काठमाडौं- प्रधानमन्त्री केपी शर्मा ओलीले भ्रष्टाचार नगर्ने र गर्न नदिने आफ्नो अडानमा आफू अडिग रहेको बताएका छन्।
राष्ट्रियसभामा केन्द्रीय कमिटी बैठक समापन समारोहमा बोल्दै अध्यक्ष ओलीले भ्रष्टाचारीमाथि धमाधम सरकारले कारबाही गर्न थालेपछि चौतर्फी चर्चा भएको दाबी गरे।
भ्रष्टाचार बढेको नभई सरकारले छानबिन र कारबाही गर्न थालेपछि धेरै बाहिर आएको उनको दाबी थियो।
नेकपा केन्द्रीय कमिटी बैठकमा समापन मन्तव्य दिने क्रममा पार्टी अध्यक्षसमेत रहेका ओलीले विगतका भ्रष्टाचार काण्ड अहिलेको सरकारका पालामा छानबिन गरेर बाहिर ल्याइएकाले समेत दाबी गरे।
‘मैले भ्रष्टाचार गर्दिनँ र गर्न दिन्नँ भनेको छु,’ उनले भने, ‘उक्त अडानमा अहिले पनि अडिग छु, खासमा अहिले भ्रष्टाचारीहरू पक्राउ परेका छन्। त्यस्ता काण्डहरू बाहिर ल्याइएको छ। अहिले सरकारले कारबाही गरेपछि भ्रष्टाचार बढेको ढंगले प्रचार गरिएको छ।’
विगतमा भ्रष्टाचार गुपचुप हुने र छानबिन समेत नहुने गरेको दाबी प्रधानमन्त्री ओलीले गरे।
प्रधानमन्त्री ओलीले कोरोना भाइरसबाट बच्न पार्टी नेता कार्यकर्ताले जनतामा सामाजिक अभियान चलाउनुपर्ने बताए।
त्यसक्रममा उनले कोरोनाबाट कसरी बच्ने भनेर जानकारी समेत दिएका थिए।
बैठकका क्रममा केही सञ्चार माध्यमले पूर्वाग्रही भएर टिप्पणी गर्ने गरेको आरोप लगाए।
संघ, प्रदेश र स्थानीय तीनै तहका सरकार पार्टीको नीति निर्देशन अनुसार चल्नुपर्ने बताए।
प्रधानमन्त्री ओलीले केन्द्रीय कमिटीले दिएका सुझाव र निर्देशन कार्यन्वयन हुने प्रतिबद्धता समेत व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
-1768395492.png)
