इटहरी- सरकारी छाप र दस्तखत किर्ते मुद्दामा फरार नेकपाका दुई नेता लामो समयसम्म पक्राउ पर्न सकेका छैनन्। झापाको दमक नगरपालिकास्थित ५० बिघा सरकारी जग्गा किते गरी व्यक्तिका नाममा ल्याएको आरोप लागेका सत्तारुढ दल नेपाल कम्युनिस्ट पार्टी (नेकपा) नेता गगन पुरी लामो समयदेखि फरार छन्। यसैगरी, मोरङ धनपालथान गाउँपालिका-६ की नेकपा प्रदेश सांसदसमेत रहेकी गुलेफुन खातुन उच्च अदालत विराटनगरले कैद सजायको फैसला गरेदेखि फरार छिन्।
दुवै नेताका बारेमा प्रहरी मौन छ। फरार भनिएका पुरीले प्रहरीका उच्च अधिकारीलाई बारम्बार धम्की दिँदासमेत पक्राउ पर्न सकेका छैनन्। तर प्रहरीले भने खोजी तीव्र बनाएको मात्र बताउँदै आएको छ।
यस्तो छ खातुनको किर्ते प्रकरण
खातुन तत्कालीन एमालेबाट सामानुपातिक कोटामा प्रदेशसभा सदस्य बनेकी हुन्। उनलाई सरकारी छाप, दस्तखत किर्ते मुद्दामा उच्च अदालत विराटनगरले १ वर्ष कैद र १४ हजार ५ सय ८३ रुपैयाँ जरिवाना फैसला गरेको छ। अदालतले खातुनविरुद्ध कसूर ठहर गरेपछि प्रहरीले उनलाई फरार सूचीमा राखेको छ।
मोही हकको कित्ता नम्बर ११० को ७ हजार २ सय ८० वर्गमिटरको जग्गा आफ्नो नाममा बनाएको आरोपमा उनी दोषी ठहर भएकी हुन्। साविकको कदमाहा गाविसमा खरिददारसहित चार जना मिलेर सरकारी छाप र दस्तखत किर्ते गरेको आरोप पुष्टि भएको छ।
०७३ असार ४ गते पक्राउ परेकी खातुन र उनका श्रीमान् शेख सिलावर मियाँलाई मोरङ प्रहरीले २५ दिनसम्म हिरासतमा राखेर अनुसन्धान गरेको थियो। ०७३ असार २८ गते खातुनसहित चार जनालाई प्रतिवादी बनाएर जिल्ला अदालत मोरङमा ‘सरकारी छाप, दस्तखत कीर्ते’ मुद्दा दर्ता भएको थियो।
खरिदार दीपचन्दकुमार मण्डल, कार्यालय सहयोगी विजयकुमार कामत, शेख सिलावर र सांसद खातुनलाई प्रतिवादी बनाएर मुद्दा दर्ता भएको थियो। जसमध्ये मण्डल र कामतलाई फरार प्रतिवादी बनाइएकाे थियाे।
जिल्ला अदालत मोरङले ०७३ असार २९ गते खातुन र मियाँलाई जनही १० हजार रुपैयाँ धरौटीमा छोड्न आदेश दिएको थियो। खातुन र मियाँ धरौटीमा छुटेको जानकारी पाएपछि कामत र मण्डल पनि ०७३ असार ३१ गते सुटुक्क अदालत पुगे। सोही दिन थुनछेक बहसपछि अदालतले जनही १५ हजार धरौटीमा छोड्न आदेश दियो।
तत्कालीन मोरङ जिल्ला अदालतका जिल्ला न्यायाधीश अम्बिकाप्रसाद निरौलाको इजलासले २०७४ वैशाख ३१ गते खातुन र मियाँलाई १ वर्ष कैद र ५० रुपैयाँ जरिवनाको फैसला गर्यो। प्रहरीको अनुसन्धानका क्रममा उनलाई २५ दिन हिरासतमा राखिसकेका कारण ११ महिना ५ दिन कैद र ९ हजार ९ सय ५० रुपैयाँ जरिवाना तोकियो। यस्तै मण्डल र कामतलाई अदालतले ३ वर्ष कैद र ५० रुपैयाँ जरिवानाको फैसला भएको थियो।
