इटहरी- संघीय प्रहरी इकाई कार्यालय धरानका प्रमुख तथा एसएसपी सौरभ राणाविरुद्ध जिल्ला प्रहरी कार्यालय सुनसरीमा बलात्कारको उजुरी दर्ता भएको छ।
पीडित महिलाले बिहिबार जिल्ला प्रहरी कार्यालयमा उजुरी दिएकी थिइन्। उनको उजुरी दर्ता भइसकेको जिल्ला प्रहरी कार्यालयका प्रवक्ता एवं डिएसपी विनोद शर्माले जानकारी दिए।
‘हिजो बेलुका उजुरी आएको हो, दर्ता भइसकेको छ,’ उनले भने। उजुरी दर्तापछि प्रहरीले निवेदक महिलाको मेडिकल जाँच गराएको छ भने घटनास्थल मुचुल्का पनि गरेको डिएसपी शर्माले जानकारी दिए।
पीडित महिलाको बयान र मुचुल्का सकिएको समेत प्रहरी स्रोतले जानकारी दिएको छ।
महिलाको बिपी कोइराला स्वास्थ्य विज्ञान प्रतिष्ठान धरानमा शुक्रबार स्वास्थ्य परीक्षण गरिएको थियो भने उजुरीमा उल्लेख भएअनुसार घटनास्थल इटहरीमा मुचुल्का गरिएको डिएसपी शर्माले बताए। ‘मेडिकल जाँच भयो, र घटनास्थल मुचुल्का पनि भइसकेको छ,’ प्रवक्ता शर्माले भने। घटनाबारे उनले थप खुलाउन भने चाहेनन्।
बलात्कारको आरोप लागेपछि गृहमन्त्रालयले एसएसपी राणा शुक्रबारबाटै निलम्बनमा समेत परेका छन्। उजुरी दर्तापछि अदालतबाट अनुमति लिएर राणालाई पक्राउ गर्ने तयारी भइरहेको पनि बताइएको छ।
स्रोतका अनुसार एसएसपी राणा र पीडित भनिएकी महिलाबीच पुरानो चिनजान थियो। बिर्तामोड बस्ने ती महिला झापामा डिएसपी हुँदादेखि नै राणा र महिलाबीच चिनजान भएको बताइएको छ।
उनले विगत १५ वर्षदेखि आफूलाई राणाले यौन शोषण गरेको आरोप लगाएकी छन्। राणा एसपी भएपछि जिल्ला प्रहरी कार्यालय प्रमुख भएर सुनसरी आएका थिए। पछि राणा क्षेत्रीय ट्राफिक प्रहरी कार्यालय इटहरी प्रमुख भएका थिए। पछिल्लो समय एसएसपीमा बढुवा भएपछि धरानस्थित संघीय प्रहरी इकाई प्रमुख भएर आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
