स्पोर्टस लाइभ

त्रिदेशीय सिरिज : अमेरिकाविरुद्ध जितको आश

सराेज तामाङ शुक्रबार, माघ २४, २०७६ २०:२५

काठमाडौं– आइसिसी विश्वकप क्रिकेट लिग–टु अन्तर्गत त्रिदेशीय सिरिजमा नेपाल र अमेरिकाबीच शनिबार त्रिवि क्रिकेट मैदानमा प्रतिस्पर्धा हुँदैछ। तुलनात्मक रुपमा अमेरिकाभन्दा नेपाल बलियो छ। तर लिग–टु मा भने अमेरिका शीर्ष स्थानमा छ।

घरेलु मैदान, उल्लेख्य दर्शकको उपस्थिति। यही पक्षलाई साक्षी राख्दै नेपाल फेरि पनि अमेरिकामाथि जित हात पार्दै लिग–टु मा विजयी सुरुवात गर्ने दाउमा छ। लिग–टु मा नेपालले आफ्नो पहिलो खेल ओमानविरुद्ध २२ गते प्रतिस्पर्धा गरेको थियो। तर नतिजा १८ रनले ओमानलाई सुम्पिएको थियो। यता, अमेरिकाले पनि ओमानलाई ६ विकेटले नतिजा सुम्पिएको थियो।

अमेरिका र नेपाल त्रिवि क्रिकेट मैदानमा १० वर्षपछि आमनेसामने हुँदैछन्। यसअघि सन् २०१० मा अमेरिका र नेपालले त्रिवि क्रिकेट मैदानमा आइसिसी विश्व क्रिकेट लिग डिभिजन फाइभमा प्रतिस्पर्धा गरेको थियो। जहाँ घरेलु टोलीले एक खेल जित्दा एक खेल अमेरिकाको पक्षमा थियो।

शरदको असर!
ओमानविरुद्ध नेपालका तर्फबाट सर्वाधिक ५५ रन बनाएका शरद भेषावकर त्रिदेशीय सिरिजका बाँकी खेलमा भने देखिने छैनन्। हिपको मांसपेशीमा देखिएको समस्याका कारण उनी टिमबाट आउट भएका हुन्।

त्यसै पनि नेपाली टिमको ओपनिङ कमजोर हुने गर्दै आएको छ। यस्तो बेला मिडिल अर्डर राम्रो तरिकाले सम्हाल्दै आएका शरद टिमबाटै बाहिरिँदा टिमलाई निकै ठूलो असर परेको छ।

‘नेपाली टिमका फिजियो र टिमको सल्लाहअनुसार उनलाई १० दिनको विश्राम दिइएको हो। हामीले आइसिसीलाई रिपोर्ट पठाइसकेका छौं।’, टिम म्यानेजर गौतमले नेपाल लाइभसँग भने, ‘शरदका दाइको केही दिनअघि निधन भयो। उनले निकै दिन नुन बारे। केही दिन अभ्यास पनि गरेनन्। जसले गर्दा उनको मांसपेशीमा समस्या आयो।’

शरदको स्थानमा सुवास खकुरेललाई टिममा बोलाइएको छ। पछिल्लो समयमा सुवास पनि निकै लयमा देखिएका छन्। अमेरिकाविरुद्धको अभ्यास खेलमा सुवासकै अर्धशतकमा नेपालले जित हात पारेको थियो। यतिमात्र हैन विगतका दिनमा अमेरिकालाई पराजित गर्दा सुवासको मुख्य भूमिका रहँदै आएको छ। सुवास ओपनिङ विकेट किपर ब्याट्सम्यान हुन्। शरद मिडिल अर्डर। सुवासले टिममा मौका पाए पनि शरदको अभाव टिममा खड्किरहने छ।

अमेरिकालाई रोक्न के छ रणनीति?
अमेरिका कमजोर टिम भने होइन। उसले लिग टु मा ९ खेल खेल्दा ६ खेलमा जित र ३ खेलमा हार ब्यहोर्दै १२ अंक बनाएर शीर्ष स्थानमा छ। नेपालले भने बल्ल १ खेल खेलेको छ।