मोरङ अदालतले गरेको फैसला चित्त नबुझेपछि खातुनसहित चार जनाले उच्च अदालत विराटनगरमा पुनरावेदन गरे। उच्च अदालत विराटनगरका मुख्य न्यायाधीश तिलप्रसाद श्रेष्ठ र यमुना भट्टराईको संयुक्त इजलाशले ६ पुसमा गरेको फैसलाले खातुनसहित तीन जनाविरुद्ध जिल्लाको फैसलालाई सदर गर्दै जरिवाना वृद्धि गरेको छ। खातुन, मण्डल र कामतलाई कैद सजाय जिल्ला अदालतले गरेको फैसला सदर गरेको छ। तर खातुनका श्रीमान् मियाँले भने सफाइ पाएका छन्। उच्चको फैसला आएपछि फरार भएकी खातुन अझसम्म प्रहरीको फरार सूचीमा छिन्।
यस्तो छ पुरीको किर्ते प्रकरण
सरकारी दस्ताखत छाप किर्ते मुद्दा लागेका पुरी प्रहरीको फरार सूचीमा भएका अभियुक्त हुन्। परिवार स्राेतका अनुसार उनी भारतमा छन्। तर प्रहरीले खोजी तीव्र पारेको भने पनि उनी अझसम्म पक्राउ पर्न सकेका छैनन्।
दमक नगरपालिका-८ को ५० बिघा जग्गा किर्ते गरेको आरोप उनीमाथि लागेको छ। तत्कालीन माओवादी केन्द्रबाट दमक नगरपालिका मेयरका उम्मेदवार पुरीको समूहले मालपोतको ढड्डामै पाना थपेर किर्ते गरेको प्रमाण फेला परेपछि उनीविरुद्ध पक्राउ पुर्जी जारी भएको थियो।
पहिलो पटक गत मंसिर १९ गते पक्राउपुर्जी जारी भयो। त्यो बेला पुरी दमक आसपासमै थिए। तर प्रहरीले पक्राउ गर्ने बुझेर उनी फरार भए। उनी फरार भए पनि प्रहरीका उच्च अधिकारीलाई धम्कीको भाषामा स्टाटस लेखिरहेका थिए। एक महिनासम्म पनि पक्राउ नपरेपछि पौष २४ गते पुरीविरुद्ध अर्को पक्राउपुर्जी जारी भयो। तर उनी अझसम्म फरारको फरार नै छन्।
पुरीले नापी र मालपोतका कर्मचारीको मिलेमतोमा मालपोतको ढड्डामा चार वर्षयता विभिन्न व्यक्तिको नाम चढाएर जग्गा लिन खोजेको अनुसन्धानमा खुलेको छ। सार्वजनिक जग्गा व्यक्तिको नाममा ल्याउन नापी कार्यालय र मालपोत कार्यालयको ढड्डामा पानासमेत थप गरिएको छ। नापी र मालपोत कार्यालयका खातामा पाना थप्न लगाएर सो अनुसारको किर्ते धनीपुर्जा बनाइएको हो।
प्रहरीको केन्द्रीय अनुसन्धान ब्युरोले अनुसन्धान गरी खोला किनारको सार्वजनिक जग्गाको कित्ता नम्बर नै परिवर्तन गरेको फेला पारिसकेको छ। किर्ते काण्डमा ६ जनालाई यसअघि नै प्रहरीले पक्राउ गरी मुद्दा चलाइसकेको थियो। पछि झापा जिल्ला अदालतले जनही तीन लाख ७५ हजार धरौटीमा रिहा गरेको छ।
प्रहरी भन्छ- खोज्दैछौं
अदालतले दोषी ठहर गरेपछि खातुनलाई खोज्न प्रहरी लागिपरेको मोरङ प्रहरीका प्रवक्ता डिएसपी लोकदर्शन थापा बताउँछन्। अदालतले दोषी ठहर गरेकै दिनदेखि खातुनको खोजी तीव्र पारिएको उनको भनाइ छ।
पुरीको किर्ते प्रकरणमा इलाका प्रहरी कार्यालय दमकका प्रमुख प्रहरी नायब उपरीक्षक विजयराज पण्डित चित्तबुझ्दो उत्तर दिँदैनन् तर सँधै रेडिमेड उत्तर आउँछ- खोज्दैछौं।
आफूले खोजी तीव्र पारेको तर अझसम्म नभेटेको उनको भनाइ छ। पुरीका विषयमा अनुसन्धान भइरहेकाले केही बोल्न नमिल्ने भन्दै सूचना थप सूचना दिन अस्वीकार गरे।
प्रहरीलाई धम्की दिएको विषयमा यो पुरानो कुरा भएको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
