काठमाडौं- प्रतिनिधिसभाका उपसभामुख शिवमाया तुम्बाहाङ्फेले संसद्मा सम्बोधन गर्दै राजीनामा दिने घोषणा गरेकी छन्।
सोमबार संसद्मा सम्बोधन गर्दै उनले राजीनामा दिने घोषणा गरेकी हुन्।
तत्कालीन सभामुख कृष्णबहादुर महरा बलात्कार उद्योगको आरोपमा पुर्पक्षका लागि थुनामा गएपछि संसद्को नेतृत्व तुम्बाहाम्फेले नै गर्दै आएकी थिइन्।
'विभिन्न पक्षहरूबीचमा यस अन्यौललाई निकास दिन चलिरहेको छलफललाइ मैले सुक्ष्म अध्ययन गरिरहेकी छु। यसै अनुसार मैले मार्ग प्रशस्त गर्ने निष्कर्षमा पुगेको व्यहोरा सम्मानित सदनसमक्ष निवेदन गर्न चाहन्छु,' सदनमा सम्बोधन गर्दै उनले भनेकी छन्।
प्रतिनिधिसभाको अर्को बैठक सोमबार नै ४ बजे बस्ने भएको छ।
सो बैठकको अध्यक्षता ज्येष्ठ सदस्यको हैसियतमा महन्थ ठाकुरले गर्ने भएका छन्।
त्यसअघि ठाकुरले २ बजे शीतलनिवासमा पुगेर राष्ट्रपतिसमक्ष प्रतिनिधिसभा बैठक संचालनका लागि ज्येष्ठ सदस्यको सपथ लिनेछन्।
दिउँसो ४ बजे बस्ने बैठकमार्फत् नयाँ सभामुख चयन प्रक्रिया सुरु हुने भएको छ। सभामुख निर्वाचनको कार्यतालिका बैठकमार्फत् सार्वजनिक गरिनेछ ।
नेकपा सचिवालय बैठकले सभामुखका लागि अग्नि खरेललाई अघि सार्ने निर्णय गरिसकेको छ। संसद्मा बहुमत नेकपाको भएकाले उनी सभामुखमा निर्वाचित हुने निश्चितजस्तै छ।
संविधानको व्यवस्थाअनुसार सभामुख र उपसभामुख फरक दलको हुनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
