इटहरी– इटहरी भन्ने बित्तिकै धेरैलाई मेयर द्वारिकलाल चौधरी याद आउँछ। इटहरी उपमहानगरपालिकामा जनप्रतिनिधि आएसँगै देशैभर चर्चामा पुगे मेयर चौधरी। अंग्रेजी बोल्ने मेयर र सार्वजनिक जग्गामा डोजर चलाउने जनप्रतिनिधि भनेर सुरुमा स्थानीय स्तरमा चर्चा पायो। केही समयपछि पत्रकारमाथि दुर्व्यवहार र पत्रकारको नाकको डाडी भाच्ने विषयले इटहरीको हेडलाइन समाचारमाध्ययममा राम्रैसँग बिक्यो। कर्मचारी भ्रष्ट भएको र तिनीहरूलाई कुटेरै तह लगाउने भन्दै मेयर चौधरीले अपरेसन सुरु गरेको दाबी गरे।
इटहरी-१९ का तत्कालीन वडा सचिव मनोज दाहाललाई कार्यकक्षमै बोलाएर मेयर चौधरीले कुटपिट गरेपछि इटहरी चर्चा चुलिएको थियो। सोही दिन उपमहानगरका ओभरसियर राम खड्कालाई पनि निष्काशित गरिदिए मेयर चौधरीले। लगत्तै मेयरको प्रतिक्रिया लिन पुगेका पत्रकारमाथि अभद्र व्यवहार भयो मेयर चौधरीबाट।
त्यसपछि लामो समय चौधरी इटहरी बाहिरै रहे। काठमाडौंमा अन्तर्वार्ता दिँदै भ्रष्ट कर्मचारी र 'पत्रुकार'लाई कुटेको भन्दै आफू भ्रष्टाचारविरोधी अभियन्ता भएको दाबी गर्दै मिडियाबाजी गरे। सिएफएल बल्ब प्रकरणमा भ्रष्टाचार गरेको भन्दै उनले वडा सचिव दाहाललाई कुटपिट गरेको बताए। उता खड्काले पैसा खाएर काम गरेको भन्दै जागिरबाट निकालिदिएको स्पष्टीकरण दिए।
त्यसअघि नै इटहरी साना सहरी तथा खानेपानी संस्थाका अध्यक्ष रामप्रसाद चौलागाईंलाई कुटेको वक्तव्य दिँदै आएका थिए मेयर चौधरी। खानेपानी संस्थामा चरम भ्रष्टाचार गरेको भन्दै उनले चौलागाईंलाई भ्रष्टको उपमा दिए। तर केमा र कति भ्रष्टाचार भन्नेबारे उनले खुलाएनन्।
भ्रष्टाचारीका दिन सकिएको भन्दै उनले भ्रष्टलाई तह लगाउने दाबी गरेका थिए। कर्मचारी कुट्ने, पत्रकार लोपार्नेदेखि भ्रष्टचारसम्मको विरोध गरेर चर्चामा आएका मेयर यतिबेला भने गुमनाम भएका छन्। अन्तर्वार्ताका क्रममा उनले एक महिनाभित्र उपमहानगरपालिका कार्यालयबाट १२ भ्रष्ट कर्मचारी निकाल्ने उद्घोष गरेका थिए। धेरै नेताले सार्वजनिक जग्गा मिचेको उनको आरोप थियो।
भ्रष्टाचारी तह लगाउने अभिव्यक्ति दिएर चर्चामा आएका मेयर चौधरी पत्रकारको नाकको डाँडी भाच्न एक करोड छुट्याएको धम्की दिएर पुनः चर्चामा आए। पत्रकारले आफूलाई काम गर्न नदिएको बताउँदै उनले पब्लिक सेन्टिमेन्ट बटुले। त्यतिबेला उनी काठमाडौंमै थिए। मेयर चौधरीले मिडियमा स्पेस पाएकाले उनलाई पुलकित बनायो।
