरोनाकै त्रासका कारण आइफा अवार्ड र जी सिनेमा अवार्डको कार्यक्रम पनि रद्द गरिएको छ।
ठूला लगानीका चलचित्रको रिलिज मिति रद्द
कोरोना भाइरसको संक्रमणबाट विश्व नै गुज्रिरहेको बेला चलचित्र निर्देशक रोहित शेठ्ठीले मार्च २४ मा रिलिज हुन् भनिएको फिल्म ‘सूर्यवंशी’को रिलिज डेट नै रद्द गरेका छन्। कोरोना भाइरस संक्रमणको जोखिम रहुन्जेल फिल्म रिलिज नगर्ने भएका छन्।
उक्त फिल्मलाई यो वर्षकै ठूला फिल्ममध्येको एक फिल्म मानिएको छ। किनकि, यस फिल्ममा भारतीय चलचित्र उद्योगका तीन ठूला सुपरस्टार: अक्षयकुमार‚ अजय देवगन र रणविर सिंह एकैसाथ देखिँदैछन्।
‘सूर्यवंशी हाम्रो एक वर्षको कडा मेहनतको फल हो। हामीलाई यसको ट्रेलरको प्रतिक्रिया पनि एकदम राम्रो मिलेको छ। यसबाट पनि थाहा हुन्छ कि मानिसहरू यसलाई सिनेमा हलमा हेर्नका लागि एकदमै उत्सुक छन्,' शेठ्ठीले भने‚ 'त्यसैले हामी यो फिल्मलाई सही समयमा रिलिज गर्नका लागि उचित समयको पर्खाइमा छौं।’
कोरोनाको डर
सलमान खानको फिल्म ‘राधे’को सुटिङ केही समयका लागि स्थगित गरिएको छ। यसअघि उक्त फिल्मको सुटिङ विदेशमा गरिएको थियो तर‚ कोरोनाको संक्रमणका कारण अब सो फिल्म मुम्बइमा गरिने बताइएको छ।
अक्षयकुमारको फिल्म ‘पृथ्वीराज’को सुटिङ राजस्थानमा चलिरहेको थियो‚ सो पनि रोकिएको छ। यसबाहेक करण जोहरको फिल्म ‘तख्त’ को सुटिङ पनि सुरू गरिएको थियो। उनले त्यसलाई पनि रोकिदिएका छन्।
कार्तिक आर्यन र कियारा एडवानी अभिनित चलचित्र ‘भूलभूलैया-२’ को सुटिङ पनि यस्तै कारणले रोकिएको छ।
घाटामा सिनेमा हल
फिल्मको सुटिङबाहेक अहिले प्रदर्शनमा रहेका ‘बागी-३’ र ‘अङ्ग्रेजी मिडियम’को कमाइमा पनि कोरोनाको असर देखिने भएको छ।
‘पहिला कोरोना भाइरसको असर बलिउडमा खासै परेको थिएन। तर‚ आजबाट ठूलो घाटा बेहोर्नुपर्ने देखिएको छ,’ फिल्मको व्यापारसम्बन्धी विश्लेषण गर्दै आएका अमेद मेहराले भने, ‘सरकारले दिल्ली‚ कर्नाटक‚ केरल‚ जम्मू र कश्मीरका सिनेमा हल बन्द गर्ने निर्देशन दिएसँगै यसबाट हलका मालिकलाई ठूलो क्षति पुग्नेछ।’
रोजीरोटी गुम्ने खतरा
‘तख्त'लगायतका फिल्मका लागि मिति नै मिलिरहेको थिएन जसले गर्दा दश अरबभन्दा बढी नोक्सान भएको छ। तख्त यो वर्षकै सबैभन्दा महंगो फिल्म थियो। यस्तो बेलामा पैसाको मात्र घाटा नभएर फिल्मको सुटिङमा सहयोग गर्ने सबै कर्मचारीका लागि पनि घाटा हुन्छ।
अमोद मेहरा भन्छन्‚ ‘मेकअप आर्टिस्ट‚ जुनियर आर्टिस्ट‚ स्पट ब्वाइ‚ लाइटम्यान र क्यामाराम्यानजस्ता धेरै मानिसको रोजगार फिल्म इन्डस्ट्रीमाथि भर परेको हुन्छ। यस्तोमा उनीहरूको रोजीरोटीको समस्या हुन्छ।’
साना सिनेमाहरूका लागि ठूलो घाटा
इरफान खानको फिल्म ‘अंग्रेजी मिडियम’ शुक्रबार रिलिज भयो।
‘कोरोना भाइरसको असरको सबैभन्दा ठूलो उदाहरण अंग्रेजी मिडियम हो। शुक्रबार फिल्म रिलिजको पहिलो दिन थियो। शनिबारदेखि फिल्म हल नै बन्द भइदियो,’ आमोद मेहरा भन्छन्।
मेहराका अनुसार निर्माताहरुले आफ्नो फिल्म यस्तो बेलामा प्रदर्शन नै गर्नु हुँदैन थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