अमेरिकाका इयान होल्यान्ड, स्टेभन टाइलर, ज्याभिर मार्शल, कप्तान सौरभ नेत्रभाल्कर राम्रा खेलाडी हुन्। स्टेभन नेपालका लागि घातक हुन सक्छन्। उनले नेपालविरुद्ध सन् २०१३ मा डिभिजन थ्रीमा सर्वाधिक १६२ रन बनाएका थिए।

कमजोर सुरुवात ओमानविरुद्धको खेलमा पनि देखियो। कप्तान ज्ञानेन्द्र मल्ल र पारस खड्का नै ओपनिङमा आए पनि नेपाली टिमलाई उँभो लगाउन सकेनन्। ज्ञानेन्द्र १ र पारस लगत्तै ३ रनमा आउट हुँदा ओमानविरुद्ध नेपालको स्कोर ४ रन थियो। यस्तो स्थितिबाट गुज्रिएको नेपालको ब्याटिङ मिडिल अर्डर र बलरमा निर्भर छ। यदि अमेरिकाविरुद्ध पनि यस्तै स्थिति देखिए अवस्था के होला?

तर कप्तान ज्ञानेन्द्र मल्ल भने ओमानविरुद्धको जस्तो सधैं नहुने दाबी गर्छन्। ‘ओमानविरुद्धको खेलमा जस्तै अन्य खेलमा पनि हुन्छ भन्ने छैन। पारस र म नचलेर मात्रै हारेको हो। अब आउने खेलमा जितका लागि खेल्छौं’, कप्तान ज्ञानेन्द्रले भने।

त्यसो त सुवासको आगमनसँगै ओपनिङमा परिवर्तन हुने सम्भावना प्रवल छ। सुवासले प्लेइङ इलाभेनमा खेल्ने मौका पाएमा ओपनिङ जोडी परिवर्तन हुन सक्छ।

यदि यस्तो भएमा सुवास र कप्तान ज्ञानेन्द्र वा सुवास र पारस ओपनिङमा आउने छन्।

बलिङ लाइन नेपालको सधैं बलियो नै हुने गर्छ। ओमानविरुद्ध एकदिवसीय क्रिकेटमा डेब्यु गरेका सुशन भारी, अभिनाश बोहराले उत्कृष्ट प्रदर्शन गरेका थिए भने करण केसी र सन्दीप लामिछाने नेपालका हतियार हुन्।

ब्याटिङतर्फ ज्ञानेन्द्र, पारस, दीपेन्द्र, विनोद, आरिफ, रोहित लगायतका ब्याट्सम्यान चल्ने हो भने नेपालले ठूलो लक्ष्य दिन सक्छ। नचले के हुन्छ? स्पष्ट छ, नेपाल फेरि हार्छ।

हेड टु हेड
अमेरिका बलियो कि नेपाल? यो त खेलाडीको प्रदर्शनले निर्धारण गर्छ। कुनै बेला विश्वकप छनोटसम्म खेल्न भ्याएको अमेरिकाले अस्ट्रेलियासँग पनि क्रिकेट खेलेको इतिहास छ। सन् २००८ तिर नेपाल क्रिकेटको दुनियाँमा कमै मात्रमा नाम सुनिएको देश थियो। तर त्यो बेला अमेरिका क्रिकेटमा निकै बलियो थियो।

अमेरिका र नेपालबीचको प्रतिस्पर्धा धेरै भएको छैन। २००८ पछि नै अमेरिका र नेपालबीच बेलाबखत मात्रै प्रतिस्पर्धा हुँदै आएको छ। अहिलेसम्म अमेरिका र नेपालबीच ११ पटक ५० ओभरको खेलमा प्रतिस्पर्धा भएको छ। भने शनिबार त्रिवि मैदानमा हुने प्रतिस्पर्धा अहिलेसम्मकै माथिल्लो दर्जाको हो।

नेपालले ५ खेल जित्दा अमेरिकाले ३ खेलमा जितेको छ। तीन खेल भने वर्षाका कारण रद्द भएका छन्।

