काठमाडौं- महानगरीय प्रहरी वृत्त स्यवम्भूले गत माघ १८ गते लागू औषधसहित नवाङ पासाङ शेर्पा, राजन श्रेष्ठ, सपना रायमाझी र ओमबहादुर गुरुङलाई पक्राउ गर्यो।
काठमाडौं महानगरपालिका–१५, भुइँखेलस्थित गुणलक्ष्मी लामाको घरमा डेरा गरी बस्ने ओमबहादुर गुरुङको कोठाबाट पक्राउ परेका उनीहरूबाट वृत्तले खैरो हेरोइन १०० मिलिग्राम, नाइट्रोजन १० ट्याबलेट, डाइजेपाम ६ पिस, नुर्फिन २ पिस, फेनारगन ३९ पिस, सिरिन्ज १२ थान बरामद गर्यो।
यसरी लागू औषधसहित पक्राउ परेका चार मध्य एक व्यक्ति हुन्, व्यवसायिक घराना यती होल्डिङ्सका स्वर्गीय अध्यक्ष आङछिरिङका शेर्पाका छोरा नवाङ। नवाङ पक्राउ परेको करिब एक महिना हुन लाग्दासमेत उक्त घटना प्रहरीले गुपचपमै राखेको थियो।
लागुऔषध मुद्दामा थुनछेक बहसका लागि जिल्ला अदालत काठमाडौं लगिएपछि मात्र यो कुरा खुल्यो। बुधबार बाँकी तीन जनाको थुनछेक बहस सकिएको थियो भने आज बिहीबार नवाङको थुनछेक बहस सकिएको छ। उनीसहित चारै जनालाई जिल्ला अदालत काठमाडौंले पुर्पक्षका लागि जेल चलान गरेको छ। प्रहरी स्रोतका अनुसार नवाङ लागुऔषध दुर्व्यसनी हुन्। प्रहरीले पक्राउ गरेको समयमा समेत उनी ड्रग्सको नसामा नै थिए।
पक्राउ परेका अन्य व्यक्तिले नवाङकै आदेशमा लागुऔषध उपलब्ध गराउने गरेका थिए। नवाङसँगै पक्राउ परेका अन्य व्यक्ति पनि लागुऔषध दुर्व्यसनी रहेको स्वयम्भूका डिएसपी लालध्वज सुवेदीले बताए।
‘पक्राउ परेका चारै जना लागुऔषधका पेड युजर हुन्,’ डिएसपी सुवेदीले भने, ‘सीमा नाकाबाट भित्रिएका लागुऔषध उनीहरूले किनेर प्रयोग गर्ने गरेको पाइएको छ।’
उच्च व्यापारिक घरानाका पारिवारिक नवाङको हिरासत यात्राको घटना भने नौलो होइन। यतिसम्म कि नवाङ हतियारसहितसमेत पक्राउ परेका थिए। दुई वर्ष अगाडि २०७४ फागुन २७ गते जिल्ला प्रहरी कार्यालय सुनसरीले नवाङलाई पक्राउ गरेको थियो। त्यसबेला उनको साथबाट १ राउन्ड गोली लोड भएको म्याग्जिनसहितको अटोमेटिक पेस्तोल-१, गोली लोड नभएको पेस्तोल-१ थान, ३ राउन्ड गोली, म्याजिन र खुकुरी १/१ थान, ६ थान एटिएम र१ लाख ३ हजार ५ रुपैयाँ बरामद भएको थियो।
इटहरीको मेजर टोलबाट पक्राउ परेका नवाङले हतियार देखाउँदै स्थानीय व्यक्तिलाई धम्की दिने गरेका थिए।
ठूलो मात्रामा हतियारसहित पक्राउ परे पनि त्यसबेला ८० हजार जरिवाना तिरेर रिहा भएका थिए। त्यतिबेला पनि शक्तिको आडमा सुटुक्क रिहा भएका नवाङको बानी भने सुध्रिएको थिएन। लागुऔषध सेवन गर्ने, धम्की दिने काम भने जारी नै रह्यो।
हतियारसहित पक्राउ पर्नुभन्दा पहिला नवाङ पाइलटको नक्कली लाइसेन्स लिएको विवादमा समेत तानिएका थिए।
नवराज सिलवाल केन्द्रीय अनुसन्धान ब्यूरो सिआइबी प्रमुख रहेको बेला २०७३ सालमा नक्कली पाइलट विरुद्ध ‘अपरेशन ह्वाक’ नाम दिएर नक्कली पाइलटविरुद्ध अपरेशन चलाइएको थियो।
सो क्रममा बुद्ध एयरका पाइलट स्वछन्द घले, अर्जुन कार्की, राजकुमार श्रेष्ठसँगै नवाङ समेत पक्राउ परेका थिए।
पाइलट हुनका लागि अनिवार्य रूपमा आइएस्सी पास गरेको हुनुपर्ने व्यवस्था छ। आइएस्सी पास नगरेकाले पाइलट अध्ययन गर्न पाउँदैनन्। उनीहरुले आइएस्सीको नककली सर्टिफिकेट पेश गरेर विदेशमा पाइलट अध्ययन गरेका थिए।
नवाङले पनि विदेशमा पाइलटको कोर्स पूरा गरेपछि सोही प्रमाणपत्र देखाएर नागरिक उड्डयन प्राधिकरणबाट पाइलटको लाइसेन्स समेत लिएका थिए। र, आफ्नै यतीको भगिनी संस्था तारा एयरलाइन्सको समेत उडान नवाङले भर्ने गरेका थिए। तर सिआइबीले भने आइएस्सी नै पास नगरी पाइलट बनेको भन्दै पक्राउ गरेको थियो। पछि नवाङ शक्तिको दुरुपयोग गर्दै पाइलटको काम नगर्ने समेत छुटेका थिए।
आइएस्सीको सर्टिफिकेट नै पेस गर्न नसकेपछि नागरिक उड्डयन प्राधिकरणले उनको लाइसेन्स समेत नवीकरण गरेको थिएन। त्यसपछि भने उनले जहाज उडाउन छाडेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