त्यसको केही दिनमै सामाजिक दुर्व्यवहारविरुद्धको कार्यक्रममा बोल्दै उनले महिलालाई निक्कै तल्लो स्तरको सम्बोधन गरे। प्रदेशदेखि संघीय संसदसम्म मेयर चौधरीको कारबाहीको माग भयो। तर उनमाथि न कुनै कारबाही भयो, न कुनै प्रष्टीकरण नै दिनुपर्यो।
५ महिना अघि भाइरल भएको इटहरी अहिले गुमनाम जस्तै छ। विगत १ महिनामा उपमहानगरका दुई जना इन्जिनियरले राजीनामा दिइसकेका छन्। जसकारण घरनक्सा पास गर्नेदेखि भौतिक पूर्वाधार निमार्णको क्रममा समस्या देखापरेको छ।
उपमहानगरपालिका कार्यालयबाट १२ जना भ्रष्ट कर्मचारी निकाल्ने र खानेपानीको भ्रष्टाचार सार्वजनिक गर्ने बताएका मेयर अहिले मौन छन्। मेयरले अगाएको आरोप पुष्टि गर्न नसकेको र शुसासनको प्रत्याभुति दिलाउन नसकेको भन्दै उनीमाथि प्रश्न उठ्न थालेको छ। त्यही समयमा इटहरीलाई एकपछी अर्का योजना सार्वजनिक गरिएका थिए। ठूलै तामझामबीच सार्वजनिक गरिएका योजना अहिले अलपत्र छन्। हामीले केही योजनाबारे यो सामग्रीमा प्रस्तुत गर्ने जमर्को गरेका छौं।
वाइफाई जोन
कार्यपालिकाको पहिलो बैठकबाट निर्णय भएको वाइफाई जोनको योजना अहिले अलपत्र अवस्थामा छ। इटहरीका महत्वपूर्ण चौकमा फ्री वाइफाई जडान गर्ने योजना अहिले बेवारिसे बनेको हो। वडाध्यक्षदेखि मेयरसम्मका उम्मेदवारले वाचा गरको फ्री वाइफाइको मुद्दा अहिले हराएको छ। कार्यपालिकाबाट निर्णय भएर कार्यान्वयन गर्नुपर्ने अवस्थामा पुगे पनि उपमहानगरभित्रको आन्तरिक तनावका कारण योजना अलपत्र परेको हो।
जनता पार्क
जनता पार्कका विषयमा कुनै बेला इटहरीलाई कुनै बेला जुरुक्क उठेको भान हुन्थ्यो। इटहरी-९ मा अवस्थित डिभिएम बोर्डिङले भोगचलन गरिरहेको खेलमैदानमा जनता पार्क बनाउने योजना अगाडि सारिएको थियो । प्रदेश १ का मुख्यमन्त्री शेरधन राईले शिलान्यास गर्ने भनिएको सो पार्क पछि राजनैतिक समीकरण नमिलेपछि एक वृद्धले शिलन्यास गरेका थिए।
मेयर चौधरीले भूमाफियाले जग्गा मिचेको भन्दै स्कुल भत्काउने धम्की दिए। आफू काम गर्ने मेयर भएको भन्दै उनले सो खेलमैदानमा डोजर नै चलाए। पछि क्रिकेट खेलाडीहरूको विराध भएपछि सो मैदानमा तारबार गर्ने काम मात्र भयो। अहिले मैदानमा तारबार छ। तर काम कमसल भएकोले तारबार भत्कन थालिसकेकोछ। उता जनता पार्क अलपत्र परेको छ। उपमेयर लक्ष्मी गौतमले मैदानमा केही फलैंचा बनाउने, सोलार लाईट जडान गर्ने र घुम्न लायक बनाउने गरी काम भइरहेको दाबी गरिन्।
क्यान्सर अस्पताल
इटहरी ५ काव्यवाटिकामा क्यान्सर अस्पताल निर्माण गर्ने योजना तय गरेको थियो उपमहानगरले। इटहरीमा क्यान्सर अस्पताल बन्ने भयो भनेर धेरैले खुसीयाली साटासाट गरे। कतिपयले काव्यवाटिका छेउछाउमा खडेरी खरिदसमेत गरेका थिए।