सन् २००८ मा मे ३१ मा आइसिसी विश्व क्रिकेट लिग डिभिजन फाइभको तेस्रो स्थानका लागि भएको खेलमा नेपालले अमेरिकालाई ९६ रनले पराजित गरेको थियो। यही लिगको समूह ए मा रहेका नेपाल र अमेरिकाबीचको खेल भने वर्षाका कारण रद्द भएको थियो।

नेपालले अमेरिकासँग खेलेको पहिलो खेलमा नै जित हात पारेको थियो।

त्यसको २ वर्षपछि दुवै टिमबीचको भेट २०१० फेब्रुअरी २६ मा काठमाडौंमा भयो। जहाँ डिभिजन फाइभ नै थियो। लिग चरणको खेलमा नेपाल अमेरिकासँग ५ विकेटले पराजित भयो। तर त्यसको अर्को दिन त्रिवि मैदानमै फाइनलमा नेपालले अमेरिकालाई ५ विकेटले पराजित ग¥यो। यो खेलमा नेपालका राहुल विश्वकर्माले सर्वाधिक ७ विकेट लिए। अमेरिकालाई पराजित गर्दै नेपाल च्याम्पियन बनेर डिभिजन फोरमा प्रवेश गरेको थियो।

तर २०१० अगष्ट १९ मै भएको आइसिसी विश्व क्रिकेट लिग डिभिजन फोरमा नेपाल अमेरिकासँग ५५ रनले पराजित भयो।

त्यसपछि नेपाल र अमेरिकाबीच २०१२ मा आइसिसी विश्व क्रिकेट लिग डिभिजन फोरमै भेट भएको छ। लिग चरणको खेलमा नेपालले अमेरिकालाई ३२ रनले पराजित गरेको थियो। नेपालका सुवास खकुरेलले ११५ रन बनाएका थिए। २५९ रनको चुनौती पछ्याउँदै ब्याटिङ गरेको अमेरिकाले २२६ रनमात्रै बनाउन सकेको थियो।

मलेसियामा भएको यो प्रतियोगिताको फाइनलमा फेरि नेपाल र अमेरिकाबीच भेट भएको थियो। फाइनलमा पनि नेपालले अमेरिकालाई ८ विकेटले पराजित गर्दै डिभिजन थ्रीमा प्रवेश गरेको थियो।
नेपाललाई च्याम्पियन बनाउन बसन्त रेग्मीले ५ विकेट लिएका थिए। ब्याटिङतर्फ ज्ञानेन्द्र मल्लले ६६ रन बनाउँदा सुवासले अविजित ४० रन बनाए।

सन् २०१३ अप्रिल २८ आइसिसी विश्व क्रिकेट लिग डिभिजन थ्रीमा नेपाल अमेरिकासँग ९४ रनले पराजित भयो, जुन अमेरिकासँगको अहिलेसम्मकै सबै भन्दा ठूलो हार हो।

त्यो खेलमा अमेरिकाले ५० ओभरमा ६ विकेटको क्षतिमा ३६६ रन बनाउँदा स्टेफन टाइलरले १६२ रनको योगदान दिएका थिए। जवाफी ब्याटिङ थालेको नेपाल भने ४९.५ ओभरमा अलआउट हुँदै २७२ रन मै समेटियो। नेपालका तत्कालीन कप्तान पारस खड्काले ७३ र शरद भेषावकरले ७२ रन बनाएका थिए।

अमेरिका र नेपालबीचको पछिल्लो आधिकारिक खेल भने २०१४ अक्टोबर २८ मा मलेसियामा भएको आइसिसी विश्व क्रिकेट लिग डिभिजन थ्री हो। जहाँ नेपालले अमेरिकालाई डकवर्थ लेविस मेथड(डिएल) का आधारमा १० रनले पराजित गरेको थियो। त्यसबेला नेपालका सुवास खकुरेलले अविजित ४९ रन बनाएका थिए।

२०१७ डिसेम्बर १ मा नेपाल र अमेरिकाबीच अभ्यास खेल भएको छ। जहाँ नेपालको नेतृत्व शरद भेषावकरले गरेका थिए। यो खेलमा अमेरिकासँग नेपाल ५ विकेटले पराजित भएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।