काठमाडौं- गृहसचिव महेश्वर न्यौपानेले शुक्रबार सशस्त्र प्रहरी बल नेपाल प्रधान कार्यालयको स्थलगत निरीक्षण गरेका छन्। सो क्रममा उनले नागरिकको सेवा र सुरक्षामा सशस्त्र प्रहरी बलबाट भएको कामकारवाहीबारे जानकारी लिएका छन्।
सचिव न्यौपाने समक्ष सशस्त्र प्रहरीले भएका कामकारवाही, जनशक्ति परिचालन, साधनश्रोत, शान्ति सुरक्षाको अवस्था तथा सुरक्षा चुनौती, संगठनले हाँसिल गरेका उपलब्धिलगायत विविध विषयहरुमा प्रस्तुतीकरण गरेका थिए।
उनले कार्यालयको निरीक्षण पश्चात सशस्त्र प्रहरीलाई निर्देशन सम्बोधन समेत गरेका थिए।
सो अवसरमा उनले विभिन्न आरोह अवरोहहरु पार गर्दै सशस्त्र प्रहरी बल नेपाल अहिलेको यस स्थानमा आउन सफल भएको चर्चा गर्दै सशस्त्र प्रहरी बल नेपालको भूमिका मुलुकको शान्ति सुरक्षा कायम राख्ने कार्यमा सधैं महत्वपूर्ण रहने बताए।
उनले कर्तव्य पालनको क्रममा वीरगति प्राप्त गरेका संस्थापक सशस्त्र प्रहरी महानिरीक्षक स्व कृष्णमोहन श्रेष्ठलगायतको योगदानको स्मरण गरेका थिए।
उनले मुलुकमा शान्ति सुरक्षा कायम गर्नेदेखि विपद व्यवस्थापन, सीमा सुरक्षा, राजस्व चुहावट नियन्त्रण, सीमा अपराध नियन्त्रणलगायतका विविध जिम्मेवारी निर्वाहमा सशस्त्र प्रहरी बल नेपालले गरेको कार्यको प्रशंसा समेत गरेका थिए।
न्यौपानेले शान्ति सुरक्षाको स्थिति मजबुत हुँदा समग्र राष्ट्रको आर्थिक, सामाजिक विकासमा सहयोग पुग्ने बताए।
उनले कार्यक्षेत्रमा हुने गैर व्यावसायिक क्रियाकलाप कुनै पनि हालतमा क्षम्य नहुने बताए।
न्यौपानेले भोलिका दिनमा आउन सक्ने सुरक्षा चुनौतीहरुको सामना गर्न सक्ने गरी संगठनको आधुनिकीकरण गर्दै अगाडि बढ्नेमा आफू विश्वस्त गरेको जानकारी दिए।
सशस्त्र प्रहरी महानिरीक्षक शैलेन्द्र खनालले सीमा सुरक्षा, राजश्व चुहावट नियन्त्रण, विपद् पीडित नागरिक उद्धारलगायतका विविध जिम्मेवारीहरुमा उत्कृष्ट कार्यसम्पादन गर्दै भ्रष्टाचार, लैंगिक हिंसा र मानव अधिकारको हननमा शून्य सहनशिलताको नीतिका साथ संगठन अगाडि बढिरहेको बताए।
सशस्त्र प्रहरी बलको लाइभ भिडियो स्ट्रिमिङमार्फत सशस्त्र प्रहरी बलका सम्पूर्ण इकाइहरुमा प्रत्यक्ष प्रसारण गरिएको उक्त कार्यक्रममा सशस्त्र प्रहरी अतिरिक्त महानिरीक्षकहरु‚ गृहमन्त्रालय एवं सशस्त्र प्रहरी बलका वरिष्ठ अधिकृतहरु तथा एपिएफ अधिकृतहरुको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774514962.png)
-1764146706.png)