केही जग्गा कारोबारीले अब विस्तृत योजना प्रतिवेदन आउनै लाग्यो भन्दै जग्गा बिक्री गरी नाफा कमाए। काव्यवाटिकाको जग्गामा बन्न लागेको उक्त अस्पतालबारे जग्गाका विषयमा कुरा नमिलेका कारण योजना असफल भयो।
खोलामा मोटरबोट तथा ग्रिनरी
इटहरीका वडाहरू ४, ६, ३ र २ भएर बग्ने टेङ्ग्रा खोलामा मोटरबोट चलाउने र खोला वरिपरि बिरुवा रोपेर हरीयाली बनाउने योजनामा समेटिएको थियो। खोलाको वारिपारि बाटो बनाउने योजना थियो। विस्तृत योजना प्रतिवेदन बन्ने अवस्थासम्म पुगेको उक्त योजना अहिले अलपत्र छ।
पछिल्लो बजेट नीति तथा कार्यक्रममा २० लाख बजेट छुट्याइएको छ। तर सो आयोजनाको काम भने अघि बढेको छैन।
मोबाइल ट्वाइलेट
कार्यपालिकाको पहिलो बैठकको निर्णय हो मोबाइल ट्वाइलेट संचालनमा ल्याउने। इटहरीमा सार्वजनिक शौचालय नभएको गुनासो बढिरहेको बेला यो निर्णयले निकै प्रशंशा पायो। तर निर्णय भएको दुई वर्ष पूरा हुँदासमेत एउटा पनि मोबाइल शौचालय निर्माण हुन सकेको छैन।
जनप्रतिनिधि आउनु अगाडि नै अभ्यास गरेर असफल भएको माेबाइल ट्वाइलेटको अवधारण पुनः निर्माण गर्ने निर्णय भएको थियो। उपमेयर गौतमले भनिन्, 'उपमहानगरपालिकाको गेट अगाडि नै सुविधा सम्पन्न शौचालय बनाउने काम सुरु भइसकेको छ। माेबाइल ट्वाइलेट असफल प्रयास भएकोले यसलाई स्थगित गरिएको हो।'
रात्रीकालीन बजार
साँझ ७ बजे नै बन्द हुने इटहरीमा रात्रीकालीन बजारको माग भएको लामो समय भयो। इटहरी सहर हुन नसकेको भन्दै सुरक्षा निकाय र स्थानीय सरकारसँग स्थानीयले रात्रीकालीन बजारको व्यवस्थापन गरिदिन माग गरेका हुन्।
सोअनुसार इटहरी उपमहानगरले एक समिति गठन गरेर रात्रिकालीन बजार सम्भाव्यता अध्ययन गर्न भारतका विभिन्न सहरको भ्रमण गरेको थियो। तर १ वर्ष अघिदेखि सुरु भएको यो योजनामा खास प्रगति भएको छैन। गत असोजदेखि सुरु हुने भनिएको योजना अहिले गुमनाम छ। उपमेयर गौतम आगामी बैसाखदेखि रात्रिकालीन बजार संचालन हुन सक्ने बताउँछिन्।
माछापालन
भाइरल भएकै बेला मेयरले इटहरीका विभिन्न पोखरीमा माछाका भुरा र चारो हाल्न सुरु गरेका थिए। जुन विषय मूलाधारका मिडियामा ब्यानर न्युज बन्यो।
युवा स्वारोजगार, स्थानीय उत्पादन बढाउने र सार्वजनिक पोखरीलाई उत्पादनसँग जोड्ने भन्दै माछा अभियान सुरु भयो। तर जुन दिन मेयर चौधरीले माछाका भुरा र चारो पाखरीमा हाले, त्यस दिनदेखि ती पोखरीका माछाको हेरचाह भएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
